გარემოსდაცვითი ზედამხედველობის დეპარტამენტმა ხე-ტყის უკანონო მოპოვება-ტრანსპორტირების 17 ფაქტი გამოავლინა. დეპარტამენტის ცნობით, სამართალდარღვევები დაფიქსირდა აჭარაში, სამეგრელოში, იმერეთში, სამცხე-ჯავახეთსა და კახეთში.მათი ინფორმაციით, შუახევის, სენაკის, მარტვილის, წალენჯიხის, აბაშის, წყალტუბოს, ტყიბულის, ხარაგაულის, ბორჯომის, ყვარლისა და ახმეტის მუნიციპალიტეტებში მოქალაქეებმა უკანონოდ მოიპოვეს სხვადასხვა სახეობის ხე-მცენარე. ასევე გამოვლინდა მოპოვებული ხე-მცენარეებისგან დამზადებული მორებისა და საშეშე მერქნის სატრანსპორტო საშუალებებით უკანონო გადაზიდვის ფაქტები."სამართალდარღვევების შედეგად, ჯამში ამოღებულია დაახლოებით 20 კუბური მეტრი საშეშე მერქანი და 30 ერთეული მრგვალი ხე-ტყე (მორი). თითოეულ სამართალდარღვევაზე გატარდა კანონით გათვალისწინებული ღონისძიებები. შუახევში გამოვლენილი 20 ერთეული დაუფირნიშებელი წიწვოვანი სახეობის მორის უკანონო ტრანსპორტირების ფაქტი სისხლის სამართლის დანაშაულის ნიშნებს შეიცავს. მასალები შემდგომი რეაგირების მიზნით შესაბამის უწყებას გადაეგზავნა. ბუნებრივი რესურსების დაცვა გარემოსდაცვითი ზედამხედველობის დეპარტამენტის ერთ-ერთი პრიორიტეტული მიმართულებაა. 2026 წლის 10 თვის მონაცემებით, ქვეყნის მასშტაბით უკანონო ტყითსარგებლობის 1 266 ფაქტია გამოვლენილი. გარემოსდაცვითი სამართალდარღვევების პრევენციის, აღკვეთისა და გამოვლენის მიზნით, დეპარტამენტის ეკიპაჟები ქვეყნის მასშტაბით 24-საათიან უწყვეტ პატრულირებას ახორციელებენ და პრევენციულ ღონისძიებებს ატარებენ. მყისიერი რეაგირება ხდება გარემოს დაცვისა და სოფლის მეურნეობის სამინისტროს ცხელ ხაზზე (153) შემოსულ თითოეულ შეტყობინებაზეც",-აღნიშნულია ინფორმაციაში. 

ღვინის ეროვნული სააგენტოს მხარდაჭერით, ქართული ღვინის მწარმოებელმა 11 საოჯახო მარანმა აშშ-ში, ქალაქ ნიუ-იორკში გამართულ საერთაშორისო გამოფენაში RAW Wine NYC მიიღო მონაწილეობა.ღვინის ეროვნული სააგენტოს  ცნობით, ქართული მარნების გამოფენაში მონაწილეობა მიზნად ისახავდა მცირე და საშუალო მარნების ღვინოების ცნობადობის გაზრდას აშშ-ის ბაზარზე და ქართული ღვინის პოპულარიზაციას საერთაშორისო ასპარეზზე."ამერიკის შეერთებული შტატები ქართული ღვინის ერთ-ერთი სტრატეგიული საექსპორტო ბაზარია. მიმდინარე წლის იანვარ-ოქტომბერში საქართველოდან აშშ-ში 821 ათას ლიტრამდე ღვინოა ექსპორტირებული, რაც გასული წლის ანალოგიური პერიოდის მაჩვენებელს 3%-ით აღემატება. აშშ-ში ქართული ღვინის წარდგენას ქართველმა მეღვინეებმა მხარდაჭერა ქალაქ ნიუ- იორკში საქართველოს გენერალური საკონსულოსგანაც მიიღეს. ღვინის ეროვნული სააგენტოს მხარდაჭერით, ქართული მარნები მიმდინარე წელს RAW Wine-ის გამოფენებში სხვადასხვა ქვეყანაშიც მონაწილეობდნენ.RAW Wine (The Artisan Wine Fair) მაღალი ხარისხის ბუნებრივი, ორგანული და ბიოდინამიკური ღვინოების საერთაშორისო გამოფენაა, რომელიც მსოფლიოს სხვადასხვა ქვეყნის მწარმოებლებს აერთიანებს. ღონისძიების ორგანიზატორია ცნობილი ფრანგი ღვინის მაგისტრი იზაბელ ლეგერონი. წელს ნიუ-იორკში გამოფენა მეათედ გაიმართა. საიუბილეო ღონისძიებაში მსოფლიოს 18 ქვეყნის 120-მდე ღვინის მწარმოებელი მონაწილეობდა",-აღნიშნულია ინფორმაციაში. 

გარემოს ეროვნული სააგენტოს უფროსმა ელენე ღუბიანურმა, მეთევზეობის, აკვაკულტურისა და წყლის ბიომრავალფეროვნების დეპარტამენტის ხელმძღვანელთან, მარინა მგელაძესთან ერთად, აზერბაიჯანის რეპუბლიკის სოფლის მეურნეობის სამინისტროს მიწვევით, აზერბაიჯანის რეგიონული აკვაკულტურის პირველ ფორუმში მიიღო მონაწილეობა.ფორუმის მიზანს აკვაკულტურის სექტორში მდგრადი განვითარების ხელშეწყობა, რეგიონული თანამშრომლობის გაძლიერება, თანამედროვე ტექნოლოგიებისა და ინოვაციური მიდგომების დანერგვის ხელშეწყობა, ასევე დარგის განვითარების პერსპექტივებისა და არსებული გამოწვევების განხილვა წარმოადგენდა.პანელურ სესიაზე, ელენე ღუბიანურმა აკვაკულტურის განვითარების ეროვნულ პრიორიტეტებსა და რეგიონული თანამშრომლობის შესაძლებლობებზე პრეზენტაცია წარადგინა.  ასევე, ყურადღება გაამახვილა საქართველოში მეთევზეობისა და აკვაკულტურის დარგის განვითარების მიმართულებით გადადგმულ ნაბიჯებზე, დარგის ხელშეწყობის მიზნით გატარებულ საკანონმდებლო ცვლილებებზე, აკვაკულტურის განვითარების სტრატეგიაზე, წყლის ბიომრავალფეროვნების დაცვისა და ხარისხის მონიტორინგის მნიშვნელობაზე.აღნიშნულ ფორუმში მონაწილეობა მნიშვნელოვანია საერთაშორისო გამოცდილების გაზიარების, პროფესიული კავშირების გაღრმავებისა და აკვაკულტურის განვითარების მიმართულებით რეგიონული თანამშრომლობის გაძლიერებისთვის.

ღვინის ეროვნული სააგენტოს მხარდაჭერით, ჰონგ-კონგში გამართულ ღვინისა და ალკოჰოლური სასმელების საერთაშორისო გამოფენაში HKTDC Hong Kong International Wine & Spirits Fair 2026 ქართული ღვინის მწარმოებელი ცხრა კომპანია მონაწილეობდა.HKTDC Hong Kong International Wine & Spirits Fair-ი აზიის ერთ-ერთი მნიშვნელოვანი გამოფენაა, რომელიც მსოფლიოს სხვადასხვა ქვეყნის ღვინისა და ალკოჰოლური სასმელების მწარმოებლებს, იმპორტიორებს, დისტრიბუტორებსა და სავაჭრო სექტორის წარმომადგენლებს აერთიანებს.აღნიშნულ გამოფენაში მონაწილეობა ქართული ღვინის მწარმოებლებს შესაძლებლობას აძლევს, საერთაშორისო პროფესიულ აუდიტორიას გააცნონ ქართული ღვინო, დაამყარონ ახალი საქმიანი ურთიერთობები და გააძლიერონ საექსპორტო პოზიციები აზიის ბაზარზე.რიგით მე-18 გამოფენაში HKTDC Hong Kong International Wine & Spirits Fair  წელს მსოფლიოს 25-მდე ქვეყნის 600-ზე მეტი მწარმოებელი მონაწილეობდა.ღვინის ეროვნული სააგენტოს საქმიანობის ერთ-ერთ ძირითად მიმართულებას საერთაშორისო ბაზრებზე ქართული ღვინის პოპულარიზაცია და ცნობადობის ამაღლება წარმოადგენს. სააგენტო ქართული ღვინის პოპულარიზაციის ხელშეწყობის ფარგლებში, ბაზრების დივერსიფიცირების მიზნით, მიზანმიმართულ სარეკლამო-მარკეტინგულ კამპანიებს ახორციელებს ამერიკის, ევროპის და სამხრეთ-აღმოსავლეთ აზიის ბაზრებზე.

ეროვნული სატყეო სააგენტოს თანამშრომლებმა მიმდინარე წლის ოქტომბერში სამართალდარღვევის 56 ფაქტი გამოავლინეს. მათგან 53 ხე-ტყის უკანონო მოპოვებისა და ტრანსპორტირების ფაქტია.ქვეყნის მასშტაბით, სამართალდარღვევის შედეგად ამოღებულია სხვადასხვა სახეობის 53 კუბურ მეტრამდე საშეშე და სამასალე მერქანი, რომელიც სატყეო სააგენტოს „საქმიან ეზოებში“ დასაწყობდა.ხე-ტყის უკანონო მოპოვებისა და ტრანსპორტირების ფაქტებიდან 19 სამეგრელო-ზემო სვანეთში, 9 ქვემო ქართლში, 8 სამცხე-ჯავახეთში, 6 გურიაში, 5 იმერეთში, 3 შიდა ქართლში, 2 მცხეთა-მთიანეთში და 1 კახეთში გამოვლინდა.ამასთან, შიდა ქართლის, სამცხე-ჯავახეთისა და სამეგრელო-ზემო სვანეთის რეგიონებში სახელმწიფო ტყის თვითნებურად დაკავების 3 ფაქტი დაფიქსირდა.„მიმდინარე წლის 1 იანვრიდან დღემდე, ეროვნული სატყეო სააგენტოს თანამშრომლებმა ქვეყნის მასშტაბით ხე-ტყის უკანონო მოპოვებისა და ტრანსპორტირების 561 ფაქტი გამოავლინეს. სამართალდარღვევების პრევენციისა და გამოვლენის პროცესში მნიშვნელოვანი როლი აქვს თანამედროვე ტექნოლოგიებს, რომლებითაც აღჭურვილია რეგიონული სატყეო სამსახურები. მათი გამოყენება მონიტორინგის პროცესს უფრო ეფექტიანს ხდის და უკანონო ტყითსარგებლობის ფაქტების გამოვლენას უწყობს ხელს. ეროვნული სატყეო სააგენტო, შესაბამის უწყებებთან კოორდინაციით, უკანონო ტყითსარგებლობის წინააღმდეგ ბრძოლას მომავალშიც აქტიურად გააგრძელებს“, – განაცხადა ეროვნული სატყეო სააგენტოს უფროსის მოადგილემ ირაკლი ბენაშვილმა.

გარემოში რადიოლოგიური მონიტორინგის მიზნით, შესაბამისი ლაბორატორიის შექმნის საჭიროებისა და მიზანშეწონილობის შესაფასებლად ბირთვული და რადიაციული უსაფრთხოების სააგენტოს გერმანელი ექსპერტი პატრიკ ვოიდი ეწვია. ინფორმაციას გარემოს დაცვისა და სოფლის მეურნეობის სამინისტრო ავრცელებს.უწყების ცნობით, ვიზიტის დროს გერმანელმა ექსპერტმა და სააგენტოს წარმომადგენლებმა მოინახულეს საქართველოს გარემოს დაცვისა და სოფლის მეურნეობის სამინისტროს სისტემაში არსებული უწყებებისა და საგანმანათლებლო დაწესებულებების ლაბორატორიები. მათ ადგილზე შეისწავლეს გარემოს ეროვნული სააგენტოს, სოფლის მეურნეობის სახელმწიფო ლაბორატორიის, სოფლის მეურნეობის სამეცნიერო-კვლევითი ცენტრის,ღვინის ლაბორატორიის, ასევე საქართველოს სტანდარტებისა და მეტროლოგიის ეროვნული სააგენტოსა და თბილისის სახელმწიფო უნივერსიტეტის ტექნიკური შესაძლებლობები, არსებული ინფრასტრუქტურა და კვლევითი მიმართულებები."ექსპერტული მისია განხორციელდა ატომური ენერგიის საერთაშორისო სააგენტოსა (IAEA) და ბირთვული და რადიაციული უსაფრთხოების სააგენტოს ეროვნული პროექტის („რადიაციული უსაფრთხოების ეროვნული მარეგულირებელი ინფრასტრუქტურის გაძლიერება“) ფარგლებში. აღნიშნული აქტივობა მიმდინარე წელს, IAEA-ს გენერალური კონფერენციის დროს, ქართულ მხარესთან კოორდინაციით დაიგეგმა. ვიზიტის შედეგად მიღებული შეფასებები ხელს შეუწყობს გარემოში მაიონებელი გამოსხივების კვლევის მიმართულებით არსებული საჭიროებების განსაზღვრას, ლაბორატორიული შესაძლებლობების განვითარების დაგეგმვასა და საერთაშორისო მხარდაჭერის მოპოვებას. მომზადებული დასკვნა წარედგინება IAEA-ს, რის საფუძველზეც განისაზღვრება შემდგომი ნაბიჯები და დაიგეგმება შესაბამისი ღონისძიებები",-აღნიშნულია ინფორმაციაში. 

საქართველოს პარლამენტის გარემოს დაცვისა და ბუნებრივი რესურსების კომიტეტში, ეროვნული სატყეო სააგენტოს საქმიანობის 2026 წლის ანგარიში და 2027 წლის გეგმები მოისმინეს. ინფორმაციას ეროვნული სატყეო სააგენტო ავრცელებს. მათი ცნობით, პრეზენტაციაზე ეროვნული სატყეო სააგენტოს უფროსმა ბესიკ ამირანაშვილმა ყურადღება სატყეო რეფორმის ფარგლებში განხორციელებულ პროექტებზე გაამახვილა.სატყეო რეფორმის, რომელიც გარემოს დაცვისა და სოფლის მეურნეობის ინიციატივით, 2026 წელს დაიწყო, ერთ-ერთი ძირითადი მიზანი ტყის დაცვისა და ტყითსარგებლობის პრაქტიკის გაუმჯობესებასთან ერთად, ტყის მონიტორინგისა და კონტროლის გაძლიერებაა. როგორც კომიტეტის სხდომაზე ბესიკ ამირანაშვილმა განაცხადა, რეფორმის ფარგლებში მნიშვნელოვნად გაძლიერდა ტყის დაცვისა და მონიტორინგის სისტემა. უკანონო ჭრების პრევენციისა და ტყის დაცვის ეფექტიანობის გაზრდის მიზნით, 1.7 მილიონზე მეტი ჰექტარი 903 სამცველოდ დაიყო და ტყის მცველებს პერსონალური პასუხისმგებლობით გადაეცათ. ტყის მონიტორინგისა და კონტროლის გასაძლიერებლად სისტემას 499 ახალი თანამშრომელი დაემატა, მათ შორის 401 ტყის მცველი. შედეგად, ერთ ტყის მცველზე დასაცავი ტერიტორია 10-15 ათასი ჰექტრიდან საშუალოდ 2 000 ჰექტრამდე შემცირდა, ხოლო ტყის მცველთა ხელფასი მიმდინარე წლის იანვრიდან გაორმაგდა. ტყის დაცვისა და მონიტორინგის თანამედროვე მოდელის ფარგლებში, მონიტორინგი სრულად გაციფრულდა. სახელმწიფო კონტროლის განხორციელებისას გამოიყენება პლანშეტები, სამხრე კამერები, რაციები და ფოტოხაფანგები, რაც ტყის ფიზიკური დაცვისა და კონტროლის ეფექტიანობის გაზრდას უზრუნველყოფს.ტექნოლოგიური გადაიარაღებისა და ინსტიტუციური გაძლიერებს, ფარგლებში აშენდა სატყეო სამსახურის 2 ახალი ოფისი, რეაბილიტირებულია 9 ოფისი. ასევე, მოეწყო 68 საქმიანი ეზო. შეძენილია 110 ერთეული სპეციალური ტექნიკა სატყეო სამუშაოებისთვის და 215 მაღალი გამავლობის ავტომანქანა. ეროვნული სატყეო სააგენტოს უფროსმა კანონმდებლებს სააგენტოს მიერ 2027 წელს დაგეგმილი პროექტებიც გააცნო. მრავალმიზნობრივი ტყითსარგებლობის ხელშეწყობის ფარგლებში, საქართველოს 17 მუნიციპალიტეტისთვის ეკოტურიზმის განვითარების გეგმებია მომზადებული და იდენტიფიცირებულია 40 საინვესტიციო ობიექტი. ბესიკ ამირანაშვილმა ყურადღება ტყის აღდგენის გრეძელვადიან პერსპექტივაზეც გაამახვილა. ყოველწლიურად იზრდება დეგრადირებული ტყის აღდგენის ღონისძიებების მასშტაბები - ათწლიანი სტრატეგიით ქვეყნის მასშტაბით ტყის აღდგენის ღონისძიებები, სულ 51 000 ჰა ფართობზე იქნება განხორციელებული. ასევე, ხაზგასასმელია, რომ 2027 წელს შეიქმნება ძირითადი და დროებითი სანერგეები, რაც ტყის აღდგენის მასშტაბური პროექტების განხორციელებას შეუწყობს ხელს.ეროვნული სატყეო სააგენტოს მთავარი მიზანი ტყეების სანიტარული მდგომარეობის გაუმჯობესება, ტყის ინვენტარიზაცია და მართვის გეგმების მომზადებაა. 2014-2026 წლებში ინვენტარიზაციის სამუშაოები სრულადაა განხორციელებული სატყეო სააგენტოს მართვას დაქვემდებარებული ტერიტორიის 59 %-ზე. ხოლო, 2027-2028წლებში ინფორმაცია სრულად იქნება განახლებული სააგენტოს მართვას დაქვემდებარებული ტერიტორიის 100 % -თვის",-აღნიშნულია ინფორმაციაში. 

„ირიგაციისა და დრენაჟის საერთაშორისო კომისიის“ (ICID) საქმიანობაში საქართველოს აქტიური ჩართულობა და სამომავლო პრიორიტეტების განსაზღვრა „საქართველოს ირიგაციისა და დრენაჟის ეროვნული კომიტეტის“ პირველი სხდომის მთავარი საკითხები იყო. სხდომას „საქართველოს მელიორაციამ“ უმასპინძლა.გარემოს დაცვისა და სოფლის მეურნეობის სამინისტროს ცნობით, კომიტეტის წევრებმა განიხილეს სექტორის პრიორიტეტების გათვალისწინებით სამუშაო ჯგუფებში ეროვნული კომიტეტის წევრების ჩართულობის საკითხი. ეს საერთაშორისო გამოცდილების გაზიარებასა და ქვეყანაში საუკეთესო პრაქტიკის დანერგვას შეუწყობს ხელს."ეროვნული კომიტეტის პრეზიდენტმა გიგლა თამაზაშვილმა დადებითად შეაფასა ICID- ის ორგანიზებით ინდოეთსა და ჩინეთში ჩატარებული საერთაშორისო ღონისძიებები, რომლებშიც საქართველოს დელეგაცია მონაწილეობდა. მან კომიტეტის წევრებს საერთაშორისო კომისიის საქმიანობაში აქტიური ჩართულობისკენ მოუწოდა და ხაზიგაუსვა პროფესიული ცოდნისა და გამოცდილების გაზიარების პროცესში ერთობლივი მუშაობის მნიშვნელობას.სხდომაზე კომიტეტის ვიცე-პრეზიდენტმა თამარ ჯალიაშვილმა წარადგინა პრეზენტაცია ICID-ის საქმიანობის, საერთაშორისო კომისიაში ეროვნული კომიტეტის ჩართულობისა და ამ თანამშრომლობით მიღებული სარგებლის შესახებ. პრეზენტაციის შემდეგ გამართულ დისკუსიაზე მონაწილეებმა სამომავლო გეგმებსა და თანამშრომლობისშესაძლებლობებზე იმსჯელეს.„საქართველოს ირიგაციისა და დრენაჟის ეროვნული კომიტეტი“ ICID-ის წევრია 2018 წლის 1-ელი იანვრიდან. მას შემდეგ საქართველო ირიგაციის, დრენაჟისა და წყალდიდობის მართვის მიმართულებით საერთაშორისო პროფესიულ თანამშრომლობაში აქტიურად მონაწილეობს. ICID 78 ქვეყანას აერთიანებს და ამ სფეროში ცოდნისა და გამოცდილების გაზიარებას უწყობს ხელს",-აღნიშნულია ინფორმაციაში. 

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტმა, ბრაკონიერობასთან ბრძოლის ფარგლებში, 2026 წლის 10 თვეში, ქვეყნის მასშტაბით არაერთი პრევენციული ღონისძიება გაატარა.უწყების პრესსამსახურის ცნობით, 10 თვეში მდინარეებიდან და წყალსაცავებიდან ამოღებულია 4700 მეტრზე მეტი სიგრძის სახლართი ბადე და 78-მდე თევზმახე."ბრაკონიერობის წინააღმდეგ ბრძოლა პრიორიტეტული მიმართულებაა. გარემოსდაცვითი ზედამხედველობის დეპარტამენტის შესაბამისი სამსახურები 24-საათიან პატრულირებას და სამინისტროს ცხელ ხაზზე (153) შემოსულ შეტყობინებებზე მყისიერ რეაგირებას ახდენენ. პარალელურად, პრევენციული ღონისძიებები ტარდება განსაკუთრებით ისეთ ლოკაციებზე, სადაც ბბრაკონიერობის ფაქტები ბოლო წლებში შედარებით ხშირია. 2026 წელს აჭარის, გურიის, სამეგრელო-ზემო სვანეთის, შიდა ქართლისა და მცხეთა-მთიანეთის რეგიონული სამმართველოების თანამშრომლების მიერ პრევენციული ღონისძიებები გატარდა მდინარეებზე - ჭოროხი, ტარჩენა, ენგური, ჩხოუში, მუნჩია, ხობისწყალი, რიონი ჭანისწყალი, ლესისწყალი, მტკვარი, ასევე, ზღვის სანაპიროზე, გრიგოლეთის, ფოთისა და ბაზალეთის ტბებზე, სიონისა და ჟინვალის წყალსაცავებზე. კახეთის რეგიონული სამმართველოს თანამშრომლების მიერ კი თევზმახეები იქნა ამოღებული გურჯაანიის მუნიციპალიტეტში სამელიორაციო სარწყავი არხებიდანაც.  გარემოსდაცვითი პატრულირებისა და სწრაფი რეაგირების თანამშრომლების მიერ კი პრევენციული ღონისძიებები გატარდა თბილისის ზღვაზე.  ღონისძიებების შედეგად ამოღებულია ჯამში 4 700 მეტრზე მეტი სიგრძის სახლართი ბადე და 78-მდე თევზმახე - ე.წ. „გოდორი“, „ფაცერი“ და „ოჩხი“. თევზმახეებსა და ბადეებში გახლართული თევზი გარემოსდაცვითი ზედამხედველობის დეპარტამენტის თანამშრომლებმა ბუნებრივ გარემოში დააბრუნეს",-აღნიშნულია ინფორმაციაში. 

გარემოს დაცვისა და სოფლის მეურნეობის მინისტრის პირველი მოადგილე ნინო თანდილაშვილი და მინისტრის მოადგილე გიორგი წკრიალაშვილი, ჩეხური კომპანიის LEP Trading s.r.o. აღმასრულებელ დირექტორს, ელენა კაზდას და ილია მართლის ფონდის დირექტორს, სოფიო სტურუას შეხვდნენ. ინფორმაციას უწყების პრესსამსახური ავრცელებს.მათივე ცნობით, შეხვედრის ფარგლებში, სამინისტროს, კომპანიასა და ფონდს შორის, ურთიერთგაგების მემორანდუმს მოეწერა ხელი, რომელიც საქართველოს ტყეების აღდგენისა და კლიმატის ცვლილების მიმართულებით თანამშრომლობას ითვალისწინებს.მემორანდუმს ხელი მინისტრის პირველმა მოადგილემ, კომპანიის აღმასრულებელმა დირექტორმა და ფონდის დირექტორმა მოაწერეს.„საქართველოს ტყეების აღდგენა გარემოსდაცვითი პოლიტიკის ერთ-ერთი მნიშვნელოვანი მიმართულებაა. მოხარული ვარ, რომ ჩვენს პარტნიორებთან ერთად, თანამშრომლობის ახალ ეტაპზე გადავდივართ. ხელმოწერილი მემორანდუმი საფუძველს ქმნის, გავაერთიანოთ შესაძლებლობები. ჩვენი მიზანია, ეს თანამშრომლობა კონკრეტულ, შედეგზე ორიენტირებულ პროექტებში აისახოს და ხელი შეუწყოს საქართველოს ტყეების აღდგენას, ეკოსისტემების მდგრადობასა და კლიმატის ცვლილებასთან დაკავშირებული გარემოსდაცვითი გამოწვევების შემცირებას“,- განაცხადა ნინო თანდილაშვილმა.გიორგი წკრიალაშვილმა ყურადღება ტყის აღდგენის ღონისძიებების დაგეგმვისა და განხორციელების პროცესში, ტყის ეკოსისტემების თავისებურებებისა და გრძელვადიანი შედეგების გათვალისწინების მნიშვნელობაზე გაამახვილა.„ტყის აღდგენას, განსაკუთრებული ადგილი უკავია ტყის რესურსების მდგრადი მართვის პროცესში. მნიშვნელოვანია, აღდგენის ღონისძიებები ეფუძნებოდეს ეკოლოგიურ პრინციპებს, კონკრეტული ტერიტორიების საჭიროებებსა და გრძელვადიან ხედვას. ჩვენი ამოცანაა, ხელი შევუწყოთ ტყის ეკოსისტემების გაუმჯობესებას, მათი ეკოლოგიური ფუნქციების შენარჩუნებასა და გაძლიერებას. ამ მიზნის მისაღწევად აუცილებელია როგორც სახელმწიფო უწყებების, ისე კერძო სექტორისა და საერთაშორისო პარტნიორების ჩართულობა. მნიშვნელოვანია, რომ აღნიშნული მემორანდუმის ხელმოწერით, თანამშრომლობის ახალი შესაძლებლობები იქმნება“, - განაცხადა გიორგი წკრიალაშვილმა.ელენა კაზდამ და სოფიო სტურუამ საქართველოს ტყეების აღდგენის პროცესში საერთაშორისო და ადგილობრივი პარტნიორობის მნიშვნელობაზე ისაუბრეს. მათი განცხადებით, მემორანდუმის გაფორმება ქმნის შესაძლებლობას, მხარეებმა გააერთიანონ გამოცდილება, რესურსები და ხელი შეუწყონ გარემოსდაცვითი ინიციატივების განხორციელებას, დასახული მიზნების მიღწევას. შეხვედრას სამინისტროს შესაბამისი სამსახურის ხელმძღვანელი პირები, ასევე ილია მართლის ფონდის გამგეობის წევრები გიორგი ბერიძე, ბესარიონ მარგიანი და ჯაბა თევდორაძე ესწრებოდნენ.