ქობულეთის მუნიციპალიტეტში, 4 კმ-მდე სიგრძის სადრენაჟე არხზე გაწმენდითი სამუშაოები მიმდინარეობს

"ბიო მევენახეობა ყოველწლიურად უფრო მოთხოვნადი ხდება" - მარანი "სევსამორა"

ბიო მევენახეობას საქართველოში ძალიან დიდი პოტენციალი აქვს. როგორც საგურამოში მდებარე მარან „სევსამორას“ მენეჯერი, დალი ჩოხელი „ბიზნესპარტნიორთან“ აღნიშნავს, ბიო ორგანული პროდუქტის წარმოება დიდ ხარჯებს უკავშირდება, ამიტომ საქართველოში ამ ეტაპზე საკმარისად პოპულარული არ არის.მისივე თქმით, საქართველოში ორგანული მიმართულებით ცნობიერების დონე მაღლდება, შესაბამისად, ყოველწლიურად მეტი მევენახეა დაინტერესებული, რომ ბიო პროდუქტი აწარმოოს.„საკუთარი ვენახი, რა თქმა უნდა გვაქვს, თუ ყურძენს დამატებით გლეხებისგან ვყიდულობთ ხოლმე, მაგალითად, ლეჩხუმიდან, კახეთის მიკროზონებიდან. ჩვენი ვენახებიდან ნახევარი ბიო ორგანული მევენახეობაა. 2019 წლიდან ბიო მევენახეობის სერტიფიკატს ვფლობთ. 2020 წლიდან კი, ჩვენი ღვინო ოფიციალურადაა ბიო სერტიფიცირებული.ბიო მევენახეობა საინტერესო მიმართულებაა, თუმცა ჩვენი ქვეყნისთვის, ეს ყველაფერი ჯერ კიდევ ახალია, ბევრი კომპანია აღნიშნული ხაზით არ მუშაობს. ამის ერთ-ერთი მთავარი მიზეზი მაღალი ფასია. რაც შეეხება ჩვენს კომპანიას - სერტიფიცირებული CAUCASERT-ის მიერ ვართ, ორგანიზაციის წარმომადგენლები საკმაოდ ხშირად ინსპექტირებაზე შემოდიან, როგორც მარანში, ასევე საწარმოში. უფრო კონკრეტულად, ყველა საფეხური ოფიციალურ დონეზე კონტროლდება: ვენახში მიმდინარე სამუშაოები, ღვინის წარმოება და ა.შ", - აღნიშნავს მარნის მენეჯერი.დალი ჩოხელის ინფორმაციით, ბიო მევენახეობა ყოველწლიურად უფრო მოთხოვნადი ხდება, რაც მისასალმებელია."მევენახეები სულ უფრო მეტად დაინტერესებული არიან, რაც მისასალმებელია. ჩვენც მუდმივად ვცდილობთ, რომ განვითარდეთ, როგორც ადგილობრივი, ასევე უცხოური ბაზრის მონიტორინგს მუდმივად ვაკეთებთ და მოთხოვნის შესაბამისად ვრეაგირებთ.საზოგადოების ცნობიერების დონე მაღლდება, თუმცა წინა წლის ანალოგიურ პერიოდთან შედარებით, რამდენი პროცენტით გაიზარდა გაყიდვები, ზუსტი ციფრის თქმა გამიჭირდება. ადგილობრივ ბაზარზე ჩვენი პროდუქტის ყიდვა, სხვადასხვა, ე.წ. ბუტიკურ ღვინის მაღაზიებში, ასევე 8 000-ს მოსავალშია შესაძლებელი. უცხოეთში ექსპორტი მცირე რაოდენობით გვაქვს. აპრილში იტალიაში, ქალაქ მილანში, საქართველოს საკონსულოს მხარდაჭერით, ვუმასპინძლეთ მასშტაბურ ღონისძიებას და ვიმედოვნებთ, რომ აღნიშნული ღონისძიება  იტალიის ბაზარზე ცნობადობის ამაღლებასა და ექსპორტის განვითარებაში დაგვეხმარება“, - აღნიშნა დალი ჩოხელმა.ცნობისთვის, მარანი „სევსამორა“, საგურამოში 2015 წელს დაარსდა, ხოლო პირველი მოსავალი 2018 წელს მიიღეს. „სევსამორას“ ვენახი 10 ჰექტარზეა გაშენებული. მარნის გარდა, ამავე კომპანიას ეკუთვნის, სასტუმრო "სევსამორა", რომლის შემადგენლობაშია: სპა ცენტრი, ღია და დახურული აუზი, ჯაკუზი, საუნა, რამდენიმე ტიპის რესტორანი და საკონფერენციო სივრცეები. სასტუმროში 2 ვილის ჩათვლით 45 ნომერია, რომელიც განსხვავდება ერთმანეთისგან კატეგორიების და ხედის მიხედვით.bp.ge 

"იაპონიის ბაზარზე, არა მხოლოდ ქართული ღვინო, არამედ ჩვენი ღვინის ისტორიაც უნდა გავყიდოთ" - ზვიად კორძაძე

ქართულ ღვინოს განსხვავებული გემოვნური თვისებებიდან გამომდინარე, იაპონიისა და ჩინეთის ბაზარზე დიდი პოტენციალი აქვს. როგორც "ბარბალეს მარანის" დამფუძნებელი, ზვიად კორძაძე „ბიზნესპარტნიორთან“ აღნიშნავს, ქართულმა ღვინომ უცხოურ ბაზარზე საკუთარი ნიშა უნდა დაიკავოს, რაც დახვეწილ გემოვნურ თვისებებს, ხარისხსა და ისტორიას უკავშირდება.მისივე თქმით, ადგილობრივ ბაზარზე ნებისმიერმა ღვინის მწარმოებელმა საქართველოს ღვინის წარსულს, ისტორიას უნდა მისდიოს.„არ უნდა დაგვავიწყდეს ისტორია! ჩვენ ხომ ღვინის სამშობლო ვართ, გვაქვს ღვინის დაყენების სპეციფიკური მეთოდი, ქვევრი. ტრადიციულ ქვეყნებში ამ ყველაფერს დიდ მნიშვნელობას ანიჭებენ. ჩვენ მხოლოდ ქართული ღვინო არ უნდა გავყიდოთ, ქართული ღვინის ისტორიასაც ვყიდით. ამ ყველაფრის საშუალებას კი, საბედნიეროდ, საქართველოს წარსული გვაძლევს. ეს უნდა იყოს ამბავი - ქართული ღვინის შესახებ. ნებისმიერმა ქართულმა ღვინის მწარმოებელმა ჩვენს ისტორიას უნდა მისდიოს. ხარისხის კომპონენტი, ცხადია, ძალიან მნიშვნელოვანია, საკმარისია, რომელიმე ბაზარზე არა ხარისხიანი პროდუქტი გამოჩნდეს - ისტორია უკვე იკარგება და არაფერში აღარ გამოდგება. მოგეხსენებათ, კარგ ისტორიას ცუდი ღვინო, თუ მიაყოლე, ცუდ შედეგს მიიღებ.უცხოურ ბაზარზე  დიდია კონკურენცია, არ ვსაუბრობ მხოლოდ საფრანგეთსა და იტალიაზე, არამედ შედარებით უფრო დაბალი ხარისხის ზელანდიურ, ჩილეს ღვინოებთან შევდივართ კონკურენციაში. აღნიშნული ქვეყნის ღვინოებს საკმაოდ კარგი გემოვნური თვისებები აქვს და ბიუჯეტიც დაბალია. შესაბამისად, უცხოურ ბაზარზე ჩვენი ნიშა უნდა მოვნახოთ. დახვეწილი გემოვნური თვისებები, ხარისხი, ისტორია - ეს ყველაფერი ჯამში სასურველ შედეგს მოგვცემს.  იმ შემთხვევაში, თუ აღნიშნულ კრიტერიუმებს დავაკმაყოფილებთ, 5-10 წელიწადში მყარი შედეგი გვექნება და შევძლებთ, საძირკველს შემდეგი აგური დავადოთ“, - აცხადებს  "ბარბალეს მარანის" დამფუძნებელი, ზვიად კორძაძე.ცნობისთვის, ღვინის ეროვნული სააგენტო ინფორმაციით, 12 მაისს ტოკიოში ქართული ღვინის წარდგენა გაიმართა. მათივე ცნობით, იაპონიაში, ქართული ღვინის ექსპორტი მზარდია; მაგალითად, მიმდინარე წლის 4 თვეში, საქართველოდან იაპონიაში ექსპორტირებულია 71 ათას ლიტრამდე ღვინო, რაც გასული წლის ანალოგიურ მაჩვენებელს, 21%-ით აღემატება.რაც შეეხება "ბარბალეს მარანს", ის  2014 წელს, ცნობილმა ადვოკატმა, ზვიად კორძაძემ შექმნა. მარანი ამჟამად შინდისში მდებარეობს. "ბარბალეს მარანი" ამ ეტაპზე 8 სახის ღვინოს აწარმოებს. მათ შორის, ისეთ გამორჩეულ სახეობებს აერთიანებს, როგორებიცაა ოცხანური საფერე, ციცქა-ქოლიკაური, უსახელოური, ხიხვი, ხვანჭკარა და სხვა.bp.ge 

"გაყიდვები მინიმუმ 20%-ით გაიზარდა" - მეღვინეობა "აგრიდა"

კახეთში, სოფელ შილდაში მდებარე მეღვინეობა „აგრიდას“ წარმოების დირექტორი, ლაშა მინდიაშვილი აცხადებს, რომ გაყიდვები წინა წლის ანალოგიურ პერიოდთან შედარებით, მინიმუმ 20%-ით გაიზარდა.მინდიაშვილის ინფორმაციით, გაყიდვების ზრდა ღვინის მაღაზიების კუთხით გაფართოებამ გამოიწვია. მისი თქმით, "აგრიდას" ღვინო ამჟამად, 30-მდე ღვინის მაღაზიაშია წარმოდგენილი.„5 წელია, რაც შიდა ბაზარზე გაყიდვები დავიწყეთ. ამჟამად, ქარხანაში 14 სახეობის ღვინოა წარმოდგენილი, ქვევრს, რაც შეეხება - 47 ქვევრი გვაქვს. ვამზადებთ, როგორც ქართული ტრადიციული, ასევე ევროპული მეთოდით. ადგილობრივ ბაზარზე, ჩვენი ღვინოები, რამდენიმე მაღაზიაშია წარმოდგენილი, მაგალითად, როგორიცაა 8 000 მოსავალი, „ალკორიუმი“ და ა.შ. მომხმარებლების დიდი ნაწილი დაახლოებით (70%) უცხოელია, უფრო მცირე ნაწილი კი (30%) ადგილობრივი. მაღაზიებში ჩვენი ღვინის ფასი 8 ლარიდან 50 ლარამდე მერყეობს.უცხოელებს ყველაზე მეტად „ტვიში“ და მშრალი „ცოლიკაური“ მოსწონთ. ქართველები კი, უპირატესობას მშრალ ღვინოებს ანიჭებენ („ქისი“, „ხიხვი“ და ა.შ.)“, - აცხადებს მეღვინეობა „აგრიდას“ წარმოების დირექტორი.ლაშა მინდიაშვილის ცნობით, კომპანია  ამ ეტაპზე, ჩინეთში ექსპორტისთვის ემზადება და უცხოური ბაზრის მონიტორინგს ახორციელებენ.„ამჟამად, ექსპორტზე გვაქვს გათვლა და ვცდილობთ სხვა ქვეყნებში გავიდეთ. ამ ეტაპზე, პარტნიორების მოძიებაში ვართ და აქტიურად ვმუშაობთ, რომ ჩინეთში გავიდეთ. ეს ყველაფერი ჩვენთვის არახალია - ღვინო უკრაინაში, რუსეთში, ბალტიის ქვეყნებში, ჰოლანდიაში გაგვქონდა. დროებითი შეჩერება კი, მსოფლიოში მიმდინარე მოვლენებმა განაპირობა - პანდემია გვქონდა, შემდეგ უკრაინაში ომი დაიწყო....ამავდროულად, ფასებს ბაზარზე დიდი ქარხნები ადგენენ, რესურსი აქვთ, რომ პროდუქტზე ფასი დააკლონ, ჩვენ კი, ანალოგიურად ვუპასუხოთ (ფასის დაწევა) გვიჭირს, ცხადია, ეს ყველაფერი რეალიზაციაზეც სარკისებური ეფექტით მოქმედებს, - განაცხადა ლაშა მინდიაშვილმა.ცნობისთვის, კახეთში, სოფელ შილდაში მდებარე მეღვინეობა „აგრიდა“ 2018 წელიდან ფუნქციონირებს.bp.ge

კახეთში არსებული ბიომეურნეობა "სამყურა" სათბურების დამატებას გეგმავს

კახეთში, სიღნაღის მუნიციპალიტეტში, კერძოდ კი, წნორში არსებული ბიო მეურნეობა „სამყურა“ ფართოვდება.როგორც კომპანიის დამფუძნებელმა ნიკა ბაგალიშვილმა "ბიზნესპარტნიორს" განუცხადა, სექტემბერში არსებულ ბიომეურნეობას  2 ან 3 სათბური დაემატება, რომლის ჯამური საინვესტიციო ღირებულება  100 000 ლარია.ნიკა ბაგალიშვილის ინფორმაციით, ჯანსაღი კვება საზოგადოებაში, უფრო და უფრო, პოპულარული ხდება. შესაბამისად, მისი პროდუქციის გაყიდვები წინა წლის ანალოგიურ პერიოდთან შედარებით, 50%-ით გაიზარდა.„სათბურების განვითარებას ვაპირებ. 2 სათბური უკვე გავაკეთე და 2, ან 3 სათბურს კიდევ დავამატებ. დასრულებულ სათბურებში ბოსტნეული უკვე მივიღე. ამჟამად, დაახლოებით 50-დან 60 სახეობამდე ბოსტნეული მაქვს. ხაზი უნდა გავუსვა, რომ ჯანსაღ პროდუქციაზე მოთხოვნა ყოველდღიურად იზრდება. შესაბამისად, მინდა, რომ მიწოდების ხარისხიც გავზარდო.მსგავსი მზარდი გაყიდვების მაჩვენებელს, საზოგადოების მხრიდან ჯანსაღ კვებაზე მოთხოვნას ვუკავშირებ. ასევე, ჩემი ბრენდის მიმართ, ცნობადობაც გაზრდილია, უკვე 7 წელია, ბიზნესი მაქვს და ეს ბევრს ნიშნავს. ამავდროულად, საქართველოში ძალიან ბევრი ფაქტი გაჟღერდა არაჯანსაღ პროდუქციის წარმოებასთან დაკავშირებით. შესაბამისად, ადამიანებს სურვილი, რომ ჯანსაღად იკვებონ კიდევ უფრო, გაუჩნდათ. ყველაზე ხშირად ჩემი ბიოპროდუქტის მიმართ დაინტერესებას მშობლები იჩენენ, იმ შემთხვევაში კი, თუ უფრო მეტი თანხის გადახდა დასჭირდებათ. მოკლედ, დამკვეთების უმრავლესობას (90%)-ს პროდუქცია ბავშვებისთვის უნდათ“, - აცხადებს ბიო მეურნეობა „სამყურა“ დამფუძნებელი.მისივე განმარტებით,  მომხმარებლების უმეტესი ნაწილი (98%) ადგილობრივია, ხოლო დანარჩენი წილი (2%) უცხოელებზე მოდის.„შეკვეთებს ადგილზე ვიღებ, ამ ეტაპზე, ონლაინ გაყიდვების მიმართულება განვითარებული არ მაქვს. ყოველ შაბათ დღეს, დილის საათებში, თბილისში ჩემს სივრცეში, რომელიც ქავთარაძის ქუჩაზე მდებარეობს ჩამოვდივარ და პოტენციურ მომხმარებლებს ჯანსაღი პროდუქტის ყიდვის შესაძლებლობას ვაძლევ.უცხოელების მიმართულებას, რაც შეეხება - მათ ძირითადად განსხვავებული პროდუქცია აინტერესებთ, მაგალითად, როგორიცაა ბამი (ბამი იმავე, ოკრა მცენარე ბალბისებრთა ოჯახიდან), მანგოლდი (შვეიცარიული ჭარხალი).კონკურენტების მიმართულებით, მინდა ვთქვა, რომ - ბევრი გვყავს... როგორც იცით, ბიო მეურნეები კიდევაც იყვნენ ბაზარზე, ახალი სახეებიც გამოჩნდა, თუმცა ჩემი კომპანია გარემოს დაცვის მიმართულებითაც მუშაობს, ზოგადად, მინდა, რომ სოფლის მეურნეობა კიდევ უფრო განვითარდეს და ამაში ჩემი წვლილი შევიტანო“, - განაცხადა ნიკა ბაგალიშვილმა.ბიო მეურნეობა „სამყურა“-ს დამფუძნებელი აღნიშნავს, რომ ქვეყანაში განვითარებული მოვლენების გამო, აგროტურიზმის მიმართულებით წელს არაფერს არ გეგმავს.ცნობისთვის, ბიო წარმოება "სამყურა“ კახეთში, სოფელ წნორში მდებარეობს და ორგანულ ხილსა და ბოსტნეულს 2018 წლიდან აწარმოებს.bp.ge 

გიორგი ხანიშვილი: საქართველო შეძლებს, 25 000-დან 30 000-ს ტონამდე მოცვი აწარმოოს

"მოცვის გაშენება კიდევ გრძელდება, რაც საშუალებას მოგვცემს, 25 000-დან 30 000-ს ტონამდე მოცვი ვაწარმოოთ, ეს კი, ფულად გამოსახულებაში $200-დან 300 მლნ-მდე იქნება", - ამის შესახებ “აგრო 1959”-ის მმართველმა პარტნიორმა, გიორგი ხანიშვილმა გადაცემა „ბიზნესპარტნიორში“ განაცხადა.მისივე ინფორმაციით, მოცვი კულტურაა, რომელიც საქართველოს არ ჰქონდა და რუკაზე უცებ გაჩნდა.„მოცვთან დაკავშირებული სიტუაცია, მიხარია... ჩემი მინისტრის მოადგილედ მუშაობის პერიოდში, ლურჯი მოცვის წახალისების პროექტით დავიწყეთ. ეს ყველაფერი ვითარდება და დღეს უკვე 7000-დან 8000-ს ტონის წარმოებაზე ვსაუბრობთ. გაშენებულია პლანტაციები, რომელიც თითქმის 2500-ს ჰექტრს მოიცავს. პროცესი კიდევ გრძელდება," - აღნიშნა ხანიშვილმა.ამასთან, “აგრო 1959”-ის მმართველი პარტნიორი აღნიშნავს, რომ სახელმწიფოს  მიერ დაფინანსებულმა პროექტებმა შედეგები მოიტანა.„ბუნებრივია აშენდება მაცივრებიც, ყველაფერი იქნება... მთავარია ამ შემთხვევაში დავიწყოთ. როდესაც 2024 წლის სტატისტიკას ვაკვირდებით, ნათლად ჩანს, თუ ამ ყველაფერმა რა შედეგები მოიტანა“, - განაცხადა ხანიშვილმა.ცნობისთვის, საქართველოში მოცვის პირველი ნერგები 2011 წელს გაჩნდა და ამ კულტურის წარმოება პროგრამის „დანერგე მომავალის“ ფარგლებში დაიწყო. პირველი კომერციული მოსავალი კი 2015 წელს მიიღეს. თავდაპირველად წარმოებული პროდუქცია ექსპორტზე თითქმის სრულად რუსულ ბაზარზე გადიოდა, შემდეგ კი უკვე ბაზრების დივერსიფიკაცია დაიწყო და ქართული მოცვი ევროკავშირის ქვეყნებშიც გაიყიდა.