"საქართველოს მელიორაციაში" "ირიგაციისა და დრენაჟის ეროვნული კომიტეტის" პირველი სხდომა გაიმართა

„ირიგაციისა და დრენაჟის საერთაშორისო კომისიის“ (ICID) საქმიანობაში საქართველოს აქტიური ჩართულობა და სამომავლო პრიორიტეტების განსაზღვრა „საქართველოს ირიგაციისა და დრენაჟის ეროვნული კომიტეტის“ პირველი სხდომის მთავარი საკითხები იყო. სხდომას „საქართველოს მელიორაციამ“ უმასპინძლა.გარემოს დაცვისა და სოფლის მეურნეობის სამინისტროს ცნობით, კომიტეტის წევრებმა განიხილეს სექტორის პრიორიტეტების გათვალისწინებით სამუშაო ჯგუფებში ეროვნული კომიტეტის წევრების ჩართულობის საკითხი. ეს საერთაშორისო გამოცდილების გაზიარებასა და ქვეყანაში საუკეთესო პრაქტიკის დანერგვას შეუწყობს ხელს."ეროვნული კომიტეტის პრეზიდენტმა გიგლა თამაზაშვილმა დადებითად შეაფასა ICID- ის ორგანიზებით ინდოეთსა და ჩინეთში ჩატარებული საერთაშორისო ღონისძიებები, რომლებშიც საქართველოს დელეგაცია მონაწილეობდა. მან კომიტეტის წევრებს საერთაშორისო კომისიის საქმიანობაში აქტიური ჩართულობისკენ მოუწოდა და ხაზიგაუსვა პროფესიული ცოდნისა და გამოცდილების გაზიარების პროცესში ერთობლივი მუშაობის მნიშვნელობას.სხდომაზე კომიტეტის ვიცე-პრეზიდენტმა თამარ ჯალიაშვილმა წარადგინა პრეზენტაცია ICID-ის საქმიანობის, საერთაშორისო კომისიაში ეროვნული კომიტეტის ჩართულობისა და ამ თანამშრომლობით მიღებული სარგებლის შესახებ. პრეზენტაციის შემდეგ გამართულ დისკუსიაზე მონაწილეებმა სამომავლო გეგმებსა და თანამშრომლობისშესაძლებლობებზე იმსჯელეს.„საქართველოს ირიგაციისა და დრენაჟის ეროვნული კომიტეტი“ ICID-ის წევრია 2018 წლის 1-ელი იანვრიდან. მას შემდეგ საქართველო ირიგაციის, დრენაჟისა და წყალდიდობის მართვის მიმართულებით საერთაშორისო პროფესიულ თანამშრომლობაში აქტიურად მონაწილეობს. ICID 78 ქვეყანას აერთიანებს და ამ სფეროში ცოდნისა და გამოცდილების გაზიარებას უწყობს ხელს",-აღნიშნულია ინფორმაციაში. 

10 თვეში წყალსატევებიდან 4 700 მეტრზე მეტი სახლართი ბადე და 78 თევზმახე ამოიღეს

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტმა, ბრაკონიერობასთან ბრძოლის ფარგლებში, 2026 წლის 10 თვეში, ქვეყნის მასშტაბით არაერთი პრევენციული ღონისძიება გაატარა.უწყების პრესსამსახურის ცნობით, 10 თვეში მდინარეებიდან და წყალსაცავებიდან ამოღებულია 4700 მეტრზე მეტი სიგრძის სახლართი ბადე და 78-მდე თევზმახე."ბრაკონიერობის წინააღმდეგ ბრძოლა პრიორიტეტული მიმართულებაა. გარემოსდაცვითი ზედამხედველობის დეპარტამენტის შესაბამისი სამსახურები 24-საათიან პატრულირებას და სამინისტროს ცხელ ხაზზე (153) შემოსულ შეტყობინებებზე მყისიერ რეაგირებას ახდენენ. პარალელურად, პრევენციული ღონისძიებები ტარდება განსაკუთრებით ისეთ ლოკაციებზე, სადაც ბბრაკონიერობის ფაქტები ბოლო წლებში შედარებით ხშირია. 2026 წელს აჭარის, გურიის, სამეგრელო-ზემო სვანეთის, შიდა ქართლისა და მცხეთა-მთიანეთის რეგიონული სამმართველოების თანამშრომლების მიერ პრევენციული ღონისძიებები გატარდა მდინარეებზე - ჭოროხი, ტარჩენა, ენგური, ჩხოუში, მუნჩია, ხობისწყალი, რიონი ჭანისწყალი, ლესისწყალი, მტკვარი, ასევე, ზღვის სანაპიროზე, გრიგოლეთის, ფოთისა და ბაზალეთის ტბებზე, სიონისა და ჟინვალის წყალსაცავებზე. კახეთის რეგიონული სამმართველოს თანამშრომლების მიერ კი თევზმახეები იქნა ამოღებული გურჯაანიის მუნიციპალიტეტში სამელიორაციო სარწყავი არხებიდანაც.  გარემოსდაცვითი პატრულირებისა და სწრაფი რეაგირების თანამშრომლების მიერ კი პრევენციული ღონისძიებები გატარდა თბილისის ზღვაზე.  ღონისძიებების შედეგად ამოღებულია ჯამში 4 700 მეტრზე მეტი სიგრძის სახლართი ბადე და 78-მდე თევზმახე - ე.წ. „გოდორი“, „ფაცერი“ და „ოჩხი“. თევზმახეებსა და ბადეებში გახლართული თევზი გარემოსდაცვითი ზედამხედველობის დეპარტამენტის თანამშრომლებმა ბუნებრივ გარემოში დააბრუნეს",-აღნიშნულია ინფორმაციაში. 

ტყეების აღდგენისა და კლიმატის მიმართულებით თანამშრომლობის მემორანდუმი გაფორმდა

გარემოს დაცვისა და სოფლის მეურნეობის მინისტრის პირველი მოადგილე ნინო თანდილაშვილი და მინისტრის მოადგილე გიორგი წკრიალაშვილი, ჩეხური კომპანიის LEP Trading s.r.o. აღმასრულებელ დირექტორს, ელენა კაზდას და ილია მართლის ფონდის დირექტორს, სოფიო სტურუას შეხვდნენ. ინფორმაციას უწყების პრესსამსახური ავრცელებს.მათივე ცნობით, შეხვედრის ფარგლებში, სამინისტროს, კომპანიასა და ფონდს შორის, ურთიერთგაგების მემორანდუმს მოეწერა ხელი, რომელიც საქართველოს ტყეების აღდგენისა და კლიმატის ცვლილების მიმართულებით თანამშრომლობას ითვალისწინებს.მემორანდუმს ხელი მინისტრის პირველმა მოადგილემ, კომპანიის აღმასრულებელმა დირექტორმა და ფონდის დირექტორმა მოაწერეს.„საქართველოს ტყეების აღდგენა გარემოსდაცვითი პოლიტიკის ერთ-ერთი მნიშვნელოვანი მიმართულებაა. მოხარული ვარ, რომ ჩვენს პარტნიორებთან ერთად, თანამშრომლობის ახალ ეტაპზე გადავდივართ. ხელმოწერილი მემორანდუმი საფუძველს ქმნის, გავაერთიანოთ შესაძლებლობები. ჩვენი მიზანია, ეს თანამშრომლობა კონკრეტულ, შედეგზე ორიენტირებულ პროექტებში აისახოს და ხელი შეუწყოს საქართველოს ტყეების აღდგენას, ეკოსისტემების მდგრადობასა და კლიმატის ცვლილებასთან დაკავშირებული გარემოსდაცვითი გამოწვევების შემცირებას“,- განაცხადა ნინო თანდილაშვილმა.გიორგი წკრიალაშვილმა ყურადღება ტყის აღდგენის ღონისძიებების დაგეგმვისა და განხორციელების პროცესში, ტყის ეკოსისტემების თავისებურებებისა და გრძელვადიანი შედეგების გათვალისწინების მნიშვნელობაზე გაამახვილა.„ტყის აღდგენას, განსაკუთრებული ადგილი უკავია ტყის რესურსების მდგრადი მართვის პროცესში. მნიშვნელოვანია, აღდგენის ღონისძიებები ეფუძნებოდეს ეკოლოგიურ პრინციპებს, კონკრეტული ტერიტორიების საჭიროებებსა და გრძელვადიან ხედვას. ჩვენი ამოცანაა, ხელი შევუწყოთ ტყის ეკოსისტემების გაუმჯობესებას, მათი ეკოლოგიური ფუნქციების შენარჩუნებასა და გაძლიერებას. ამ მიზნის მისაღწევად აუცილებელია როგორც სახელმწიფო უწყებების, ისე კერძო სექტორისა და საერთაშორისო პარტნიორების ჩართულობა. მნიშვნელოვანია, რომ აღნიშნული მემორანდუმის ხელმოწერით, თანამშრომლობის ახალი შესაძლებლობები იქმნება“, - განაცხადა გიორგი წკრიალაშვილმა.ელენა კაზდამ და სოფიო სტურუამ საქართველოს ტყეების აღდგენის პროცესში საერთაშორისო და ადგილობრივი პარტნიორობის მნიშვნელობაზე ისაუბრეს. მათი განცხადებით, მემორანდუმის გაფორმება ქმნის შესაძლებლობას, მხარეებმა გააერთიანონ გამოცდილება, რესურსები და ხელი შეუწყონ გარემოსდაცვითი ინიციატივების განხორციელებას, დასახული მიზნების მიღწევას. შეხვედრას სამინისტროს შესაბამისი სამსახურის ხელმძღვანელი პირები, ასევე ილია მართლის ფონდის გამგეობის წევრები გიორგი ბერიძე, ბესარიონ მარგიანი და ჯაბა თევდორაძე ესწრებოდნენ.

ეროვნული სატყეო სააგენტო კახეთის რეგიონში ტყის აღდგენის ღონისძიებებს ახორციელებს

ეროვნული სატყეო სააგენტოს სააგენტოს ინიციატივით, წნორისა და ჭიაურის სატყეო უბნებზე, ჭალის ტყეში, ტყის მოვლა-აღდგენის ღონისძიებები 727 ჰექტარ ფართობზე მიმდინარეობს.სააგენტოს ცნობით, სამუშაოების ფარგლებში, კომპლექსურ ღონისძიებებთან ერთად, ტერიტორიაზე ჯამში 31 050 მუხისა და იფანის ნერგი დაირგვება.ეროვნული სატყეო სააგენტოს სააგენტოს უფროსი ბესიკ ამირანაშვილი კახეთის რეგიონში ტყის აღდგენის პროექტების მიმდინარეობას ადგილზე გაეცნო. „ტყის ეკოსისტემების რაოდენობრივი და ხარისხობრივი მაჩვენებლების გაუმჯობესება ჩვენი ერთ-ერთი მთავარი პრიორიტეტია. სწორედ ამ მიზანს ემსახურება ქვეყნის მასშტაბით განხორციელებული ტყის მოვლისა და აღდგენის ღონისძიებები, სანიტარიული ჭრები და ინვენტარიზაციის სამუშაოები. მნიშვნელოვანია, რომ თითოეული პროექტი მიმართული იყოს მაღალი ეკოლოგიური ღირებულების მქონე ტყის ეკოსისტემების აღდგენის, გაუმჯობესებისა და შენარჩუნებისკენ. ჩვენ მუდმივად ვაკვირდებით მიმდინარე პროექტებს, რათა სამუშაოები დაგეგმილი მიზნებისა და სტანდარტების შესაბამისად განხორციელდეს“, - აღნიშნა ბესიკ ამირანაშვილმა.ეროვნული სატყეო სააგენტო ყოველწლიურად ზრდის დეგრადირებული ტყეების აღდგენის ღონისძიებების მასშტაბებს. ათწლიანი სტრატეგიის შესაბამისად, ქვეყნის მასშტაბით ტყის აღდგენის ღონისძიებები ჯამში 51 000 ჰექტარ ფართობზე განხორციელდება.

"ავთანდილის მეღვინეობა" იტალიასა და გერმანიაში ექსპორტის დაწყებას გეგმავს

„ავთანდილის მეღვინეობა“ (Avtandil Winery) მომავალ წლის გაზაფხულზე,  ექსპორტზე გასვლას  პირველად გეგმავს. როგორც კომპანიის გენერალურმა დირექტორმა, ავთანდილ ირომაშვილმა „ბიზნესპარტნიორს“ განუცხადა, ამჟამად მოლაპარაკებები იტალიელ და გერმანელ წარმომადგენლებთან მიმდინარეობს.„ჯერჯერობით უცხოურ ბაზარზე არ გავსულვართ, თუმცა ორი ქვეყნის წარმომადგენლებთან უშუალო კონტაქტი გვაქვს. შეთანხმების ეტაპებს გავდივართ და საკითხის დეტალებს ვაზუსტებთ. ეს ქვეყნები იტალია და გერმანიაა. იმედი გვაქვს, რომ მომავალ გაზაფხულზე უკვე ვითანამშრომლებთ, თუმცა ამ ეტაპზე ჯერ კიდევ მოლაპარაკებების პროცესში ვართ.მათთვის გადაწყვეტილების მიღება ცოტა რთულია, რადგან ბრენდს ნაკლები ცნობადობა აქვს და, ამასთანავე, არ გვაქვს იმ რაოდენობის ღვინო, რომ მათი მოთხოვნა დავაკმაყოფილოთ. ვინაიდან ღვინის ხარისხი მოსწონთ და პროდუქცია უკვე შერჩეული აქვთ, რაოდენობის გამო, სამწუხაროდ, გარკვეულწილად თავს იკავებენ“, – განაცხადა ავთანდილ ირომაშვილმა.კომპანია ასორტიმენტის გაფართოებასაც გეგმავს.„წელსაც დავიწყეთ ასორტიმენტის გაფართოება – ღვინოები ამჟამად დაღვინების ეტაპზეა. კიდევ ორი პოზიციის დამატებას და სხვადასხვა ყურძნის ჯიშის ათვისებას ვაპირებთ.ძირითადად საკუთარ ვენახებს ვამუშავებთ და ამ ეტაპზე მხოლოდ ორი სახეობის ვაზი გვაქვს – მიკროზონების საფერავი და რქაწითელი. თუმცა გვინდა, სხვადასხვა ყურძნის ჯიშიც ავითვისოთ, რათა ჩვენი მარანი უფრო მრავალფეროვანი გავხადოთ, გაიზარდოს ინტერესი და მომხმარებელს მეტი არჩევანი შევთავაზოთ.ამ ეტაპზე, რასაც ვამზადებთ, იქნება წითელი ტკბილი ღვინო, რადგან მის წარმოებაზე ბევრი მომხმარებლისგან მივიღეთ მოთხოვნა. სწორედ ამიტომ გადავწყვიტეთ მისი დამატება. ასევე, წელს ბაზარზე ცქრიალა ღვინის გამოშვებას ვაპირებთ, რადგან ამ მიმართულებითაც არის ინტერესი და ეს ჩვენთვისაც სიახლე იქნება“, – განაცხადა ავთანდილ ირომაშვილმა.მისი თქმით, წინა წლებთან შედარებით, კომპანიის მიერ წარმოებულ ღვინოზე მოთხოვნა და გაყიდვები გაზრდილია.„გაყიდვების მაჩვენებელი მომატებულია, თუმცა წლის ბოლომდე ზუსტი შედარება გამიჭირდება. გასულ წელთან შედარებით, ჩვენს ღვინოზე მოთხოვნა გაზრდილია. მაღაზიებსა და ღვინის ბარებში, რომლებთანაც ვთანამშრომლობთ, მოთხოვნა უფრო სისტემატური გახდა, ვიდრე გასულ წელს.რამდენ პროცენტიანი ზრდა იქნება წლის ბოლოს, ჯერჯერობით ზუსტად ვერ გეტყვით, თუმცა გაყიდვები გაცილებით მეტია, ვიდრე გასულ წელს. სავარაუდოდ, დაახლოებით 30%-ით მაინც მოიმატებდა“, – აღნიშნა კომპანიის დირექტორმა.მისი განმარტებით, „ავთანდილის მეღვინეობას“ ამჟამად ღვინის ექვსი სახეობა აქვს.„წელს დაახლოებით 10 000 ბოთლამდე ღვინო გვაქვს ჩამოსხმული. ეს ერთი სახეობა არ არის – ღვინის ექვსი დასახელება გვაქვს. არის როგორც ლიმიტირებული ჩამოსხმის ღვინოები, ისე ისეთი სახეობებიც, რომელთა რაოდენობაც შედარებით მეტია. ადგილობრივ ბაზარზეც აქტიურად ვცდილობთ ჩვენი პროდუქციის გაყიდვას“, – განაცხადა ავთანდილ ირომაშვილმა.მისივე თქმით, კომპანიის ღვინოებიდან ყველაზე დიდი მოთხოვნით რქაწითელი (წარაფი) და საფერავი სარგებლობს.„ეს ბრენდი უკვე ჩამოყალიბებული გვაქვს და წლის დასაწყისიდან დღემდე არაერთი მედალიც მოიპოვა, რის შემდეგაც მოთხოვნა და დაინტერესება გაიზარდა. ძირითადად, ყველა, ვინც საქართველოს სტუმრობს და ღვინის მოყვარულია, ჩვენი ღვინო მოსწონს. გამიჭირდება გითხრათ, რომელი ქვეყნიდან არის უფრო მეტი დაინტერესება, რადგან ინტერესს თითქმის ყველა ქვეყნის ტურისტი გამოხატავს“, – განაცხადა ავთანდილ ირომაშვილმა.ცნობისთვის, ავთანდილის მეღვინეობა (Avtandil Winery) კახეთში, სოფელ კარდანახში მდებარეობს და ბაზარზე 2021 წლიდან ოპერირებს.bp.ge