გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტმა, ბრაკონიერობასთან ბრძოლის ფარგლებში, 2026 წლის 10 თვეში, ქვეყნის მასშტაბით არაერთი პრევენციული ღონისძიება გაატარა.უწყების პრესსამსახურის ცნობით, 10 თვეში მდინარეებიდან და წყალსაცავებიდან ამოღებულია 4700 მეტრზე მეტი სიგრძის სახლართი ბადე და 78-მდე თევზმახე."ბრაკონიერობის წინააღმდეგ ბრძოლა პრიორიტეტული მიმართულებაა. გარემოსდაცვითი ზედამხედველობის დეპარტამენტის შესაბამისი სამსახურები 24-საათიან პატრულირებას და სამინისტროს ცხელ ხაზზე (153) შემოსულ შეტყობინებებზე მყისიერ რეაგირებას ახდენენ. პარალელურად, პრევენციული ღონისძიებები ტარდება განსაკუთრებით ისეთ ლოკაციებზე, სადაც ბბრაკონიერობის ფაქტები ბოლო წლებში შედარებით ხშირია. 2026 წელს აჭარის, გურიის, სამეგრელო-ზემო სვანეთის, შიდა ქართლისა და მცხეთა-მთიანეთის რეგიონული სამმართველოების თანამშრომლების მიერ პრევენციული ღონისძიებები გატარდა მდინარეებზე - ჭოროხი, ტარჩენა, ენგური, ჩხოუში, მუნჩია, ხობისწყალი, რიონი ჭანისწყალი, ლესისწყალი, მტკვარი, ასევე, ზღვის სანაპიროზე, გრიგოლეთის, ფოთისა და ბაზალეთის ტბებზე, სიონისა და ჟინვალის წყალსაცავებზე. კახეთის რეგიონული სამმართველოს თანამშრომლების მიერ კი თევზმახეები იქნა ამოღებული გურჯაანიის მუნიციპალიტეტში სამელიორაციო სარწყავი არხებიდანაც.  გარემოსდაცვითი პატრულირებისა და სწრაფი რეაგირების თანამშრომლების მიერ კი პრევენციული ღონისძიებები გატარდა თბილისის ზღვაზე.  ღონისძიებების შედეგად ამოღებულია ჯამში 4 700 მეტრზე მეტი სიგრძის სახლართი ბადე და 78-მდე თევზმახე - ე.წ. „გოდორი“, „ფაცერი“ და „ოჩხი“. თევზმახეებსა და ბადეებში გახლართული თევზი გარემოსდაცვითი ზედამხედველობის დეპარტამენტის თანამშრომლებმა ბუნებრივ გარემოში დააბრუნეს",-აღნიშნულია ინფორმაციაში. 

გარემოს დაცვისა და სოფლის მეურნეობის მინისტრის პირველი მოადგილე ნინო თანდილაშვილი და მინისტრის მოადგილე გიორგი წკრიალაშვილი, ჩეხური კომპანიის LEP Trading s.r.o. აღმასრულებელ დირექტორს, ელენა კაზდას და ილია მართლის ფონდის დირექტორს, სოფიო სტურუას შეხვდნენ. ინფორმაციას უწყების პრესსამსახური ავრცელებს.მათივე ცნობით, შეხვედრის ფარგლებში, სამინისტროს, კომპანიასა და ფონდს შორის, ურთიერთგაგების მემორანდუმს მოეწერა ხელი, რომელიც საქართველოს ტყეების აღდგენისა და კლიმატის ცვლილების მიმართულებით თანამშრომლობას ითვალისწინებს.მემორანდუმს ხელი მინისტრის პირველმა მოადგილემ, კომპანიის აღმასრულებელმა დირექტორმა და ფონდის დირექტორმა მოაწერეს.„საქართველოს ტყეების აღდგენა გარემოსდაცვითი პოლიტიკის ერთ-ერთი მნიშვნელოვანი მიმართულებაა. მოხარული ვარ, რომ ჩვენს პარტნიორებთან ერთად, თანამშრომლობის ახალ ეტაპზე გადავდივართ. ხელმოწერილი მემორანდუმი საფუძველს ქმნის, გავაერთიანოთ შესაძლებლობები. ჩვენი მიზანია, ეს თანამშრომლობა კონკრეტულ, შედეგზე ორიენტირებულ პროექტებში აისახოს და ხელი შეუწყოს საქართველოს ტყეების აღდგენას, ეკოსისტემების მდგრადობასა და კლიმატის ცვლილებასთან დაკავშირებული გარემოსდაცვითი გამოწვევების შემცირებას“,- განაცხადა ნინო თანდილაშვილმა.გიორგი წკრიალაშვილმა ყურადღება ტყის აღდგენის ღონისძიებების დაგეგმვისა და განხორციელების პროცესში, ტყის ეკოსისტემების თავისებურებებისა და გრძელვადიანი შედეგების გათვალისწინების მნიშვნელობაზე გაამახვილა.„ტყის აღდგენას, განსაკუთრებული ადგილი უკავია ტყის რესურსების მდგრადი მართვის პროცესში. მნიშვნელოვანია, აღდგენის ღონისძიებები ეფუძნებოდეს ეკოლოგიურ პრინციპებს, კონკრეტული ტერიტორიების საჭიროებებსა და გრძელვადიან ხედვას. ჩვენი ამოცანაა, ხელი შევუწყოთ ტყის ეკოსისტემების გაუმჯობესებას, მათი ეკოლოგიური ფუნქციების შენარჩუნებასა და გაძლიერებას. ამ მიზნის მისაღწევად აუცილებელია როგორც სახელმწიფო უწყებების, ისე კერძო სექტორისა და საერთაშორისო პარტნიორების ჩართულობა. მნიშვნელოვანია, რომ აღნიშნული მემორანდუმის ხელმოწერით, თანამშრომლობის ახალი შესაძლებლობები იქმნება“, - განაცხადა გიორგი წკრიალაშვილმა.ელენა კაზდამ და სოფიო სტურუამ საქართველოს ტყეების აღდგენის პროცესში საერთაშორისო და ადგილობრივი პარტნიორობის მნიშვნელობაზე ისაუბრეს. მათი განცხადებით, მემორანდუმის გაფორმება ქმნის შესაძლებლობას, მხარეებმა გააერთიანონ გამოცდილება, რესურსები და ხელი შეუწყონ გარემოსდაცვითი ინიციატივების განხორციელებას, დასახული მიზნების მიღწევას. შეხვედრას სამინისტროს შესაბამისი სამსახურის ხელმძღვანელი პირები, ასევე ილია მართლის ფონდის გამგეობის წევრები გიორგი ბერიძე, ბესარიონ მარგიანი და ჯაბა თევდორაძე ესწრებოდნენ.

ეროვნული სატყეო სააგენტოს სააგენტოს ინიციატივით, წნორისა და ჭიაურის სატყეო უბნებზე, ჭალის ტყეში, ტყის მოვლა-აღდგენის ღონისძიებები 727 ჰექტარ ფართობზე მიმდინარეობს.სააგენტოს ცნობით, სამუშაოების ფარგლებში, კომპლექსურ ღონისძიებებთან ერთად, ტერიტორიაზე ჯამში 31 050 მუხისა და იფანის ნერგი დაირგვება.ეროვნული სატყეო სააგენტოს სააგენტოს უფროსი ბესიკ ამირანაშვილი კახეთის რეგიონში ტყის აღდგენის პროექტების მიმდინარეობას ადგილზე გაეცნო. „ტყის ეკოსისტემების რაოდენობრივი და ხარისხობრივი მაჩვენებლების გაუმჯობესება ჩვენი ერთ-ერთი მთავარი პრიორიტეტია. სწორედ ამ მიზანს ემსახურება ქვეყნის მასშტაბით განხორციელებული ტყის მოვლისა და აღდგენის ღონისძიებები, სანიტარიული ჭრები და ინვენტარიზაციის სამუშაოები. მნიშვნელოვანია, რომ თითოეული პროექტი მიმართული იყოს მაღალი ეკოლოგიური ღირებულების მქონე ტყის ეკოსისტემების აღდგენის, გაუმჯობესებისა და შენარჩუნებისკენ. ჩვენ მუდმივად ვაკვირდებით მიმდინარე პროექტებს, რათა სამუშაოები დაგეგმილი მიზნებისა და სტანდარტების შესაბამისად განხორციელდეს“, - აღნიშნა ბესიკ ამირანაშვილმა.ეროვნული სატყეო სააგენტო ყოველწლიურად ზრდის დეგრადირებული ტყეების აღდგენის ღონისძიებების მასშტაბებს. ათწლიანი სტრატეგიის შესაბამისად, ქვეყნის მასშტაბით ტყის აღდგენის ღონისძიებები ჯამში 51 000 ჰექტარ ფართობზე განხორციელდება.

საქართველოს პარლამენტის სოფლის მეურნეობისა და დიასპორის კომიტეტების  ერთობლივი გასვლითი სხდომა  ქ. თელავში ჩატარდა. გარემოს დაცვისა და სოფლის მეურნეობის მინისტრის მოადგილემ ლაშა დოლიძემ კომიტეტების წევრებს 2025 წელს სოფლის განვითარების სააგენტოს მიერ გაწეული საქმიანობის ანგარიში წარუდგინა.მინისტრის მოადგილემ დეპუტატებს განხორციელებული პროექტებისა და პროგრამების შედეგები გააცნო. მან ასევე ისაუბრა მიმდინარე წლის პრიორიტეტულ მიმართულებებსა და დაგეგმილ ღონისძიებებზე.2025 წელს სახელმწიფო მხარდაჭერით სოფლის მეურნეობაში განხორციელებული ინვესტიციების მოცულობამ 1 მილიარდი ლარი შეადგინა, საიდანაც სოფლის განვითარების სააგენტოს დაფინანსება 300 მილიონ ლარს აღემატება. სოფლის განვითარების სააგენტოს მხარდაჭერა მოიცავდა პროგრამებსა და პროექტებს პირველადი წარმოების განვითარების, გადამამუშავებელი და შემნახველი ინფრასტრუქტურის შექმნის, სასოფლო-სამეურნეო ტექნიკის შეძენის მიზნობრიობით. პროდუქციის ბაზრების დივერსიფიცირებისა და ქართული  აგროსასურსათო პროდუქციის ცნობადობის ზრდის მიზნით საქართველოს პავილიონი 9 საერთაშორისო გამოფენაზე მოეწყო.სოფლის განვითარების სააგენტოს მიმდინარე წლის საქმიანობასთან დაკავშირებით საუბრისას, ლაშა დოლიძემ ყურადღება გაამახვილა 2026 წლის 1 ივლისიდან ამოქმედებულ აგროთანადაფინანსების სახელმწიფო პროგრამაზე. პროგრამა ფერმერებს შესაძლებლობას აძლევს, მეურნეობის განვითარებისთვის საჭირო სხვადასხვა ინვესტიცია ერთი პროექტის ფარგლებში განახორციელონ, რაც ხელს უწყობს წარმოების განვითარებასა და  კომერციალიზაციას.მინისტრის მოადგილემ დეპუტატებს, ასევე გააცნო ფერმერული მეურნეობებისა და სოფლად არსებული საწარმოების რეესტრის მუშაობის სპეციფიკა.ლაშა დოლიძემ დაგეგმილ პროგრამებზე საუბრისას ყურადღება გაამახვილა მექანიზაციის ხელმისაწვდომობის გაუმჯობესებისა და მცირე საოჯახო მეურნეობების განვითარების მიმართულებებზე.სოფლის მეურნეობისა და დიასპორის კომიტეტების გაერთიანებულ სხდომას ესწრებოდნენ საქართველოს გარემოს დაცვისა და სოფლის მეურნეობის მინისტრის მოადგილე ზურაბ ეზუგბაია, სოფლის განვითარების სააგენტოს დირექტორი ზურაბ გოზალიშვილი, ადგილობრივი ხელისუფლებისა და თვითმმართველობის წარმომადგენლები, ასევე თელავის სახელმწიფო უნივერსიტეტის სტუდენტები.

როგორ ფუნქციონირებენ წყალმომხმარებელთა ორგანიზაციები, როგორ გამოიყენება წყლის რესურსები ეფექტიანად და როგორ ხდება საირიგაციო ინფრასტრუქტურის მოდერნიზაცია — ამ საკითხებზე პორტუგალიურ გამოცდილებას „საქართველოს მელიორაციის“ წარმომადგენლები გაეცნენ.ვიზიტის ერთ-ერთი მთავარი მიზანი წყალმომხმარებელთა ასოციაციების საქმიანობისა და მათთვის საირიგაციო სისტემების მართვის გადაცემის პორტუგალიური პრაქტიკის გაცნობა იყო. მიღებული გამოცდილება საქართველოს სამელიორაციო სექტორის საჭიროებებზე მორგებული გადაწყვეტილებების შემუშავებას დაედება საფუძვლად.პორტუგალიაში წყლის რესურსების მართვისა და სასოფლო-სამეურნეო მიწების მორწყვისთვის თანამედროვე, ავტომატიზებული ტექნოლოგიები გამოიყენება. ამ პროცესში მნიშვნელოვან როლს წყალმომხმარებელთა ასოციაციები ასრულებენ. ქვეყანაში სულ 40 ასეთი გაერთიანება ფუნქციონირებს.პორტუგალიის შესაბამის უწყებებსა და წყალმომხმარებელთა ასოციაციების ეროვნულ ფედერაციასთან გამართულ სამუშაო სესიებზე ადგილობრივმა სპეციალისტებმა ქართულ მხარეს საკუთარი გამოცდილება გაუზიარეს. შეხვედრებზე ასევე განიხილეს ფერმერთა როლი გადაწყვეტილებების მიღების პროცესში.განსაკუთრებული ყურადღება დაეთმო წყლის დროულად და სათანადო მოცულობით მიწოდებას, წყლის დეფიციტის მართვის პრაქტიკას, ინფრასტრუქტურის ეფექტიან მართვასა და წყლის დანაკარგების მინიმუმამდე შემცირებას. მონაწილეებმა ასევე განიხილეს მცირე წყალსაცავების გამოყენების შესაძლებლობები და მათი მნიშვნელობა წყლის რესურსების მართვისა და საირიგაციო სისტემების სტაბილური მუშაობისთვის.ვიზიტის პრაქტიკული ნაწილი სამელიორაციო ინფრასტრუქტურის დათვალიერებას დაეთმო. დელეგაციის წევრები გაეცნენ სატუმბი და წყლის გამანაწილებელი ნაგებობების მუშაობას და ეწვივნენ ალკევას კაშხალს. მის მიერ შექმნილი წყალსაცავი დასავლეთ ევროპაში უდიდესი ხელოვნური წყალსაცავია.ვიზიტმა ქართულ დელეგაციას წყალმომხმარებელთა ორგანიზაციების ფუნქციონირებისა და წყლის რესურსების ეფექტიანი მართვის პორტუგალიური მოდელის სიღრმისეულად შესწავლის შესაძლებლობა მისცა. დელეგაციის წევრები საირიგაციო ინფრასტრუქტურის მოდერნიზაციის გამოცდილებასაც გაეცნენ.

გარემოს დაცვისა და სოფლის მეურნეობის მინისტრი დავით სონღულაშვილი ფრანგული კომპანია Escal Seafood-ის აღმასრულებელ დირექტორს (CEO) ლუის ტურესს და კომპანია Abbe Timeo-ს წარმომადგენლებს შეხვდა.შეხვედრაზე მხარეებმა საქართველოში წარმოების განვითარების, საექსპორტო პოტენციალის ზრდისა და სამომავლო თანამშრომლობის შესაძლებლობები განიხილეს.მინისტრმა საქართველოს საინვესტიციო გარემოზე, ქვეყანაში ეკონომიკური ზრდის ტენდენციებსა და თავისუფალი ვაჭრობის შეთანხმებებით შექმნილ შესაძლებლობებზე ისაუბრა. ყურადღება ასევე გაამახვილა სახელმწიფო მხარდამჭერი პროგრამების მნიშვნელობაზე.„საქართველოსთვის მნიშვნელოვანია ადგილობრივი წარმოების განვითარება, საექსპორტო პოტენციალის ზრდა და საერთაშორისო პარტნიორებთან თანამშრომლობის გაღრმავება. მსგავსი პარტნიორობა ხელს უწყობს ქართული პროდუქციის საერთაშორისო ბაზრებზე პოზიციონირებას, წარმოებაში თანამედროვე ცოდნისა და გამოცდილების დანერგვას და ადგილობრივი მეწარმეების შესაძლებლობების გაფართოებას. ჩვენი მიზანია, სახელმწიფო მხარდამჭერი პროგრამებისა და ხელსაყრელი საინვესტიციო გარემოს მეშვეობით, ხელი შევუწყოთ ახალი საწარმოო შესაძლებლობების შექმნას და ქართული პროდუქციის კონკურენტუნარიანობის ზრდას“, - განაცხადა დავით სონღულაშვილმა.აღსანიშნავია, რომ კომპანია Abbe Timeo საქართველოში ლოკოკინების გადამუშავების მიმართულებით საქმიანობს, ხოლო ფრანგულ კომპანია Escal Seafood-თან თანამშრომლობა ქართული წარმოების პროდუქციის საერთაშორისო ბაზარზე რეალიზაციას უკავშირდება.ფრანგული კომპანია Escal Seafood 1976 წელს სტრასბურგში დაარსებული საოჯახო ბიზნესია, რომელიც ზღვის პროდუქტების წარმოებისა და რეალიზაციის მიმართულებით საქმიანობს. კომპანიის ასორტიმენტი ასევე მოიცავს ლოკოკინისგან დამზადებულ საკვებ ნაწარმს.ქართული კომპანია Abbe Timeo საქართველოში 2020 წლიდან ფუნქციონირებს და ლოკოკინების გადამუშავებაზეა სპეციალიზებული. კომპანია მცხეთა-მთიანეთის რეგიონში, წილკანში მდებარე საწარმოში ლოკოკინის ხორცსა და ნიჟარებს ამუშავებს. საწარმოში წარმოებული პროდუქცია ძირითადად საექსპორტო ბაზრებზე, მათ შორის საფრანგეთში იყიდება.გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ლაშა დოლიძე და კომპანია Abbe Timeo-ს წარმომადგენლები გიორგი ქადაგიძე და გრიგოლ სიდამონიძე ესწრებოდნენ.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, უკანონო ტყითსარგებლობასთან ბრძოლის ფარგლებში, 2026 წლის 1 იანვრიდან 31  ოქტომბრის ჩათვლით, უკანონო ტყითსარგებლობის 1266 ფაქტი გამოავლინეს. მათგან 154 სისხლის სამართლის დანაშაულის ნიშნებს შეიცავს და მასალები, შემდგომი რეაგირების მიზნით, შესაბამის უწყებებში გადაიგზავნა.გამოვლენილი სამართალდარღვევებიდან 880 ფაქტი ეხება ხე-ტყის უკანონო მოპოვება-ტრანსპორტირებას, ხოლო 386 - სახერხი საამქროების მიერ ტექნიკური რეგლამენტის დარღვევასა და არალეგალური საქმიანობის შემთხვევებს.2026 წლის 10 თვეში დალუქულია 56 არარეგისტრირებული სახერხი საამქრო.რეგიონების მიხედვით, ყველაზე მეტი - 303 ფაქტი დაფიქსირდა აჭარაში. სამეგრელო-ზემო სვანეთში - 225, კახეთში - 203, იმერეთში - 177, სამცხე-ჯავახეთში - 101, გურიაში - 66, ქვემო ქართლში - 60, რაჭა-ლეჩხუმი-ქვემო სვანეთში - 51, მცხეთა-მთიანეთში  - 38, შიდა ქართლში კი - 35.7 სამართალდარღვევა დაფიქსირდა დედაქალაქშიც - გარემოსდაცვითი ზედამხედველობის დეპარტამენტის თანამშრომლებმა, თბილისში, 10 თვეში გამოავლინეს 3 უკანონო სახერხი საამქრო, ასევე სახერხი საამქროს ტექნიკური რეგლამენტის დარღვევის 3 და ხე-ტყის უკანონო ტრანსპორტირების 1 ფაქტი.ბუნებრივი რესურსების დაცვა და ტყით უკანონო სარგებლობის პრევენცია, გამოვლენა და აღკვეთა გარემოსდაცვითი ზედამხედველობის დეპარტამენტისთვის პრიორიტეტია. დეპარტამენტის ეკიპაჟები ქვეყნის მასშტაბით 24-საათიან რეჟიმში პატრულირებენ; მყისიერი რეაგირება ხდება სამინისტროს ცხელ ხაზზე (153) შემოსულ თითოეულ შეტყობინებაზეც.

სურსათის ეროვნულმა სააგენტომ პირუტყვის სეზონურ საძოვრებზე გადარეკვის დაწყებასთან დაკავშირებით, ვეტერინარული ზედამხედველობის პუნქტებზე ცხოველების გარეგანი პარაზიტების საწინააღმდეგო დამუშავება დაიწყო.პროცესის მიმდინარეობას სურსათის ეროვნული სააგენტოს უფროსის მოადგილე ალექსანდრე ზურაბიშვილი თელავის მუნიციპალიტეტში არსებულ პუნქტში გაეცნო.„სააგენტოს ვეტერინარები პირუტყვის დამუშავებას საძოვრებზე სეზონური გადარეკვისას, წელიწადში ორჯერ, გაზაფხულსა და შემოდგომაზე, ბიოუსაფრთხოების წესების სრული დაცვით უზრუნველყოფენ. წელს უკვე 503 ათასამდე წვრილფეხა და მსხვილფეხა პირუტყვია დამუშავებული. აღნიშნული ღონისძიებები ხელს უწყობს ცხოველების ჯანმრთელობის დაცვას, დაავადებების გავრცელების რისკის შემცირებას და შედეგად ეკონომიკური ზარალის თავიდან აცილებას“, – აღნიშნა ალექსანდრე ზურაბიშვილმა.კახეთის, ქვემო ქართლისა და მცხეთა-მთიანეთის რეგიონებში (დედოფლისწყარო, სიღნაღი, თელავი, რუსთავი, მარნეული, ბოლნისი, დუშეთი/ქუბრიაანთკარი), ცხოველთა გადასარეკი ტრასების საკვანძო ადგილებში, დღეისათვის,  7 ვეტერინარული ზედამხედველობის პუნქტი ფუნქციონირებს, სადაც განთავსებულია პირუტყვის სადეზინსექციო-გასაბანი აუზები, სადეზინსექციო საშხაპეები, წყლის რეზერვუარები და ვეტერინარული პუნქტი. ცხოველთა დამუშავებისას მაღალი სტანდარტების ინსექტოაკარიციდული პრეპარატები გამოიყენება.სურსათის ეროვნული სააგენტოს სპეციალისტები ფერმერებს უსასყიდლოდ ემსახურებიან.

გარემოს დაცვისა და სოფლის მეურნეობის მინისტრი დავით სონღულაშვილი, აჭარის მთავრობის თავმჯდომარე ზურაბ პატარაძესა და აჭარის სოფლის მეურნეობისა და გარემოს დაცვის მინისტრ დენის სალუქვაძესთან ერთად, „ქედის ღვინის ფესტივალს“ დაესწრო. ფესტივალი აჭარის სოფლის მეურნეობისა და გარემოს დაცვის სამინისტროს ინიციატივით, წელს პირველად, ქედის მუნიციპალიტეტში გაიმართა.„ქედის ღვინის ფესტივალი ეხმარება ქართული ღვინის პოპულარიზაციას და ადგილობრივი მეღვინეობის განვითარებას. ჩვენი მიზანია, ხელი შევუწყოთ არა მხოლოდ ღვინის წარმოების განვითარებას, არამედ ხარისხზე ორიენტირებული მეღვინეობის გაძლიერებას, ადგილობრივი უნიკალური ჯიშებისა და ტრადიციების შენარჩუნებას, ახალი ბაზრების ათვისებასა და ქართული ღვინის კონკურენტუნარიანობის ზრდას. ქედის ღვინის ფესტივალი კარგი შესაძლებლობაა, უფრო ფართო საზოგადოებას გავაცნოთ აჭარის მეღვინეობის პოტენციალი, ადგილობრივი მწარმოებლები და ქართული ღვინის მრავალფეროვნება. მსგავსი ღონისძიებები, ღვინის ტურიზმის განვითარებასა და რეგიონებში ეკონომიკური შესაძლებლობების გაძლიერებას უზრუნველყოფს“, - აღნიშნა დავით სონღულაშვილმა.ფესტივალის მიზანი ქართული ღვინის პოპულარიზაცია, ადგილობრივი მეღვინეების მხარდაჭერა, ღვინის ტურიზმის განვითარება და რეგიონის ეკონომიკური პოტენციალის წარმოჩენა იყო. ღონისძიებაში საქართველოს სხვადასხვა რეგიონიდან ჩამოსული 50-მდე მარნისა და მეღვინეობის წარმომადგენელი მონაწილეობდა, რომლებმაც სტუმრებს ტრადიციული და თანამედროვე მეთოდებით დამზადებული ღვინოები გააცნეს.ფესტივალის სტუმრებისთვის მოეწყო ღვინის სადეგუსტაციო და თემატური სივრცეები, სადაც საქართველოს სხვადასხვა რეგიონის ღვინოებთან ერთად წარმოდგენილი იყო ქართული მეღვინეობის ტრადიციები და აჭარის კულტურული თავისებურებები.ღონისძიების ფარგლებში გაიმართა გასტრონომიული მასტერკლასები, მომზადდა ღვინის თანმხლები ტრადიციული კერძები, მათ შორის, თონის პური, მწვადი, ჩურჩხელა და აჭარისთვის დამახასიათებელი კერძები. ფესტივალის პროგრამა ასევე მოიცავდა ქართული მრავალხმიანი სიმღერისა და ტრადიციული ცეკვების წარმოდგენებს, ასევე ბავშვებისთვის განკუთვნილ გასართობ აქტივობებს.სომელიეების მიერ ჩატარებული დეგუსტაციის შედეგად გამოვლინდნენ გამარჯვებული მეღვინეები, რომლებსაც სპეციალური სასაჩუქრე ნაკრებები გადაეცათ.ქედის ღვინის ფესტივალზე გარემოს დაცვისა და სოფლის მეურნეობის მინისტრის მოადგილე გიორგი წკრიალაშვილი, სურსათის ეროვნული სააგენტოს უფროსი გიორგი იაკობაშვილი და ადგილობრივი ხელისუფლების წარმომადგენლები იმყოფებოდნენ. 

პროექტის „საქართველოში ტყის სექტორის რეფორმის განხორციელების მხარდაჭერა - ECO.Georgia“ ფარგლებში მმართველი საბჭოს შეხვედრა გაიმართა, რომელზეც მიმდინარე წლის პირველი ექვსი თვის განმავლობაში მიღწეული პროგრესი, პროექტის რესტრუქტურიზაციის შედეგები და არსებული გამოწვევები განიხილეს.შეხვედრას გარემოს დაცვისა და სოფლის მეურნეობის მინისტრის მოადგილე გიორგი წკრიალაშვილი, ტყის პოლიტიკის დეპარტამენტის ხელმძღვანელი კარლო ამირგულაშვილი, გერმანიის საერთაშორისო თანამშრომლობის საზოგადოების (GIZ) საქართველოს ოფისის დირექტორი დენიელ ბუშე, გერმანიის საელჩოს განვითარების სფეროში თანამშრომლობის ხელმძღვანელი საქართველოსა და აზერბაიჯანში ანა მარია-შნაიდერი, პროექტის დირექტორი როზმარი მეტცი, ასევე პროექტის განმახორციელებელი უწყებებისა და პარტნიორი ორგანიზაციების წარმომადგენლები ესწრებოდნენ.„პროექტის რესტრუქტურიზაციის შედეგად მიღწეული ცვლილებები და ეროვნული სატყეო სააგენტოს მიერ ტყის აღსადგენი ფართობის გაზრდა მნიშვნელოვანი წინგადადგმული ნაბიჯია. აღნიშნული შედეგები სრულად შეესაბამება ჩვენს პრიორიტეტებს და ემსახურება ტყის ეკოლოგიური მდგომარეობის გაუმჯობესებასა და ტყის მდგრადი მართვის განვითარებას. მნიშვნელოვანია, რომ პროექტის ფარგლებში დაგეგმილი და განხორციელებული ღონისძიებები პასუხობდეს ქვეყნის სატყეო სექტორში არსებულ საჭიროებებს და ხელს უწყობდეს გრძელვადიანი მიზნების მიღწევას“, - განაცხადა გიორგი წკრიალაშვილმა.პროექტის მმართველი საბჭო წარმოადგენს სტრატეგიული ზედამხედველობისა და კოორდინაციის მექანიზმს, რომლის შემადგენლობაში შედიან განმახორციელებელი სამთავრობო უწყებების, ადგილობრივი ხელისუფლების, დამფინანსებელი ორგანიზაციების, სამოქალაქო საზოგადოების, GIZ-ისა და KfW-ის წარმომადგენლები. საბჭო უზრუნველყოფს პროექტის მიზნების შესრულების მონიტორინგსა და მის ზოგად სტრატეგიულ ხელმძღვანელობას.პროექტის „ECO.Georgia“ მიზანია საქართველოში ტყის მდგრადი მართვის სისტემის ჩამოყალიბების ხელშეწყობა. ინიციატივა მოიცავს გურიის, მცხეთა-მთიანეთისა და კახეთის რეგიონების რვა მუნიციპალიტეტს - ახმეტას, თელავს, დედოფლისწყაროს, ყვარელს, თიანეთს, ლანჩხუთს, ოზურგეთსა და ჩოხატაურს.პროექტი რვაწლიანია და 2021-2029 წლებში ხორციელდება.