ქართული ღვინო დაძველების შემდგომ ძალიან კარგ ხასიათს ავლენს, რადგან აქვს პოტენციალი, რომ მან უფრო მეტად წარმოაჩინოს თავი დროთა განმავლობაში და ბაზარზე უფრო ძლიერი პოზიციონირება ჰქონდეს - გადავწყვიტეთ, რომ ახლად წარმოებული ღვინოების რეალიზაცია აღარ მოვახდინოთ, - ამის შესახებ "იას მეღვინეობის" დამფუძნებელმა და დირექტორმა ია იმერლიშვილმა "ბიზნესპარტნიორთან"  განაცხადა. მისივე ინფორმაციით, ამჟამად, "იას მეღვინეობის" ღვინის 30% ექსპორტზე იყიდება, ხოლო 70% ადგილობრივ ბაზარზე რჩება, საიდანაც ნაწილი ძველდება, ხოლო ნაწილი ღვინის მაღაზიებში იყიდება."ამ ეტაპზე, ექსპორტზე პოლონეთში და გერმანიაში გავდივართ, თუმცა პარალელურად ვმუშაობთ უფრო დიდ ბაზრებზე, მათ შორის, აშშ-სა და ინგლისის ბაზარზე. ადგილობრივ ბაზარს რაც შეეხება - 8000 მოსავალში ვართ წარმოდგენილი და სამომავლოდ HoReCa სექტორში შესვლასაც განვიხილავთ. მიუხედავად იმისა, რომ ქართული ბაზარი გაჯერებულია, გვინდა, რომ ჩვენც აქტიურად ვიყოთ წარმოდგენილი. ამჟამად, ჩვენი წარმადობა 8000 ბოთლამდეა და 6 დასახელება გვაქვს. ვფიქრობ, რომ უცხოეთში ქართულ ღვინოზე მოთხოვნა მზარდია, განსაკუთრებით, კი ქვევრის ღვინოები აინტერესებთ.წინა წლის ანალოგიურ პერიოდთან შედარებით კომპანიის გაყიდვები არ გაზრდილა, რადგან გადავწყვიტეთ, რომ ღვინის დაძველების მიმართულებით გავაგრძელოთ მუშაობა და მომხმარებლებს ღვინო 3-4 წლიანი დაძველებით შევთავაზოთ. დაძველებული ღვინის პერსპექტივა უფრო საინტერესოა", - აცხადებს ია იმერლიშვილი.ცნობისთვის, საოჯახო მეღვინეობა "იას მარანი", რომელიც ქვევრისა და კლასიკური, ევროპული სტილის კრაფტ ღვინოს აწარმოებს, გურჯაანში მდებარეობს. მეღვინეობა ნედლეულს საკუთარი ვენახებიდან იღებს. "იას მარანი" ბაზარზე 2020 წელს გამოჩნდა. bp.ge 

"რძის სექტორის წარმომადგენლებთან შეხვედრაზე სახელმწიფომ ფერმერების პოზიციები მოისმინა და მხარეები შეთანხმდნენ, რომ შეიქმნება ერთობლივი სამუშაო ჯგუფი, რომელიც ყველა საკითხზე ძირფესვიანად იმუშავებს",  -  ამის შესახებ  "ბიზნესპარტნიორთან" რძის პროდუქტების მწარმოებელთა ასოციაციის ხელმძღვანელმა, კახა კონიაშვილმა  განაცხადა.მისი ინფორმაციით, ქვეყანას რძის სექტორს განვითარების პოტენციალი აქვს და კომპლექსური მუშაობით იმპორტის ჩანაცვლება შესაძლებელია. "შეხვედრაზე მთელ რიგ პრობლემებზე იყო საუბარი. განხილული იყო მომხმარებელთა ინფორმირება, რომ ის შეცდომაში არ იქნეს შეყვანილი ესა თუ ის პროდუქტი რძის შემცველია, თუ მცენარეული ცხიმით არის დამზადებული და ა.შ. ჩვენ ვნახეთ, რომ სახელმწიფო ძალიან მოტივირებულია, რომ ეს დარგი განვავითაროთ და იმედი, მაქვს მომავალში ძალიან კარგ შედეგებამდე მივალთ და დარგის განვითარებას ერთობლივად შევუწყობთ ხელს.მრავალი საკითხია გადასაჭრელი იმისთვის, რომ ქვეყანაში რძის წარმოება საკმარისი გახდეს და ჩვენ იმპორტის ჩანაცვლება რეალურად შევძლოთ. (პირველ რიგში რძის ფხვნილის იმპორტის ჩანაცვლებაზეა საუბარი და შემდეგ სხვა პროდუქტებზე). ქვეყანაში გასაუმჯობესებელია საქონლის ჯიშობრივი მიმართულება. როგორც აღვნიშნე საკითხი კომპლექსურია. ერთ-ერთი მნიშვნელოვანი საკითხია საქონელი -  ის საქონელი, რომელიც ქვეყანაშია საკმაოდ დაბალ პროდუქტიულია, მეორე მიმართულებაა ცოდნის გაღრმავება, ხოლო მესამე მიმართულებაა პირუტყვის საკვების წარმოების ხელშეწყობა. ჩვენ თუ გვინდა, რომ პროდუქტიული საქონელი გვყავდეს, მას შესაბამისი კვებაც სჭირდება. აღნიშნულის გარდა, მთელი რიგი საკითხებია, მათ შორის, საძოვრების და ა.შ., რომელზედაც აქტიურად არის სამუშაო. საქართველოს ტრადიციული გამოცდილებიდან გამომდინარე, აღნიშნული დარგის განვითარების პოტენციალი ნამდვილად აქვს. შესაბამისად, მონდომება და სურვილი საბოლოო შედეგს აუცილებლად გამოიღებს. მთავარია ნება, სურვილი და სახელმწიფოს მხრიდან დახმარების ეფექტიანი საფუძვლების შემუშავება", - აცხადებს კახა კონიაშვილი.მანვე აღნიშნა, რომ რძის სექტორის წარმომადგენლებთან შეხვედრაზე ერთ-ერთი განსახილველი საკითხი იყო აფლატოქსინის ზღვრული ნორმა, რომელიც ერთ-ერთ გამოწვევად რჩება."ბოლო პერიოდში აფლატოქსინის შემოწმების მეთოდები გამკაცრდა და ზღვარი 0.005-მდე იქნა დაწეული. აღნიშნულმა, მიუხედავად იმისა, რომ ზღვრის დაწესებისკენ მისწრაფება ყველას გვქონდა, დარგში მთელი რიგი სირთულეები გამოიწვია, რადგან ზოგადად სექტორი და სახელმწიფო ამისთვის მზად არ აღმოჩნდა", - აღნიშნა კახა კონიაშვილმა. bp.ge

კაკლის გადამამუშავებელი საწარმო „ანიგოზი“ 2026 წლიდან საცალო ბაზარზე შესვლას გეგმავს. კომპანიის თანადამფუძნებლის ანა ქევხიშვილის განცხადებით, ბუტიკური მაღაზიებისთვის მაღალი ხარისხის თხილეულის და ჩირეულის შეფუთული პროდუქტის წარმოება დაიწყება, რაც საწარმოსთვის B2B მიმართულებიდან (Business to Business ნიშნავს, რომ კომპანია თავის პროდუქციას სხვა ბიზნესებს აწვდის) B2C სექტორში (Business to Consumer ანუ კომპანია პროდუქციას პირდაპირ საბოლოო მომხმარებელს სთავაზობს) გადასვლის პირველი ნაბიჯია.როგორც მან გადაცემა "ბიზნესპარტნიორის" დილის ეთერში განაცხადა, საწარმოს წლიური წარმადობა ეტაპობრივად იზრდება."საწარმოში 35 ადამიანი მუდმივ რეჟიმში მუშაობს. ჩვენ გვაქვს წარმადობების გაზრდის შესაძლებლობაც. მიმდინარე წელს, ახალი სასაწყობე მეურნეობა დავიმატეთ და გვაქვს გეგმები განვვითარდეთ იმ მიმართულებით, რომ საბოლოო პროდუქტი ვაწარმოოთ. ამ ეტაპზე, მხოლოდ B2B მიმართულებაა ჩვენი და ნედლეულს ვაწარმოებთ და ვაწვდით HoReCa სექტორს და საკონდიტროებს", -   აცხადებს ანა ქევხიშვილი.მანვე აღნიშნა, რომ დღევანდელი მდგომარეობით, ადგილობრივ ბაზარზე სუპერმარკეტებში ქართული ნიგოზი არ იყიდება და აღნიშნული საკითხი კვლავ გამოწვევად რჩება."სამწუხაროდ, ქართულ სუპერმარკეტების ქსელებში ქართული ნიგოზის შეძენას ვერ შეძლებთ. ამ ეტაპზე, მხოლოდ იმპორტირებულის ალტერნატივაა. ძალიან გვინდა და ამ მიმართულებით გვაქვს აქტივობები, თუმცა საბოლოო შედეგს ვერ მივაღწიეთ. გარე ბაზრებში დიდი მოცულობით არის წარმოდგენილი როგორც ქართული, ასევე, იმპორტული ნიგოზი და ფასიდან გამომდინარე მომხმარებლისთვის გასაგები იქნება, რომელია იმპორტული და რომელი ქართული. დღევანდელი მონაცემებით, ქართული ნიგოზის ფასი 32-დან 39-ლარამდეა, ხოლო იმპორტირებულის 20-დან 25-მდე", -  აღნიშნა "ანიგოზის" დამფუძნებელმა.კაკლის გადამმუშავებელი საწარმო „ანიგოზი“ სოფელ მარტყოფში პანდემიის პერიოდში, კერძოდ 2021 წელს, სოფლის განვითარების სააგენტოს თანადაფინანსებით ამოქმედდა. პროექტში, დაახლოებით, 3 მლნ ლარის ინვესტიცია ჩაიდო. თანამედროვე დანადგარებით აღჭურვილი საწარმო ამჟამად, ორი მიმართულებით მუშაობს, კერძოდ, ფერმერებისგან იბარებს როგორც სველ მდგომარეობაში, ახალ დაკრეფილ კაკალს, ასევე მშრალ კაკალს მეორადი გადამუშავებისთვის.bp.ge 

საქართველოდან ღვინის ექსპორტი როგორც რაოდენობაში, ისე ღირებულებაში შემცირდა. ქართული ღვინის გილდიის თანადამფუძნებელი ნიკოლოზ აღდგომელაშვილი  მიზეზად, ბოლო წლებში, მთელ მსოფლიოში განვითარებულ გეოპოლიტიკურ მოვლენებს და სხვადასხვა სამხედრო კონფლიქტს ასახელებს.„ბოლო დროს, ბევრი საექსპორტო ბაზარი ან სრულად, ან ნაწილობრივ ჩაიკეტა, შესაბამისად, ღვინის უდიდესი მწარმოებლები და ისეთი ძლიერი მოთამაშეები, როგორებიც არიან მაგალითად - იტალია და საფრანგეთი, გადანაწილდნენ სხვა საექსპორტო ბაზრებზე, სადაც ჩვენი ღვინოც გადიოდა და შესაბამისად, საქართველოს მათთან მოუწია კონკურენციაში შესვლა, რამაც გარკვეული გავლენა იქონია ექსპორტის მაჩვენებლებზე. მსოფლიოს ბაზარზე თამაშობენ ძალიან ძლიერი მოთამაშეები და ამ ძლიერ მოთამაშეებში ჩვენ საკმაოდ სუსტები ვართ. არა იმიტომ, რომ დაბალი ხარისხის ღვინო გვაქვს, არამედ იმიტომ, რომ ნაკლები გამოცდილება გვაქვს და თამაშის წესები ბოლომდე არ ვიცით“, - აღნიშნა ნიკოლოზ აღდგომელაშვილმა.მან ქართული ღვინის ხარისხზეც გაამახვილა ყურადღება და თქვა, რომ ის ძალიან ნელი ტემპით, თუმცა, წლიდან წლამდე მზარდია. ეტაპობრივად, იზრდება ქართული ღვინის საექსპორტო ფასიც.„საერთაშორისო ბაზარზე ჩვენი ღვინის ფასი მზარდია, თუმცა ძალიან ნელი ტემპით. არიან საწარმოები, რომელთა ღვინის შესაძენადაც სპეციალურად ჩამოდიან ჩვენს ქვეყანაში და მათი ღვინოები ღირს 1200 დოლარი და უფრო მაღალი ფასიც. მე ვიცნობ ასეთ საწარმოებს და საბედნიეროდ, ასეთი ღვინოებიც გვაქვს საქართველოში, თუმცა ეს საერთო სურათს არ ქმნის“, - განმარტა ქართული ღვინის გილდიის თანადამფუძნებელმა.მისივე თქმით, დღეს, ადგილობრივი ღვინო უცხოეთში, უმეტესად, დაბალ და საშუალო სეგმენტშია წარმოდგენილი. აღსანიშნავია, რომ ქართული ღვინისთვის ერთ-ერთი ყველაზე მაღალფასიანი ბაზარი ამერიკის შეერთებული შტატებია. აქ ერთი ლიტრი ღვინის საშუალო ღირებულება 6 დოლარის ფარგლებში მერყეობს. უმეტეს შემთხვევაში კი, 1 ლიტრი ქართული ღვინის საშუალო საექსპორტო ფასი, გადასახადების გარეშე, დაახლოებით, 3 დოლარის ფარგლებშია.რაც შეეხება ექსპორტის ოფიციალურ სტატისტიკურ მაჩვენებლებს, 2025 წლის იანვარ-ნოემბრის მონაცემებით, საქართველოდან მსოფლიოს 70 ქვეყანაში ექსპორტირებულია 245 მლნ დოლარის ღირებულების 82 მილიონამდე ლიტრი ღვინო, რაც გასული წლის იგივე პერიოდთან შედარებით, თანხაში – 7%-თაა შემცირებული, ხოლო რაოდენობაში – 9%-ით. ბიზნესსექტორში ექსპორტის ჯამური მაჩვენებლის კლების მთავარ მიზეზად რუსეთში ექსპორტის შემცირებას ასახელებენ, რაც ამ ქვეყანაში, 2024 წელს იმპორტირებულ ალკოჰოლზე აქციზის გადასახადების ზრდას მოჰყვა. თუმცა, ქართული ღვინის ცნობადობა და შესაბამისად, გაყიდვები გაზრდილია სტრატეგიულ ბაზრებზე, მათ შორის ევროპული სახელმწიფოებისა და აშშ-ს მიმართულებით. გარდა ამისა, აზიის კონტინენტიც ყალიბდება როგორც მზარდი საექსპორტო მიმართულება.უნდა ითქვას, რომ წელს ქართული ღვინის რეალიზაცია, ძირითადად, შემდეგ 10 ქვეყანაში ხდებოდა: რუსეთი, პოლონეთი, უკრაინა, ჩინეთი, ყაზახეთი, ბელარუსი, გერმანია, აშშ, ლატვია და ლიეტუვა.bp.ge 

ახალი სასათბურე მეურნეობა საგარეჯოში უკვე რამდენიმე თვეა ადგილობრივ მოსახლეობას ბიო პროდუქტით ამარაგებს. სათბურები სულ რამდენიმე თვეა აშენდა, სადაც ამ ეტაპზე ორნაირი კიტრი მოჰყავთ, ასევე ღია გრუნტზე სალათის ფურცელი."ჩვენი სათბურები საგარეჯოში"-ის დამფუძნებელი, დოდო გულისაშვილი "ბიზნესპარტნიორთან"  აცხადებს, რომ მეურნეობა 1.2 ჰექტარ ფართობს მოიცავს, თუმცა ჯერ მხოლოდ ნაწილია ათვისებული."სამომავლოდ მთლიანი ტერიტორიის ათვისებას ვგეგმავთ, გაზაფხულზე გვინდა, რომ საჩითილე მეურნეობა გავაკეთოთ და ღია გრუნტიც სრულად ავითვისოთ, სადაც ახალ კულტურებს გავაშენებთ, რაც რეალიზაციის არეალის გაფართოებაშიც დაგვეხმარება, რადგან ამ ეტაპზე მხოლოდ ადგილობრივ ბაზარზე ვყიდით. მეურნეობაში ბიო მეთოდებს ვიყენებთ, ჯერ არ გვაქვს ბიო სერტიფიკატი, თუმცა აქტიურად ვმუშაობთ ამაზე,“-ამბობს დოდო გულისაშვილი.მისივე თქმით, მათი მთავარი მიზანი იმპორტირებული პროდუქციის ქართულით ჩანაცვლებაა."ფასი საკმაოდ არასტაბილურია, რადგან დიდი რაოდენობით შემოდის იმპორტირებული საქონელი, მაგრამ ვცდილობთ ჩვენი ფასი გვეჭიროს ბაზარზე"- განაცხადა დოდო გულისაშვილმა.ცნობისთვის, პროექტი შეღავათიანი აგროკრედიტის ფარგლებში განხორციელდა, ჯამური საინვესტიციო ღირებულება 80 ათას ლარზე მეტია.bp.ge 

მიმდინარე წელს ჩვენი მთავარი სიახლე იაპონიის ბაზარზე გასვლაა და ამ მიმართულებით საკმაოდ იმედიანად ვართ. აღნიშნული ბაზარი ჩვენთვის ძალიან საინტერესოა, - ამის შესახებ კომპანია „ღვინის ქურდების“ თანადამფუძნებელმა ზაზა ასათიანმა „ბიზნესპარტნიორთან“ განაცხადა.მისივე თქმით, იაპონიის გარდა, კომპანიისთვის ძირითად საექსპორტო ბაზრებს ნორვეგია, საფრანგეთი, დიდი ბრიტანეთი და მონტენეგრო წარმოადგენს."მსოფლიოში არსებული გამოწვევები ღვინის ბაზარზეც აისახა. მოთხოვნა შემცირებულია და თვითონ ევროპელებიც გააქტიურდნენ ადგილობრივ ბაზარზე საკუთარი ღვინის რეალიზაციის კუთხით. ჩვენს ტრადიციულ ბაზრებზე ექსპორტი წინა წელთან შედარებით, დაახლოებით 10%-ით შეგვიმცირდა, თუმცა იმის გათვალისწინებით, რომ ჩვენ სხვა ბაზრები დავიმატეთ, წლიურ ჭრილში მაინც ზრდა გვაქვს. იაპონიაში საკმაოდ სერიოზულ კომპანიასთან ვთანამშრომლობთ, რომელსაც საკუთარი მაღაზიები აქვს და ტოკიოს პრემიალურ რესტორნებთან თანამშრომლობს", - აცხადებს ზაზა ასათიანი.რაც შეეხება ადგილობრივ ბაზარს - როგორც "ღვინის ქურდების" თანადამფუძნებელი აღნიშნავს, კონკურენცია საკმაოდ გაზრდილია და ინდუსტრიულ ღვინოზე ფასი შემცირდა."მიუხედავად არსებული სიტუაციისა, ნიშური ღვინის ზრდის პოტენციალი ადგილობრივ ბაზარზე არის. მაგალითად, ჩვენ წარმოდგენილები ვართ უკვე "ფრესკოში", რაც ვფიქრობთ, რომ ეს პირველ რიგში ცნობადობის გაზრდაში დაგვეხმარება. ამჟამად, ჩვენი ღვინოების ძალიან მცირე, 2% იყიდება ადგილობრივ ბაზარზე, ხოლო დანარჩენი ექსპორტზე გადის", - აღნიშნა მან.შეგახსენებთ, ღვინის კომპანია „ღვინის ქურდები“ 2015 წელს წინანდალში დაფუძნდა. დაფუძნებიდან პირველი ორი წელი კომპანიის საქმიანობის კონცეფცია მოიცავდა მევენახე გლეხების მოძიებას მთელი ქვეყნის მასშტაბით და მათ გადაყვანას ეკოლოგიურად სუფთა პროდუქციის წარმოებაზე, ასევე კომპანია მათ  ღვინის ბრენდირებასა და სარეალიზაციო ქსელში პროდუქციის გატანაში ეხმარებოდა.bp.ge 

სამეწარმეო ვენახების გაშენების ახალი წესი ძალიან კარგი იქნება და ყურძნის ხარისხობრივ ზრდას გამოიწვევს, - ამის შესახებ მეღვინეობა "ღვინის ქურდების" თანადამფუძნებელმა ზაზა ასათიანმა "ბიზნესპარტნიორთან"  „ვაზისა და ღვინის შესახებ საქართველოს კანონში ცვლილების შეტანის თაობაზე კანონპროექტის“ შეფასებისას განაცხადა.მისივე თქმით, მსგავსი რეგულაციების ამოქმედებისა და სუბსიდირების მოხსნის შემთხვევაში, დაახლოებით 10 წელში ქართული ღვინო მნიშვნელოვნად უფრო მაღალ დონეზე იქნება."ზოგადად, სახელმწიფოს მხრიდან რეგულაციების და შეზღუდვების მომხრე არ ვარ, მაგრამ ზოგიერთ შემთხვევაში ეს ამართლებს. მე ვფიქრობ, რომ თუ ყველაფერი აღსრულდა, ეს რა თქმა უნდა, დადებით შედეგებს გამოიწვევს. მე საკმაოდ მაღალი დონის უცხოელ ღვინის ექსპერტებთან მქონია შეხვედრა, რომლებმაც მითხრეს, რომ ქართული ვენახის პოტენციალი სრულად გამოყენებული და ათვისებული არ არის. ბევრი ისეთი ადგილი, რომელიც ვენახისთვის იდეალური იქნებოდა, სავენახედ საერთოდ არ არის განხილული და ხშირ შემთხვევაში, ვენახები ისეთ ადგილას არის გაშენებული, სადაც ყურძნის ჯიშობრივი შესაძლებლობები მაქსიმალურად არ არის ათვისებული. ყველა ჯიშს შესაბამისი გარემო, ნიადაგი და კლიმატი სჭირდება. ახლა სპონტანურად უკვე მეტ-ნაკლებად ხდება ვენახების გაშენება, რადგან თავმოყვარე კომპანია და სუბიექტი ნიადაგის რაღაც ანალიზს მაინც აკეთებს, თუმცა მაინც სასურველია, რომ უფრო მეტი რჩევა მოხდეს. სახელმწიფო რადგან ამ რეგულაციას თავის თავზე იღებს - ალბათ, მევენახეებს დაეხმარება და იაფად, ან უფასოდ გაუკეთებს ნიადაგის ექსპერტიზას. შესაძლოა ზოგს ეს ახალი მიდგომა არ მოეწონოს, რადგან უკვე შეძენილი აქვთ ვენახისთვის ადგილი და სააგენტომ უთხრას, რომ ეს ადგილი არ არის იდეალური, მაგრამ ვფიქრობ, რომ მაინც კარგი ინიციატივაა. ზოგადად, ღვინის ეროვნული სააგენტო კარგად მუშაობს, თავის საქმეს კარგად აკეთებს და მივყვებით ქართული მეღვინეობის განვითარების ხედვაში. ერთადერთი ჩემი წუხილი იყო სუბსიდირების ნაწილში. ძალიან დიდი თანხები მიდიოდა აღნიშნული მიმართულებით, რაც ინდუსტრიას არაფერს არ არგებდა და მე როგორც ვიცი, ამის მოხსნაზეც არის საუბარი", - განაცხადა ზაზა ასათიანმა.ცნობისთვის, საქართველოს მთავრობამ მიმდინარე კვირაში განიხილა და მოიწონა „ვაზისა და ღვინის შესახებ საქართველოს კანონში ცვლილების შეტანის თაობაზე კანონპროექტი“, რომლის მიზანია ხარისხიანი, კონკურენტუნარიანი ყურძნისეული წარმოშობის ალკოჰოლიანი სასმელების წარმოების, ასევე, რეალიზაციისათვის აუცილებელი ადგილობრივი და საერთაშორისო ბაზრების მოთხოვნათა გათვალისწინების ხელშეწყობა. ახალი რეგულაცია, მათ შორის, ითვალისწინებს მომავალი წლიდან სამეწარმეო ვენახის გაშენებაზე თანხმობას, რომელსაც სსიპ ღვინის ეროვნული სააგენტო გასცემს.bp.ge 

აზიისა და ევროპის, ასევე ამერიკის ბაზარზე ქართულ ღვინოზე მოთხოვნა საკმაოდ მზარდია, - ამის შესახებ კომპანიის კომერციული დირექტორი ანა მირიანაშვილი "ბიზნესპარტნიორთან" აცხადებს. მისივე ინფორმაციით, კომპანიის გაყიდვების ზრდა შეინიშნება როგორც ადგილობრივ, ისე უცხოურ ბაზრებზე."წინა წლის ანალოგიურ პერიოდთან შედარებით, "ჩელთის" გაყიდვები დაახლოებით, 30%-ით გაიზარდა, თუმცა წლის ბოლოს უფრო დაზუსტებული მონაცემები გვექნება.აღსანიშნავია, რომ წელს დავიმატეთ ახალი ბაზარი - საფრანგეთი და ასევე, გავფართოვდით არსებულ ბაზრებზე. მათ შორის - ჩვენი ღვინოები წარმოდგენილია სხვადასხვა ქვეყნის HoReCa სექტორში და ქსელურ მარკეტებშიც. წელს ჩვენი ყველაზე დიდი მიღწევა ჩინეთში საკუთარი საწყობის გახსნა იყო. უნდა აღვნიშნოთ, რომ საკმაოდ დიდი ზრდაა ჩინეთის ბაზარზე. ყველგან დადებითი მაჩვენებლებია. ქართული ღვინო პოპულარული ხდება აზიის, ევროპისა და ამერიკის ბაზრებზე", - აცხადებს ანა მირიანაშვილი.რაც შეეხება საფასო კატეგორიას - როგორ "ჩელთის" კომერციული დირექტორი აცხადებს, ქართული ღვინო უფრო და უფრო მაღალ საფასო კატეგორიაში გადის."რა თქმა უნდა, არსებობს ტრადიციული ბაზრები, სადაც ქართული ღვინო შედარებით იაფად იყიდება, თუმცა განსაკუთრებით ევროპაში და ამერიკაში საკმაოდ მაღალ სეგმენტში ვართ. ძირითადად ქვევრის ღვინოებზეა ინტერესი, რაც საკმაოდ ძვირი ღირს", - აღნიშნავს ანა მირიანაშვილი.შეგახსენებთ, კომპანია "ჩელთი" ყვარელში, სოფელ შილდაში მდებარეობს. 80 ჰექტარზე "მეღვინეობა ჩელთის“ ვენახი, ხეხილის ბაღები, ტრადიციული მარნები, ბოთლების საძველე და ტურისტული კომპლექსია გაშენებული.„მეღვინეობა ჩელთის“ 21 სახეობის ღვინოს შორის ისეთ უძველეს ჯიშებსაც შეხვდებით, როგორიცაა ხიხვი და ქისი. ბიზნესი საოჯახოა და მისი დამფუძნებელი გიგა მირიანაშვილია.bp.ge 

საქართველოში მომავალი წლიდან მეფრინველეობის სექტორში დიდი ალბათობით, ზრდა დაფიქსირდება.  როგორც კომპანია "კუმისის" დამფუძნებელი, მეფრინველეობის განვითარების ასოციაციის ხელმძღვანელი ზურაბ უჩუმბეგაშვილი "ბიზნესპარტნიორთან" აღნიშნავს, მსოფლიოში ცილაზე მოთხოვნა გაზრდილია. შესაბამისად, ქვეყნის მასშტაბით 2026 წლიდან კვერცხის და ხორცის წარმოება დაახლოებით 3%-ით გაიზრდება. ზურაბ უჩუმბეგაშვილი სფეროში არსებულ გამოწვევების შესახებაც საუბრობს და ხაზს უსვამს, რომ ერთ-ერთი პრობლემური საკითხი იმპორტირებული საქონელია. "კუმისის" დამფუძნებლის ინფორმაციით, საქართველოში კვერცხის იმპორტის შემცირება ადგილობრივი წარმოების გაძლიერებას გამოიწვევს."შემცირებისთვის განსაკუთრებული უარყოფითი მუხტი არ გვაქვს. რაც შეეხება ზრდას მთელს მსოფლიოში და მათ შორის საქართველოში, ცილაზე მოთხოვნა გაზრდილია, შესაბამისად, კვერცხის და ხორცის წარმოება მომავალი წლიდან გაიზრდება. ზოგად ტენდენციას თუ შევხედავთ მაჩვენებელი ყოველწლიურად 3%-ით მატულობს. აღნიშნულ ტემპს მოთხოვნის ზრდას ვუკავშირებ, რითეილ ქსელი (მაღაზიების, სუპერმარკეტების, ან ონლაინ პლატფორმების ერთობლიობა, სადაც ერთი და იმავე ბრენდის პროდუქცია იყიდება) უფრო ორგანიზებული გახდა, პირობითად საქართველოში ქსელური მაღაზიები უფრო მეტია, ამიტომ მომხმარებლის მხრიდან დაინტერესებაც მაღალია. პროგნოზის გაკეთებაც აღარ გვიჭირს... რაც შეეხება გამოწვევებს -  არასამართლიანი ფასი გვაქვს ხოლმე დავუშვათ - იმპორტულ პროდუქციაზე ქვეყანაში საერთოდ არ არის კვერცხის იმპორტი საჭირო, რადგან ადგილობრივი წარმოება  მოთხოვნას სრულად აკმაყოფილებს. რა ვიცი, ალბათ, მარცვლეულზეც საქართველოში მაღალი ფასი გვაქვს", - აცხადებს "კუმისის" დამფუძნებელი.ცნობისთვის, კომპანია "კუმისი" ადგილობრივ ბაზარზე 2005 წლიდან ოპერირებს. თანამედროვე დონეზე აღჭურვილი საწარმოს საქმიანობა ქათმის კვერცხის წარმოებაა. კომპანია 2016 წლიდან ფლობს ISO 22 000 კატეგორიის სერტიფიკატს, რომელიც მენეჯმენტის გამართულ მუშაობას და წარმოებული კვების პროდუქტების უსაფრთხოების ნორმების მკაცრად დაცულობას ადასტურებს.bp.ge 

ბოლო რამდენიმე დღეა ქვეყანაში, მაღაზიათა ქსელების დახლებზე კვერცხის დეფიციტი შეინიშნება. სიტუაციაში გასარკვევად "ბიზნესპარტნიორი" მეფრინველეობის განვითარების ასოციაციის ხელმძღვანელ ზურაბ უჩუმბეგაშვილს დაუკავშირდა, რომელიც აცხადებს, რომ  აღნიშნული პროდუქტი დეფიციტში არ არის და ის  უბრალოდ "ნაკლებობაშია".მისი თქმით, ქვეყნის მასშტაბით კვერცხის იმპორტი შემცირებულია, შესაბამისად სუპერმარკეტების დახლებზე ცარიელი ადგილი ჩანს.როგორც ზურაბ უჩუმბეგაშვილი აცხადებს, საქართველოში კვერცხის წარმოების 90%-ი ადგილობრივ ბაზარზე მოდის, ხოლო თურქეთიდან შემოსული იმპორტირებული საქონლის წილი 10%-ია. ბოლო წლებში კი, კვერცხის იმპორტი მხოლოდ თურქეთიდან ხორციელდებოდა.როგორც ზურაბ უჩუმბეგაშვილი განმარტავს, თურქეთიდან შემოსული მთელი პროდუქცია (სტანდარტული და სერტიფიცირებული კვერცხი) აშშ-ის ბაზარზე გადავიდა. აქედან გამომდინარე, საქართველოს ბაზარს კვერცხის ნაკლებობა დაეტყო. საერთო ჯამში, ქვეყანაში პროდუქტის იმპორტი გასულ წელს 60 მლნ იყო, წელს კი 10 მლნ-მდე დაიწია.ასოციაციის ხელმძღვანელი ადგილობრივ წარმოებასაც მიმოიხილავს და აღნიშნავს, რომ ადგილობრივ ბიზნესს წარმოება შემცირებული არ აქვს. ზურაბ უჩუმბეგაშვილის თქმით, ბაზრიდან თურქეთის ჩახსნა კარგია, რადგან ადგილობრივ წარმოებას პროდუქციის ნაკლებობის შევსების რესურსი აქვს."წელს კვერცხზე ფასის მომატებას არ ვაპირებთ, ყოველ შემთხვევაში მწარმოებლებისგან არ განიხილება. იცით რა ხდება?! გასულ წლებში ქვეყნის მასშტაბით ძალიან დიდი რაოდენობით იმპორტირებული საქონელი შემოდიოდა. წელს სხვადასხვა მიზეზის გამო იმპორტირებული პროდუქტი დიდი რაოდენობით არ შემოვიდა. საქსტატის ანგარიშის მიხედვითაც, ადგილობრივი ბიზნესი კვერცხს იმაზე მეტს აწარმოებს, ვიდრე წინა წლებში იყო. მოკლედ, იმპორტირებული პროდუქცია არ შემოსულა და აღნიშნული ადგილია დახლებზე ცარიელი, კვერცხის დეფიციტი არა, მაგრამ ცოტა ნაკლებობა შეინიშნება. აშშ-ში რა სიტუაციაა კვერცხთან დაკავშირებით კარგად იცით, 1 ცალი კვერცხი დაახლოებით $1 ღირდა, თურქეთის მთელი წარმოება (სტანდარტული და სერტიფიცირებული) აშშ-ის ბაზარზე აეწყო. დამატებით თურქეთმა კვერცხსა და ქათამზე კვოტები შემოიღო, ანუ თურქეთისთვის ქათმის ხორცისა და კვერცხის ექსპორტი კვოტირებულია.ადგილობრივ ბაზარს საკუთარი წარმოება შემცირებული არ აქვს, ჩვეულებრივად ვმუშაობთ.  წარმოიდგინეთ - კვერცხის იმპორტი 60 მლნ იყო, წელს კი 10 მლნ არ ყოფილა. ბაზარს აღნიშნული რაოდენობის პროდუქტი, რომ აკლდება ასე უცებ ვერ შევავსებთ, მომავალ წელს კი შევსებული იქნება. ზოგადად, ყოველწლიური გეგმა გვაქვს, რომ  წარმოება გავზარდოთ შარშან 6 000 მლნ-ზე ვიყავით და ამჟამად, 700 მლნ კვერცხს გადავცდით, წინ კიდევ თვე ნახევარია... რაც შეეხება ქათმის ჭირს, ყოველ წელს რაღაც ავადმყოფობაა ხოლმე, მაგრამ განსაკუთრებული და საგანგაშო არაფერი დაფიქსირებულა...", - აცხადებს ზურაბ უჩუმბეგაშვილი.იმპორტირებული საქონლის თემას მეფრინველეობის განვითარების ასოციაციის ხელმძღვანელი დეტალურად მიმოიხილავს და ხაზს უსვამს, რომ ამ ეტაპამდე ადგილობრივ ბიზნესს არასამართლიანი ფასის ეშინოდა, ახლა კი სურათი შეიცვალა."იმპორტირებული საქონელი იმდენად დაბალ ფასად შემოდიოდა, რომ წარმოების გაზრდა აღარ გვიღირდა, მხოლოდ რაღაც ნიშნულს ვიკავებდით. სხვა სიტუაციაა, როდესაც იცი რომ იმპორტირებული საქონელი არ შემოვა, მაშინ წარმოებას გაზრდი. არასამართლიანი ფასის გვეშინოდა, ამ ეტაპზე იმპორტირებული საქონელი ჩაეხსნა. რესურსი რომ წარმოება გავზარდოთ გვაქვს და მომავალი წლიდან გავაკეთებთ კიდეც. ეს ყველაფერი ადგილობრივ წარმოებაზე დადებითაც აისახება", - აცხადებს ზურაბ უჩუმბეგაშვილი.ცნობისთვის, როგორც საერთაშორისო მედიაში წერენ, აშშ-ში კვერცხის ფასი ასტრონომიულად მაღალი იყო, რაც ფრინველის გრიპის გამო შექმნილმა დეფიციტმა და მწარმოებლების მხრიდან გაზრდილმა ხარჯებმა გამოიწვია.bp.ge