21 ჭიის კვერცხისგან შექმნილი იმპერია - აბრეშუმის პროდუქცია სამკურნალო თვისებებით

"გაყიდვები მინიმუმ 20%-ით გაიზარდა" - მეღვინეობა "აგრიდა"

კახეთში, სოფელ შილდაში მდებარე მეღვინეობა „აგრიდას“ წარმოების დირექტორი, ლაშა მინდიაშვილი აცხადებს, რომ გაყიდვები წინა წლის ანალოგიურ პერიოდთან შედარებით, მინიმუმ 20%-ით გაიზარდა.მინდიაშვილის ინფორმაციით, გაყიდვების ზრდა ღვინის მაღაზიების კუთხით გაფართოებამ გამოიწვია. მისი თქმით, "აგრიდას" ღვინო ამჟამად, 30-მდე ღვინის მაღაზიაშია წარმოდგენილი.„5 წელია, რაც შიდა ბაზარზე გაყიდვები დავიწყეთ. ამჟამად, ქარხანაში 14 სახეობის ღვინოა წარმოდგენილი, ქვევრს, რაც შეეხება - 47 ქვევრი გვაქვს. ვამზადებთ, როგორც ქართული ტრადიციული, ასევე ევროპული მეთოდით. ადგილობრივ ბაზარზე, ჩვენი ღვინოები, რამდენიმე მაღაზიაშია წარმოდგენილი, მაგალითად, როგორიცაა 8 000 მოსავალი, „ალკორიუმი“ და ა.შ. მომხმარებლების დიდი ნაწილი დაახლოებით (70%) უცხოელია, უფრო მცირე ნაწილი კი (30%) ადგილობრივი. მაღაზიებში ჩვენი ღვინის ფასი 8 ლარიდან 50 ლარამდე მერყეობს.უცხოელებს ყველაზე მეტად „ტვიში“ და მშრალი „ცოლიკაური“ მოსწონთ. ქართველები კი, უპირატესობას მშრალ ღვინოებს ანიჭებენ („ქისი“, „ხიხვი“ და ა.შ.)“, - აცხადებს მეღვინეობა „აგრიდას“ წარმოების დირექტორი.ლაშა მინდიაშვილის ცნობით, კომპანია  ამ ეტაპზე, ჩინეთში ექსპორტისთვის ემზადება და უცხოური ბაზრის მონიტორინგს ახორციელებენ.„ამჟამად, ექსპორტზე გვაქვს გათვლა და ვცდილობთ სხვა ქვეყნებში გავიდეთ. ამ ეტაპზე, პარტნიორების მოძიებაში ვართ და აქტიურად ვმუშაობთ, რომ ჩინეთში გავიდეთ. ეს ყველაფერი ჩვენთვის არახალია - ღვინო უკრაინაში, რუსეთში, ბალტიის ქვეყნებში, ჰოლანდიაში გაგვქონდა. დროებითი შეჩერება კი, მსოფლიოში მიმდინარე მოვლენებმა განაპირობა - პანდემია გვქონდა, შემდეგ უკრაინაში ომი დაიწყო....ამავდროულად, ფასებს ბაზარზე დიდი ქარხნები ადგენენ, რესურსი აქვთ, რომ პროდუქტზე ფასი დააკლონ, ჩვენ კი, ანალოგიურად ვუპასუხოთ (ფასის დაწევა) გვიჭირს, ცხადია, ეს ყველაფერი რეალიზაციაზეც სარკისებური ეფექტით მოქმედებს, - განაცხადა ლაშა მინდიაშვილმა.ცნობისთვის, კახეთში, სოფელ შილდაში მდებარე მეღვინეობა „აგრიდა“ 2018 წელიდან ფუნქციონირებს.bp.ge

კახეთში არსებული ბიომეურნეობა "სამყურა" სათბურების დამატებას გეგმავს

კახეთში, სიღნაღის მუნიციპალიტეტში, კერძოდ კი, წნორში არსებული ბიო მეურნეობა „სამყურა“ ფართოვდება.როგორც კომპანიის დამფუძნებელმა ნიკა ბაგალიშვილმა "ბიზნესპარტნიორს" განუცხადა, სექტემბერში არსებულ ბიომეურნეობას  2 ან 3 სათბური დაემატება, რომლის ჯამური საინვესტიციო ღირებულება  100 000 ლარია.ნიკა ბაგალიშვილის ინფორმაციით, ჯანსაღი კვება საზოგადოებაში, უფრო და უფრო, პოპულარული ხდება. შესაბამისად, მისი პროდუქციის გაყიდვები წინა წლის ანალოგიურ პერიოდთან შედარებით, 50%-ით გაიზარდა.„სათბურების განვითარებას ვაპირებ. 2 სათბური უკვე გავაკეთე და 2, ან 3 სათბურს კიდევ დავამატებ. დასრულებულ სათბურებში ბოსტნეული უკვე მივიღე. ამჟამად, დაახლოებით 50-დან 60 სახეობამდე ბოსტნეული მაქვს. ხაზი უნდა გავუსვა, რომ ჯანსაღ პროდუქციაზე მოთხოვნა ყოველდღიურად იზრდება. შესაბამისად, მინდა, რომ მიწოდების ხარისხიც გავზარდო.მსგავსი მზარდი გაყიდვების მაჩვენებელს, საზოგადოების მხრიდან ჯანსაღ კვებაზე მოთხოვნას ვუკავშირებ. ასევე, ჩემი ბრენდის მიმართ, ცნობადობაც გაზრდილია, უკვე 7 წელია, ბიზნესი მაქვს და ეს ბევრს ნიშნავს. ამავდროულად, საქართველოში ძალიან ბევრი ფაქტი გაჟღერდა არაჯანსაღ პროდუქციის წარმოებასთან დაკავშირებით. შესაბამისად, ადამიანებს სურვილი, რომ ჯანსაღად იკვებონ კიდევ უფრო, გაუჩნდათ. ყველაზე ხშირად ჩემი ბიოპროდუქტის მიმართ დაინტერესებას მშობლები იჩენენ, იმ შემთხვევაში კი, თუ უფრო მეტი თანხის გადახდა დასჭირდებათ. მოკლედ, დამკვეთების უმრავლესობას (90%)-ს პროდუქცია ბავშვებისთვის უნდათ“, - აცხადებს ბიო მეურნეობა „სამყურა“ დამფუძნებელი.მისივე განმარტებით,  მომხმარებლების უმეტესი ნაწილი (98%) ადგილობრივია, ხოლო დანარჩენი წილი (2%) უცხოელებზე მოდის.„შეკვეთებს ადგილზე ვიღებ, ამ ეტაპზე, ონლაინ გაყიდვების მიმართულება განვითარებული არ მაქვს. ყოველ შაბათ დღეს, დილის საათებში, თბილისში ჩემს სივრცეში, რომელიც ქავთარაძის ქუჩაზე მდებარეობს ჩამოვდივარ და პოტენციურ მომხმარებლებს ჯანსაღი პროდუქტის ყიდვის შესაძლებლობას ვაძლევ.უცხოელების მიმართულებას, რაც შეეხება - მათ ძირითადად განსხვავებული პროდუქცია აინტერესებთ, მაგალითად, როგორიცაა ბამი (ბამი იმავე, ოკრა მცენარე ბალბისებრთა ოჯახიდან), მანგოლდი (შვეიცარიული ჭარხალი).კონკურენტების მიმართულებით, მინდა ვთქვა, რომ - ბევრი გვყავს... როგორც იცით, ბიო მეურნეები კიდევაც იყვნენ ბაზარზე, ახალი სახეებიც გამოჩნდა, თუმცა ჩემი კომპანია გარემოს დაცვის მიმართულებითაც მუშაობს, ზოგადად, მინდა, რომ სოფლის მეურნეობა კიდევ უფრო განვითარდეს და ამაში ჩემი წვლილი შევიტანო“, - განაცხადა ნიკა ბაგალიშვილმა.ბიო მეურნეობა „სამყურა“-ს დამფუძნებელი აღნიშნავს, რომ ქვეყანაში განვითარებული მოვლენების გამო, აგროტურიზმის მიმართულებით წელს არაფერს არ გეგმავს.ცნობისთვის, ბიო წარმოება "სამყურა“ კახეთში, სოფელ წნორში მდებარეობს და ორგანულ ხილსა და ბოსტნეულს 2018 წლიდან აწარმოებს.bp.ge 

გიორგი ხანიშვილი: საქართველო შეძლებს, 25 000-დან 30 000-ს ტონამდე მოცვი აწარმოოს

"მოცვის გაშენება კიდევ გრძელდება, რაც საშუალებას მოგვცემს, 25 000-დან 30 000-ს ტონამდე მოცვი ვაწარმოოთ, ეს კი, ფულად გამოსახულებაში $200-დან 300 მლნ-მდე იქნება", - ამის შესახებ “აგრო 1959”-ის მმართველმა პარტნიორმა, გიორგი ხანიშვილმა გადაცემა „ბიზნესპარტნიორში“ განაცხადა.მისივე ინფორმაციით, მოცვი კულტურაა, რომელიც საქართველოს არ ჰქონდა და რუკაზე უცებ გაჩნდა.„მოცვთან დაკავშირებული სიტუაცია, მიხარია... ჩემი მინისტრის მოადგილედ მუშაობის პერიოდში, ლურჯი მოცვის წახალისების პროექტით დავიწყეთ. ეს ყველაფერი ვითარდება და დღეს უკვე 7000-დან 8000-ს ტონის წარმოებაზე ვსაუბრობთ. გაშენებულია პლანტაციები, რომელიც თითქმის 2500-ს ჰექტრს მოიცავს. პროცესი კიდევ გრძელდება," - აღნიშნა ხანიშვილმა.ამასთან, “აგრო 1959”-ის მმართველი პარტნიორი აღნიშნავს, რომ სახელმწიფოს  მიერ დაფინანსებულმა პროექტებმა შედეგები მოიტანა.„ბუნებრივია აშენდება მაცივრებიც, ყველაფერი იქნება... მთავარია ამ შემთხვევაში დავიწყოთ. როდესაც 2024 წლის სტატისტიკას ვაკვირდებით, ნათლად ჩანს, თუ ამ ყველაფერმა რა შედეგები მოიტანა“, - განაცხადა ხანიშვილმა.ცნობისთვის, საქართველოში მოცვის პირველი ნერგები 2011 წელს გაჩნდა და ამ კულტურის წარმოება პროგრამის „დანერგე მომავალის“ ფარგლებში დაიწყო. პირველი კომერციული მოსავალი კი 2015 წელს მიიღეს. თავდაპირველად წარმოებული პროდუქცია ექსპორტზე თითქმის სრულად რუსულ ბაზარზე გადიოდა, შემდეგ კი უკვე ბაზრების დივერსიფიკაცია დაიწყო და ქართული მოცვი ევროკავშირის ქვეყნებშიც გაიყიდა.

ვახტანგ ბეჟიტაშვილი: მაღალი საფასო სეგმენტის ბაზარზე გასასვლელად ხარისხი და მოცულობა ხელს არ გვიწყობს

"ხილისა და ბოსტნეულის ასოციაციის" პრეზიდენტის ვახტანგ ბეჟიტაშვილის განცხადებით, ნებისმიერი ბიზნესის სურვილია, მაღალი საფასო სეგმენტის ბაზარზე მოხდეს რაც შეიძლება მეტი პროდუქციის რეალიზება.თუმცა, ვახტანგ ბეჟიტაშვილი აქვე ამბობს, რომ ეს მარტივი არ არის."პროდუქციის ხარისხი და მოცულობები არ გვიწყობს ხელს, რომ მაღალი სეგმენტის ბაზარზე გავიდეთ. როდესაც იქ შედიხარ, მათ სჭირდებათ სტაბილური მიწოდება. ჩვენ პროდუქციის ის რაოდენობა არ გაგვაჩნია, რომ მათ გრძელვადიანი კონტრაქტები დავუდოთ, არც შესაბამისი შესანახი სისტემები და სამაცივრე მეურნეობები არსებობს იმ რაოდენობით, რომელიც ამ სიტუაციას სჭირდება, თუმცა ეს ყველაფერი თანდათან კეთდება და გარკვეულ დონემდეც მისულები ვართ", - განაცხადა ვახტანგ ბეჟიტაშვილმა "ბიზნესპარტნიორის" ღამის ეთერში. bp.ge 

ადგილობრივ ბაზარზე ახალი ბიოღვინო - "ნაჟური" გამოჩნდა

ადგილობრივ ბაზარზე ახალი ბიოღვინო - "ნაჟური" გამოჩნდა, რომელსაც საოჯახო მარანი "უსახელო" აწარმოებს. საოჯახო მარნის დამფუძნებელმა, გოგი კუპატაძემ "ბიზნესპარტნიორთან" განაცხადა, ღვინო "ნაჟური" ლეჩხუმში, სოფელ უსახელოში იწარმოება.მისივე ინფორმაციით, ღვინო ბაზარზე რამდენიმე თვის წინ გამოჩნდა და პრემიუმ კატეგორიის ადგილი დაიკავა."ჩვენს მეურნეობაში, რომელიც 7000 კვ.მ-ზეა გაშენებული, სასუქები და პესტიციდები არ გამოიყენება. ყველაფერს, რაც ვაზს სჭირდება ლეჩხუმის მიწა აძლევს. ბიოდინამიური წესით დაყენებული ღვინო პრემიუმ კატეგორიაში გადის და ვფიქრობთ, რომ მოთხოვნა ცნობადობის ზრდის პარალელურად გაიზრდება. ამჟამად, 2 დასახელების ღვინო გვაქვს. მათ შორის, არის ცოლიკაური და ხვანჭკარა. 1 ბოთლის ღირებულება ამ ეტაპზე 47 ლარია", - აცხადებს გოგი კუპატაძე."ნაჟური" ამ ეტაპზე ადგილობრივ ბაზარზე, ღვინის მაღაზიებში იყიდება. მარანი სამომავლოდ ადგილობრივი ბაზრის ათვისებასა და გრძელვადიან პერიოდში საექსპორტო ბაზრების ათვისებასაც გეგმავს.გოგი კუპატაძის თქმით, მარნის ტერიტორიაზე, სადაც ვენახია გაშენებული ვიზიტორებს დაინტერესების შემთხვევაში შეუძლიათ ღვინის დეგუსტაცია და ასევე, შეძენა.ცნობისთვის, საოჯახო მარანი "უსახელო" ლეჩხუმში, სოფელ უსახელოში მდებარეობს. მარნის დამფუძნებელმა ვენახი რამდენიმე წლის წინ გააშენა. ღვინის გარდა, გოგი კაპანაძეს ვაზის ჯიშები გამოყავს, ყიდის და აღნიშნავს, რომ აღნიშნული მიმართულებით მოთხოვნა მზარდია. bp.ge