"ისრაელის ბაზარზე პროდუქციის გატანა დავაპაუზეთ" - "ჩირჩხელა"

"ისრაელის ბაზარზე პროდუქციის გატანა დავაპაუზეთ" - "ჩირჩხელა"

უკვე ხელშეკრულების მეორე ეტაპზე ვიყავით გადასული, თუმცა, ირან-ისრაელის ომის გამო, პროდუქციის გატანა ისრაელის ბაზარზე დავაპაუზეთ, - ამის შესახებ  "ჩირჩხელას" აღმასრულებელმა დირექტორმა, ირმა კვაჭანტირაძემ "ბიზნესპარტნიორთან" განაცხადა.მისივე ინფორმაციით, ამ ეტაპზე კომპანია გერმანიის ბაზარზე გასასვლელად იმუშავებს და ისრაელის შემთხვევაში, მოვლენების დასტაბილურებას დაელოდება."პარტნიორებიც თავს იკავებენ ამ ეტაპზე და ველოდებით როგორ განვითარდება მოვლენები. რაც შეეხება გერმანიას - აღნიშნულ ბაზარზე წარმატებით გავიარეთ პირველი ეტაპი და სავარაუდოდ, მიმდინარე წელს გერმანიაში პირველ ექსპორტს განვახორციელებთ. ამ ეტაპზე 3 დასახელების ჩირი გავა, ხოლო შემდეგ შესაძლებელია ასორტიმენტი გაიზარდოს. სხვა ბაზრების მოძიებაზე არ ვმუშაობთ და სრულად გერმანიის ბაზარზე ვართ კონცენტრირებული", - აცხადებს ირმა კვაჭანტირაძე.მისივე ინფორმაციით,  ადგილობრივ ბაზარზე "ჩირჩხელას" პროდუქციაზე წინა წლის ანალოგიურ პერიოდთან მკვეთრად შეცვლილი არ არის. ცნობისთვის, "ჩირჩხელა" ოჯახური ბიზნესია, რომელიც ბაზარზე 7 წელია ოპერირებს და თბილისში (ვაკე) ერთ მაღაზიას ფლობს. გარდა ამისა, "ჩირჩხელა" ექსპორტზე საბერძნეთსა და ჩეხეთში გადის.კომპანია მომხმარებელს სხვადასხვა სახის ქართული ნუგბარის ნაირსახეობასა და პასკების ასორტიმენტს სთავაზობს.შეგახსენებთ, რომ ისრაელი და ირანი მეექვსე დღეა ერთმანეთის ტერიტორიების წინააღმდეგ დარტყმებს ახორციელებენ. დარტყმები ისრაელში 30 ადგილზე განხორციელდა, შეიარაღებული დაპირისპირების დაწყებიდან ირანმა ისრაელის მიმართულებით 370 ბალისტიკური რაკეტა ისროლა.bp.ge 

"უცხოეთში ქართული არტიზანული ხასიათის ღვინო ძალიან მოსწონთ" - ექიმის ბიო მარანი

უცხოეთში ქართული ღვინის პოპულარიზაცია სულ უფრო იზრდება. როგორც "ბიზნესპარტნიორთან" გურჯაანის მუნიციპალიტეტში, სოფელ ჩუმლაყში მდებარე, ექიმის ბიო მარნის დამფუძნებელი, მარინა კაკიაშვილი რუაძე აღნიშნავს, დანიის სამეფოს დედაქალაქ კოპენჰაგენში გამართულ გამოფენაში - RAW Wine Copenhagen მონაწილეობა ქართული საოჯახო მარნებისთვის დიდი გამოცდილება იყო.მარინა კაკიაშვილის ინფორმაციით, უცხოელების მხრიდან გარკვეული სახის ტენდენცია შეიმჩნევა, კერძოდ, მცირე მარნების შემთხვევაში, განსაკუთრებული ყურადღება ქართულ, არტიზანული ხასიათის ღვინოს ეთმობა."ქართული ღვინო უცხოურ ბაზარზე დღითი დღე მოთხოვნადი ხდება და ღვინის ეროვნული სააგენტოს წვლილი ამ მიმართულებით ძალიან დიდია. მე ბუნებრივი ღვინის ასოციაციის წევრი გახლავართ და მხოლოდ ამ ასოციაციის წევრებს, გამოფენაზე მონაწილეობის მიღება შეგვეძლო. გამოფენა მსოფლიოს სხვადასხვა, ქვეყნებში იმართება, პირადად მე მონაწილეობა მიღებული მაქვს: კოპენჰაგენში, ბერლინში, პარიზში, ტოკიოში. მინდა გითხრათ, რომ დანიაში ქართულმა ღვინომ და კონკრეტულად ჩვენმა პროდუქტმა დიდი დაინტერესება გამოიწვია", - აღნიშნავს მარნის დამფუძნებელი.მარინა კაკიაშვილმა "ბიზნესპარტნიორთან" მსგავს გამოფენებში მონაწილეობის მნიშვნელობაზეც ისაუბრა და აღნიშნა, რომ ქართული მარნის წარმომადგენლებისთვის უცხოეთში გასვლითი ვიზიტები ძალიან აქტუალურია, რადგან პოტენციურ პარტნიორების შეძენის შესაძლებლობა ჩნდება."პოტენციურ პარტნიორებს შევხვდით, ჩვენი ღვინო დააგემოვნეს, საკონტაქტო გავცვალეთ და გარკვეული პროცესები დაიწყო. ვნახოთ, მომავალში მოვლენები, როგორ განვითარდება. ზოგადად, მსგავს ღონისძიებებში მონაწილეობა განსაკუთრებით ქართული ღვინის პოპულარიზაციისთვის ძალიან მნიშვნელოვანია. რაც მეტია მარკეტინგული ჩართულობა მით უკეთესია - ცნობადობის გაზრდა ეს ძალიან მნიშვნელოვანია! უცხოეთში ყველანაირ ღვინოს თავისი მომხმარებელი ჰყავს. მცირე მარნების შემთხვევაში - ნიშურ, არტიზანულ ღვინოს ძალიან დიდი მნიშვნელობა აქვს.გამოწვევებს რაც შეეხება, ვფიქრობ, განსაკუთრებით ხელშეწყობა მცირე მარნებს სჭირდება. ძალიან კარგი საკონსულტაციო სერვისებია, მაგრამ უშუალოდ სხვადასხვა, აღჭურვის გრანტები, პროექტები, რომ იყოს ძალიან კარგი იქნებოდა", - აღნიშნავს მარინა კაკიაშვილი რუაძე.ცნობისთვის, ღვინის ეროვნული სააგენტოს მხარდაჭერით, ღვინის  მწარმოებელი ექვსი საოჯახო მარანი დანიის სამეფოს დედაქალაქ კოპენჰაგენში გამართულ გამოფენა RAW Wine Copenhagen-ში მონაწილეობდა.გამოფენაზე RAW Wine  (The Artisan Wine Fair) მაღალი ხარისხის ბუნებრივი, ორგანული და ბიოდინამიკური ღვინოების მწარმოებლები იკრიბებიან. გამოფენის ორგანიზატორია ცნობილი ღვინის მაგისტრი საფრანგეთიდან იზაბელ ლეგერონი.bp.ge 

"პორტუგალიიდან ღვინოზე მოთხოვნა ყოველწლიურად იზრდება" - LisiWine-Meskhishvili Winery

პორტუგალიიდან ღვინოზე მოთხოვნა ყოველწლიურად იზრდება. ჩვენ პორტუგალიაში გვყავს ამბასადორ-წარმომადგენელი, რომელიც აღნიშნულ ბაზარზე ჩვენი ღვინის პოპულარიზაციას ახორციელებს, - ამის შესახებ თბილისთან მდებარე LisiWine-Meskhishvili Winery-ის დამფუძნებელმა ილია მესხიშვილმა "ბიზნესპარტნიორთან" განაცხადა.მისივე ინფორმაციით, LisiWine-Meskhishvili Winery-ის ღვინო პორტუგალიის ბაზარზე ნელ-ნელა იხვეჭს სახელს და საერთო ჯამში, მათ ღვინოზე მოთხოვნა, წინა წლის ანალოგიურ პერიოდთან შედარებით, 20-30%-ით გაზრდილია, რაც ცნობადობის ზრდას უკავშირდება.ილია მესხიშვილის განცხადებით, არსებული საექსპორტო ბაზრების გარდა, მეღვინეობა ამერიკის ბაზარზე გასასვლელად ემზადება."LisiWine-Meskhishvili Winery ბაზარზე 5 წლის წინ გამოჩნდა. მეღვინეობის მიერ წარმოებული ღვინო საქართველოშიც იყიდება და ექსპორტზეც. კერძოდ, ამ ეტაპზე ჩვენი ღვინო პორტუგალიის, გერმანიისა და ავსტრალიის ბაზარზე იყიდება. გარდა ამისა, აქტიურად მიმდინარეობს მოლაპარაკებები ამერიკის ბაზართან და ვფიქრობ, რომ მოლაპარაკებების პროცესი წარმატებით ჩაივლის. აღსანიშნავია, რომ ლოგისტიკა საკმაოდ რთულია", - აცხადებს ილია მესხიშვილი. მისივე თქმით, მეღვინეობას 7 დასახელების ღვინო აქვს, მათ შორის ქვევრისა და კლასიკურად წარმოებული. ძირითადად, მშრალი ღვინოებია. რაც შეეხება ვენახებს - კომპანიას კახეთში 40 წლის ვენახი აქვს, რომელიც კარგი მოსავლით გამოირჩევა. როგორც ილია მესხიშვილი აღნიშნავს, როდესაც მოსავალი ხარისხიანია, ეს ღვინოზეც აისახება.ღვინის წარმოების გარდა, როგორც ილია მესხიშვილი აცხადებს კომპანია ტურისტულ ობიექტს ფლობს, სადაც გაერთიანებულია როგორც ღვინის მარანი, ისე სარესტორნო და რეკრეაციული ზონა, სადაც მომხმარებლებს ქართული ტრადიციული კერძების დაგემოვნება და ღვინის წარმოების გაცნობის შესაძლებლობა აქვთ."LisiWine-Meskhishvili Winery-ში თავდაპირველად, მხოლოდ კორპორატიულ ღონისძიებებს ვმასპინძლობდით, თუმცა დაახლოებით, 2 თვეა, რაც სტუმრების ყოველდღიურ რეჟიმში მიღებაზე გადავედით. ახლა უკვე ნებისმიერ მსურველს შეუძლია ამოსვლა და ჩვენი სერვისებით სარგებლობა. ძალიან დიდი მოთხოვნა იყო ხალხის მხრიდან, რომ ყოველდღიურ რეჟიმზე გადავსულიყავით. ჩვენი სივრცე მოიცავს ღვინის მარანს და წარმოებას, სარესტორნე სივრცეს, დაახლოებით, 200 წლის ოდა სახლი, რომელიც იმერეთიდან გადმოვიტანეთ და ასევე, გვაქვს დიდ  ღონისძიებებზე გათვლილი დარბაზი, სადაც ნათლობა, ქორწილები და მსგავსი ტიპის წვეულებები იმართება. ჩვენ გვინდოდა ერთ სივრცეში ყოფილიყო ყველა ის ელემენტი, რომელიც საქართველოსთვის მნიშვნელოვანია და უფრო მეტად გაგვეცნო ჩვენი კულტურა არა მხოლოდ ტურისტებისთვის, არამედ ქართველებისთვისაც", - აცხადებს ილია მესხიშვილი.მისივე თქმით, მათი მომხმარებლები არიან როგორც ქართველები, ისე უცხოელები.„ჩვენი სტუმრები იყვნენ ბრიტანელები, სამხრეთ კორეის წარმომადგენლები, ჩინელები, ამერიკელები და მათი პროცენტული წილი ამჟამად დაახლოებით, 30%-ს შეადგენს. გვინდა, რომ აღნიშნული მიმართულება უფრო მეტად გავაძლიეროთ და ჩვენი ცნობადობა გავზარდოთ,“ - აღნიშნა მეღვინეობის დამფუძნებელმა.bp.ge 

"ქარვისფერი ღვინის მოხმარება თანამედროვე ტენდენციად ყალიბდება" - მარანი "ჩუბინი"

ტურისტებს ქვევრის ქარვისფერი ღვინო განსაკუთრებით მოსწონთ. ღვინის  აღნიშნული  სახეობის მოხმარება თანამედროვე ტენდენციად ყალიბდება. როგორც "ბიზნესპარტნიორთან" კახეთში, სოფელ შილდაში მდებარე მარან "ჩუბინის" დამფუძნებელი, თორნიკე ჩუბინიძე აღნიშნავს, უცხოეთში ქართული ღვინის პოპულარიზაცია კიდევ უფრო მაღალ ნიშნულზე უნდა ავიდეს.თორნიკე ჩუბინიძის ინფორმაციით, ამჟამად, ექსპორტის კუთხით კომპანიის ყველაზე აქტიური ქვეყანა აშშ-ია. მისივე ცნობით, აშშ-ში გასული წლის ანალოგიურ პერიოდთან შედარებით, გაყიდვები დაახლოებით, 20%-ით გაიზარდა."ექსპორტზე აშშ-ში გავდივართ, ასევე საფრანგეთს, ბელგიას, დანიას, სინგაპურს, ჩინეთს და იაპონიას მოვიცავთ. ყველაზე დიდი საექსპორტო ბაზარი აშშ-ში გვაქვს, იქ დაახლოებით - 5 000 ბოთლ ღვინოს ვყიდით. კონკურენცია ძალიან დიდია, მოგეხსენებათ აშშ-ში დიდი ბაზარია და მთავარი გამოწვევა - ქართული ღვინის ცნობადობის გაზრდაა. მიუხედავად ამისა, ტენდენცია მზარდია... გერმანიის, ჰოლანდიის და დიდი ბრიტანეთის მიმართულებით საექსპორტო ბაზრის გაზრდა გვინდა. ამ ეტაპზე, გერმანიის და ჰოლანდიის შემთხვევაში პოტენციურ პარტნიორებთან მოლაპარაკებებს ვაწარმოებთ და დიდი ბრიტანეთის მიმართულებით პარტნიორების მოძიების პროცესში ვართ. ჩვენმა უცხოელმა კომპანიონებმა ქართული ღვინო მოიწონეს, ღვინის ხარისხი კარგია, თუმცა მთავარი გამოწვევა, ისევ და ისევ, ცნობადობის გაზრდაა", - აღნიშნავს თორნიკე ჩუბინიძე.მარნის დამფუძნებელმა ადგილობრივ და უცხოელ მომხმარებლებზეც ისაუბრა და აღნიშნა, რომ ღვინის დიდ ნაწილს 90%-ს უცხოელები ყიდულობენ, დანარჩენი 10% კი, ადგილობრივ მოსახლეობაზე მოდის."ვენახი საკუთარიც გვაქვს და ადგილობრივი მევენახეებისგანაც ვყიდულობთ, გასული წლის ანალოგიურ პერიოდთან შედარებით, გაყიდვები იმავე ნიშნულზეა. წელიწადში 10 000 ბოთლს ვაწარმოებთ. ვამზადებთ მხოლოდ ქვევრის 4 დასახელების ღვინოს ესენია: საფერავი, ქისი, მწვანე და რქაწითელი. მომხმარებელს ღვინის შეძენა ადგილზე შეუძლიათ. ასევე გვაქვს ღვინის ტურები, რაც ტურისტებისთვის ძალიან საინტერესოა. ადგილობრივ ბაზარზე წარმოდგენილი, ამ ეტაპზე არ ვარ, თუმცა სამომავლოდ ვაპირებ.ერთი სახის ტენდენცია შევამჩნიე, სტუმრებს განსაკუთრებით ქვევრის, ქარვისფერი ღვინო მოსწონს, თავისი გემოვნური თვისებებიდან გამომდინარე. ვიზიტორები ძირითადად ევროკავშირის ქვეყნებიდან გვყავს: გერმანიიდან, ჰოლანდიიდან, ავსტრიიდან და ა.შ. წარმადობის გაზრდას რაც შეეხება, არ გამოვრიცხავ, ეტაპობრივად ვაპირებ", - აღნიშნავს თორნიკე ჩუბინიძე.ცნობისთვის, საოჯახო ტიპის მარანი "ჩუბინი", ყვარელში სოფელ შილდაში მდებარეობს. ვენახი 1 ჰექტარს მოიცავსbp.ge 

ქართული ჩაის მწარმოებელი კომპანია "გრინგოლდი" ასორტიმენტს აფართოებს

ქართული ჩაის მწარმოებელი კომპანია "გრინგოლდი" ასორტიმენტის გაფართოებას აპირებს. როგორც კომპანიის ერთ-ერთი დამფუძნებელი, წარმოების ხელმძღვანელი, ნიკა სიორიძე "ბიზნესპარტნიორთან" აღნიშნავს, პოტენციური მომხმარებლების მოსაზიდად, ექსპერიმენტების ჩატარება და სიახლეების შეთავაზება აუცილებელია.ნიკა სიორიძის ინფორმაციით, კომპანია საწყის ეტაპზე ჩაის  რამდენიმე სახეობის დამატებას გეგმავს. მათ შორისაა,უჰაერო, ფერმენტირებული GABA ჩაი (GABA ჩაი კარგია ნაბახუსევზე, ხსნის ალკოჰოლური ინტოქსიკაციის მტკივნეულ სიმპტომებს)."ჩაის პლანტაციები გვაქვს, თუმცა ნედლეულს ადგილობრივი ფერმერებისგანაც ვყიდულობთ.  ჩვენი პლანტაციები 29 ჰექტარს მოიცავს. ამჟამად, 20 სახის ჩაის ვაწარმოებთ. მინდა გითხრათ, რომ ჩვენი ექსკლუზიური პარტნიორია კომპანია La Familia და პროდუქტი მათი ბრენდის ქვეშ იყიდება. წარმოდგენილი ქსელურ მარკეტებშიც ვართ: "სპარში", "ორ ნაბიჯში", "დეილიში", "გუდვილში" და ა.შ.ასორტიმენტის გაზრდას ვაპირებთ, დღესაც სამუშაო პროცესი გვაქვს, ყოველთვის ექსპერიმენტების ჩატარებას ვცდილობთ, რომ მომხმარებლებს სიახლეები შევთავაზოთ. ქართული ჩაი, ჯერჯერობით, ფართო საზოგადოებისთვის უცნობია. ძველი, ტრადიციული ჩაით, რაც ადრე იწარმოებოდა ბაზარზე თავის დამკვიდრება რთულია. მუდმივად ვცდილობთ, რომ ასორტიმენტი გავზარდოთ. ამ ეტაპზე, ახალი GABA ჩაის გაკეთება გვინდა, აღნიშნული პროდუქტი უჰაერო ფერმენტირებული სახისაა. ასევე, შავი ჩაის დამატება გვინდა, ცხადია, სხვა გემოვნური თვისებებით, რომ გამოირჩეოდეს, საინტერესოა მწვანე ჩაი ციტრუსის - ე.წ. დეტოქსი და შავი ჩაი ბერგამოტის არომატით. აღნიშნული პროდუქტის შეფუთვა რამდენიმე თვეში დაიწყება და კომპანია La Familia-ს ბრენდის ქვეშ გაიყიდება. შემდეგ ისევ გავაგრძელებთ, თუ არა ახალი ჩაის წარმოებას, ეს  მომხმარებელზეა დამოკიდებული ", - აცხადებს ნიკა სიორიძე.ქართული ჩაის მწარმოებელი კომპანიის ერთ-ერთმა დამფუძნებელმა, ასევე იმპორტირებულ საქონელზეც ისაუბრა და აღნიშნა, რომ ადგილობრივ ბაზარზე ჩაის იმპორტი დიდია, კონკურენციის გაწევა კი, რთული."ჩემი აზრით, იმპორტირებული ჩაი არ მოწმდება. როგორც იცით, აღნიშნული პროდუქტი ჯანმრთელობისთვის საზიანო არ არის, მაგრამ როდესაც  საღებავებით გაჯერებულ ჩაის მოიხმარ, ორგანიზმზე შესაბამისად, მოქმედებს. კარგი იქნება, თუ იმპორტირებული ჩაი შემოწმდება. კონკურენციასთან პრობლემა არ გვაქვს, მაგრამ ლაბორატორიული შემოწმება უნდა დაიწყოს", - აღნიშნავს წარმოების ხელმძღვანელი.ნიკა სიორიძემ "ბიზნესპარტნიორთან" გაყიდვების ტენდენციებზეც ისაუბრა და აღნიშნა, რომ წინა წელთან შედარებით, გაყიდვების მაჩვენებელი 15-დან 20%-მდეა გაზრდილი."პროდუქტის 30% ადგილობრივ ბაზარზე იყიდება, დიდი ნაწილი კი, 70% უცხოეთში გადის. ფასს რაც შეეხება,  სეზონზე წლიდან წლამდე 10 ტონა ჩაი იყიდება. ამასთან, როდესაც სეზონია, დასაქმებული 50-დან 60 ადამიანი გვყავს. მნიშვნელოვანია, რომ ყოველ წელს დაახლოებით, 15-20%-ით ვიზრდებით და კლიენტები გვემატება", - აღნიშნავს ნიკა სიორიძე.ცნობისთვის, ქართული ჩაის მწარმოებელი კომპანიის "გრინგოლდი"-ს პლანტაციები ოზურგეთის მუნიციპალიტეტ სოფელ ნაგომარში მდებარეობს. ამასთან, ჩაის პლანტაციები 29 ჰექტარს მოიცავს.bp.ge