საქართველოში მოხმარებული ხორცისა და რძის პროდუქტების მნიშვნელოვანი წილი, 50%-ზე მეტი იმპორტირებულია

"პორტუგალიიდან ღვინოზე მოთხოვნა ყოველწლიურად იზრდება" - LisiWine-Meskhishvili Winery

პორტუგალიიდან ღვინოზე მოთხოვნა ყოველწლიურად იზრდება. ჩვენ პორტუგალიაში გვყავს ამბასადორ-წარმომადგენელი, რომელიც აღნიშნულ ბაზარზე ჩვენი ღვინის პოპულარიზაციას ახორციელებს, - ამის შესახებ თბილისთან მდებარე LisiWine-Meskhishvili Winery-ის დამფუძნებელმა ილია მესხიშვილმა "ბიზნესპარტნიორთან" განაცხადა.მისივე ინფორმაციით, LisiWine-Meskhishvili Winery-ის ღვინო პორტუგალიის ბაზარზე ნელ-ნელა იხვეჭს სახელს და საერთო ჯამში, მათ ღვინოზე მოთხოვნა, წინა წლის ანალოგიურ პერიოდთან შედარებით, 20-30%-ით გაზრდილია, რაც ცნობადობის ზრდას უკავშირდება.ილია მესხიშვილის განცხადებით, არსებული საექსპორტო ბაზრების გარდა, მეღვინეობა ამერიკის ბაზარზე გასასვლელად ემზადება."LisiWine-Meskhishvili Winery ბაზარზე 5 წლის წინ გამოჩნდა. მეღვინეობის მიერ წარმოებული ღვინო საქართველოშიც იყიდება და ექსპორტზეც. კერძოდ, ამ ეტაპზე ჩვენი ღვინო პორტუგალიის, გერმანიისა და ავსტრალიის ბაზარზე იყიდება. გარდა ამისა, აქტიურად მიმდინარეობს მოლაპარაკებები ამერიკის ბაზართან და ვფიქრობ, რომ მოლაპარაკებების პროცესი წარმატებით ჩაივლის. აღსანიშნავია, რომ ლოგისტიკა საკმაოდ რთულია", - აცხადებს ილია მესხიშვილი. მისივე თქმით, მეღვინეობას 7 დასახელების ღვინო აქვს, მათ შორის ქვევრისა და კლასიკურად წარმოებული. ძირითადად, მშრალი ღვინოებია. რაც შეეხება ვენახებს - კომპანიას კახეთში 40 წლის ვენახი აქვს, რომელიც კარგი მოსავლით გამოირჩევა. როგორც ილია მესხიშვილი აღნიშნავს, როდესაც მოსავალი ხარისხიანია, ეს ღვინოზეც აისახება.ღვინის წარმოების გარდა, როგორც ილია მესხიშვილი აცხადებს კომპანია ტურისტულ ობიექტს ფლობს, სადაც გაერთიანებულია როგორც ღვინის მარანი, ისე სარესტორნო და რეკრეაციული ზონა, სადაც მომხმარებლებს ქართული ტრადიციული კერძების დაგემოვნება და ღვინის წარმოების გაცნობის შესაძლებლობა აქვთ."LisiWine-Meskhishvili Winery-ში თავდაპირველად, მხოლოდ კორპორატიულ ღონისძიებებს ვმასპინძლობდით, თუმცა დაახლოებით, 2 თვეა, რაც სტუმრების ყოველდღიურ რეჟიმში მიღებაზე გადავედით. ახლა უკვე ნებისმიერ მსურველს შეუძლია ამოსვლა და ჩვენი სერვისებით სარგებლობა. ძალიან დიდი მოთხოვნა იყო ხალხის მხრიდან, რომ ყოველდღიურ რეჟიმზე გადავსულიყავით. ჩვენი სივრცე მოიცავს ღვინის მარანს და წარმოებას, სარესტორნე სივრცეს, დაახლოებით, 200 წლის ოდა სახლი, რომელიც იმერეთიდან გადმოვიტანეთ და ასევე, გვაქვს დიდ  ღონისძიებებზე გათვლილი დარბაზი, სადაც ნათლობა, ქორწილები და მსგავსი ტიპის წვეულებები იმართება. ჩვენ გვინდოდა ერთ სივრცეში ყოფილიყო ყველა ის ელემენტი, რომელიც საქართველოსთვის მნიშვნელოვანია და უფრო მეტად გაგვეცნო ჩვენი კულტურა არა მხოლოდ ტურისტებისთვის, არამედ ქართველებისთვისაც", - აცხადებს ილია მესხიშვილი.მისივე თქმით, მათი მომხმარებლები არიან როგორც ქართველები, ისე უცხოელები.„ჩვენი სტუმრები იყვნენ ბრიტანელები, სამხრეთ კორეის წარმომადგენლები, ჩინელები, ამერიკელები და მათი პროცენტული წილი ამჟამად დაახლოებით, 30%-ს შეადგენს. გვინდა, რომ აღნიშნული მიმართულება უფრო მეტად გავაძლიეროთ და ჩვენი ცნობადობა გავზარდოთ,“ - აღნიშნა მეღვინეობის დამფუძნებელმა.bp.ge 

"ქარვისფერი ღვინის მოხმარება თანამედროვე ტენდენციად ყალიბდება" - მარანი "ჩუბინი"

ტურისტებს ქვევრის ქარვისფერი ღვინო განსაკუთრებით მოსწონთ. ღვინის  აღნიშნული  სახეობის მოხმარება თანამედროვე ტენდენციად ყალიბდება. როგორც "ბიზნესპარტნიორთან" კახეთში, სოფელ შილდაში მდებარე მარან "ჩუბინის" დამფუძნებელი, თორნიკე ჩუბინიძე აღნიშნავს, უცხოეთში ქართული ღვინის პოპულარიზაცია კიდევ უფრო მაღალ ნიშნულზე უნდა ავიდეს.თორნიკე ჩუბინიძის ინფორმაციით, ამჟამად, ექსპორტის კუთხით კომპანიის ყველაზე აქტიური ქვეყანა აშშ-ია. მისივე ცნობით, აშშ-ში გასული წლის ანალოგიურ პერიოდთან შედარებით, გაყიდვები დაახლოებით, 20%-ით გაიზარდა."ექსპორტზე აშშ-ში გავდივართ, ასევე საფრანგეთს, ბელგიას, დანიას, სინგაპურს, ჩინეთს და იაპონიას მოვიცავთ. ყველაზე დიდი საექსპორტო ბაზარი აშშ-ში გვაქვს, იქ დაახლოებით - 5 000 ბოთლ ღვინოს ვყიდით. კონკურენცია ძალიან დიდია, მოგეხსენებათ აშშ-ში დიდი ბაზარია და მთავარი გამოწვევა - ქართული ღვინის ცნობადობის გაზრდაა. მიუხედავად ამისა, ტენდენცია მზარდია... გერმანიის, ჰოლანდიის და დიდი ბრიტანეთის მიმართულებით საექსპორტო ბაზრის გაზრდა გვინდა. ამ ეტაპზე, გერმანიის და ჰოლანდიის შემთხვევაში პოტენციურ პარტნიორებთან მოლაპარაკებებს ვაწარმოებთ და დიდი ბრიტანეთის მიმართულებით პარტნიორების მოძიების პროცესში ვართ. ჩვენმა უცხოელმა კომპანიონებმა ქართული ღვინო მოიწონეს, ღვინის ხარისხი კარგია, თუმცა მთავარი გამოწვევა, ისევ და ისევ, ცნობადობის გაზრდაა", - აღნიშნავს თორნიკე ჩუბინიძე.მარნის დამფუძნებელმა ადგილობრივ და უცხოელ მომხმარებლებზეც ისაუბრა და აღნიშნა, რომ ღვინის დიდ ნაწილს 90%-ს უცხოელები ყიდულობენ, დანარჩენი 10% კი, ადგილობრივ მოსახლეობაზე მოდის."ვენახი საკუთარიც გვაქვს და ადგილობრივი მევენახეებისგანაც ვყიდულობთ, გასული წლის ანალოგიურ პერიოდთან შედარებით, გაყიდვები იმავე ნიშნულზეა. წელიწადში 10 000 ბოთლს ვაწარმოებთ. ვამზადებთ მხოლოდ ქვევრის 4 დასახელების ღვინოს ესენია: საფერავი, ქისი, მწვანე და რქაწითელი. მომხმარებელს ღვინის შეძენა ადგილზე შეუძლიათ. ასევე გვაქვს ღვინის ტურები, რაც ტურისტებისთვის ძალიან საინტერესოა. ადგილობრივ ბაზარზე წარმოდგენილი, ამ ეტაპზე არ ვარ, თუმცა სამომავლოდ ვაპირებ.ერთი სახის ტენდენცია შევამჩნიე, სტუმრებს განსაკუთრებით ქვევრის, ქარვისფერი ღვინო მოსწონს, თავისი გემოვნური თვისებებიდან გამომდინარე. ვიზიტორები ძირითადად ევროკავშირის ქვეყნებიდან გვყავს: გერმანიიდან, ჰოლანდიიდან, ავსტრიიდან და ა.შ. წარმადობის გაზრდას რაც შეეხება, არ გამოვრიცხავ, ეტაპობრივად ვაპირებ", - აღნიშნავს თორნიკე ჩუბინიძე.ცნობისთვის, საოჯახო ტიპის მარანი "ჩუბინი", ყვარელში სოფელ შილდაში მდებარეობს. ვენახი 1 ჰექტარს მოიცავსbp.ge 

ქართული ჩაის მწარმოებელი კომპანია "გრინგოლდი" ასორტიმენტს აფართოებს

ქართული ჩაის მწარმოებელი კომპანია "გრინგოლდი" ასორტიმენტის გაფართოებას აპირებს. როგორც კომპანიის ერთ-ერთი დამფუძნებელი, წარმოების ხელმძღვანელი, ნიკა სიორიძე "ბიზნესპარტნიორთან" აღნიშნავს, პოტენციური მომხმარებლების მოსაზიდად, ექსპერიმენტების ჩატარება და სიახლეების შეთავაზება აუცილებელია.ნიკა სიორიძის ინფორმაციით, კომპანია საწყის ეტაპზე ჩაის  რამდენიმე სახეობის დამატებას გეგმავს. მათ შორისაა,უჰაერო, ფერმენტირებული GABA ჩაი (GABA ჩაი კარგია ნაბახუსევზე, ხსნის ალკოჰოლური ინტოქსიკაციის მტკივნეულ სიმპტომებს)."ჩაის პლანტაციები გვაქვს, თუმცა ნედლეულს ადგილობრივი ფერმერებისგანაც ვყიდულობთ.  ჩვენი პლანტაციები 29 ჰექტარს მოიცავს. ამჟამად, 20 სახის ჩაის ვაწარმოებთ. მინდა გითხრათ, რომ ჩვენი ექსკლუზიური პარტნიორია კომპანია La Familia და პროდუქტი მათი ბრენდის ქვეშ იყიდება. წარმოდგენილი ქსელურ მარკეტებშიც ვართ: "სპარში", "ორ ნაბიჯში", "დეილიში", "გუდვილში" და ა.შ.ასორტიმენტის გაზრდას ვაპირებთ, დღესაც სამუშაო პროცესი გვაქვს, ყოველთვის ექსპერიმენტების ჩატარებას ვცდილობთ, რომ მომხმარებლებს სიახლეები შევთავაზოთ. ქართული ჩაი, ჯერჯერობით, ფართო საზოგადოებისთვის უცნობია. ძველი, ტრადიციული ჩაით, რაც ადრე იწარმოებოდა ბაზარზე თავის დამკვიდრება რთულია. მუდმივად ვცდილობთ, რომ ასორტიმენტი გავზარდოთ. ამ ეტაპზე, ახალი GABA ჩაის გაკეთება გვინდა, აღნიშნული პროდუქტი უჰაერო ფერმენტირებული სახისაა. ასევე, შავი ჩაის დამატება გვინდა, ცხადია, სხვა გემოვნური თვისებებით, რომ გამოირჩეოდეს, საინტერესოა მწვანე ჩაი ციტრუსის - ე.წ. დეტოქსი და შავი ჩაი ბერგამოტის არომატით. აღნიშნული პროდუქტის შეფუთვა რამდენიმე თვეში დაიწყება და კომპანია La Familia-ს ბრენდის ქვეშ გაიყიდება. შემდეგ ისევ გავაგრძელებთ, თუ არა ახალი ჩაის წარმოებას, ეს  მომხმარებელზეა დამოკიდებული ", - აცხადებს ნიკა სიორიძე.ქართული ჩაის მწარმოებელი კომპანიის ერთ-ერთმა დამფუძნებელმა, ასევე იმპორტირებულ საქონელზეც ისაუბრა და აღნიშნა, რომ ადგილობრივ ბაზარზე ჩაის იმპორტი დიდია, კონკურენციის გაწევა კი, რთული."ჩემი აზრით, იმპორტირებული ჩაი არ მოწმდება. როგორც იცით, აღნიშნული პროდუქტი ჯანმრთელობისთვის საზიანო არ არის, მაგრამ როდესაც  საღებავებით გაჯერებულ ჩაის მოიხმარ, ორგანიზმზე შესაბამისად, მოქმედებს. კარგი იქნება, თუ იმპორტირებული ჩაი შემოწმდება. კონკურენციასთან პრობლემა არ გვაქვს, მაგრამ ლაბორატორიული შემოწმება უნდა დაიწყოს", - აღნიშნავს წარმოების ხელმძღვანელი.ნიკა სიორიძემ "ბიზნესპარტნიორთან" გაყიდვების ტენდენციებზეც ისაუბრა და აღნიშნა, რომ წინა წელთან შედარებით, გაყიდვების მაჩვენებელი 15-დან 20%-მდეა გაზრდილი."პროდუქტის 30% ადგილობრივ ბაზარზე იყიდება, დიდი ნაწილი კი, 70% უცხოეთში გადის. ფასს რაც შეეხება,  სეზონზე წლიდან წლამდე 10 ტონა ჩაი იყიდება. ამასთან, როდესაც სეზონია, დასაქმებული 50-დან 60 ადამიანი გვყავს. მნიშვნელოვანია, რომ ყოველ წელს დაახლოებით, 15-20%-ით ვიზრდებით და კლიენტები გვემატება", - აღნიშნავს ნიკა სიორიძე.ცნობისთვის, ქართული ჩაის მწარმოებელი კომპანიის "გრინგოლდი"-ს პლანტაციები ოზურგეთის მუნიციპალიტეტ სოფელ ნაგომარში მდებარეობს. ამასთან, ჩაის პლანტაციები 29 ჰექტარს მოიცავს.bp.ge 

"8 000 წლიანი ისტორიის გამო, ჩინეთის ბაზარს ქართული ღვინო აინტერესებს" - მარანი "ჩხაველი"

ქართული ღვინო, როგორც ადგილობრივ, ასევე უცხოურ ბაზარზე სულ უფრო, პოპულარული ხდება. როგორც ხელვაჩაურის რაიონის, სოფელ ერგეში მდებარე მარანი "ჩხაველის" თანადამფუძნებელი, მაკა თედორაძე "ბიზნესპარტნიორთან" აღნიშნავს, ქართულ ღვინოს უცხოეთში, მათ შორის ჩინეთისა და იაპონიის ბაზარზე დიდი პოტენციალი აქვს.მაკა თედორაძის ინფორმაციით, დაინტერესების ძირითადი მიზეზი 8 000-ს წლიანი ისტორია და უცხო გემოვნური თვისებებია."წლების განმავლობაში განვითარდით და გაცილებით მაღალი დონის ღვინოს ვამზადებთ. ადრე მოთხოვნიდან გამომდინარე, მევენახეები ღვინოს დიდ დანამატებს უმატებდნენ და შესაბამისად, რაოდენობრივად მეტი, თუმცა ძალიან ცუდი ღვინო გამოდიოდა. დროსთან ერთად საკმარისი განათლება მივიღეთ, თუნდაც ღვინის ინდუსტრიაში, მიმდინარე ტენდენციებს ფეხი ავუწყვეთ და მევენახეებმა გაცილებით მაღალი დონის ღვინის წარმოება დაიწყეს.მაღალი დონის ღვინის წარმოების დროს, მოგეხსენებათ კარგი შეფასებაც არ აყოვნებს და პოტენციური მყიდველის რიცხვიც იზრდება. მაგალითად, იტალიაში ძალიან საინტერესო ღვინოები აქვთ, ამ ყველაფერს ხელს ყურძნის ჯიში, ადგილმდებარეობა, გამოცდილება, ტექნოლოგია, ცნობადობა უწყობს და გასაგებია. ჩვენ რაც შეგვეხება, არ უნდა გამოგვრჩეს საკუთარი წარსული, 8 000 წლის წინანდელი ისტორია არ უნდა დავივიწყოთ - ღვინის სამშობლო ვართ. შეჯამების სახით, მინდა გითხრათ - ქართულ ღვინოს, ნებისმიერ უცხოურ ბაზარზე, მათ შორის, ჩინეთსა და იაპონიაში ძალიან დიდი პოტენციალი აქვს. განსხვავებული გემოვნური თვისებები, მაღალი ხარისხი და დიდი ისტორია - ეს ყველაფერი უცხოელებისთვის ძალიან საინტერესოა. მაგალითად, საფერავს დაძველების კუთხითაც დიდი პოტენციალი აქვს, ეს კი უცხოელ მომხმარებლებში დიდ აღფრთოვანებას იწვევს", - აღნიშნავს "ჩხაველის" თანადამფუძნებელი.ცნობისთვის, ღვინის ეროვნული სააგენტო ინფორმაციით, 12 მაისს ტოკიოში ქართული ღვინის წარდგენა გაიმართა. მათივე ცნობით, იაპონიაში, ქართული ღვინის ექსპორტი მზარდია; მაგალითად, მიმდინარე წლის 4 თვეში, საქართველოდან იაპონიაში ექსპორტირებულია 71 ათას ლიტრამდე ღვინო, რაც გასული წლის ანალოგიურ მაჩვენებელს, 21%-ით აღემატება.bp.ge 

"უცხოელები ბიო მევენახეობით დაინტერესებული არიან, ორგანული პროდუქტის მიწოდება სურთ" - მარანი "ჩხაველი"

საქართველოში ბიო მევენახეობის მიმართულება, სულ უფრო აქტუალური და პოპულარული ხდება.  როგორც ხელვაჩაურის რაიონ, სოფელ ერგეში მდებარე მარან "ჩხაველის" თანადამფუძნებელი, მაკა თედორაძე "ბიზნესპარტნიორთან" აღნიშნავს, მიმდინარე ტენდენციას მევენახეების დიდმა ნაწილმა უნდა აუწყოს ფეხი, რადგან უცხოელ მომხმარებლებს ორგანული, ჯანსაღი პროდუქტის მიწოდება სურთ.მაკა თედორაძის ინფორმაციით, საქართველოში ბიო მევენახეობის განვითარება, განსაკუთრებით დასავლეთში დიდ გამოწვევებსაც უკავშირდება."ახლა და ახლა გავიგეთ, რომ ღვინოში შაქრის დამატება შეცდომაა... წინა წლებთან შედარებით, გაცილებით უფრო განვითარებული ვართ. ბიო მევენახეობის ჭრილში, რომ ვისაუბროთ, აღნიშნული მიმართულება უფრო პოპულარული და დახვეწილი ხდება - რაც მისასალმებელია. ჩვენთან დასავლეთში, ბიო მევენახეობას, რომ მოჰკიდო ხელი, სირთულეებს უკავშირდება. პირველ რიგში, ხშირად უხვი ნალექი გვაქვს, შესაბამისად, ვაზზე დიდი მზრუნველობაა საჭირო. ამასთან, ვენახის ბიო პრეპარატებით შეწამვლა აუცილებელია, რაც საბოლოო ჯამში, დიდ ხარჯებს უკავშირდება. უნდა აღინიშნოს, რომ სწორი მოქმედების შემთხვევაში, ისეთ კარგ მოსავალს მიიღებ, რომელიც რაოდენობრივად ბევრი არ არის, მაგრამ ძალიან ხარისხიანია. საერთო ჯამში, ბიო მევენახეობას საქართველოში დიდი პოტენციალი აქვს. ხარისხზე მუდმივად უნდა ვიზრუნოთ, მეტ-ნაკლებად მეღვინეობაში, ვინც ერკვევა ხარისხის გარჩევა ძალიან მარტივია. რაც შეეხება ბაზარს, ჩვენ დეგუსტაციაზე ადგილობრივი მოსახლეობა თითქმის არ გვყოლია, ხოლო უცხოელებისთვის ძალიან მნიშვნელოვანია, რომ პროდუქტი ორგანული, ჯანსაღი იყოს - ნაკლები ჩარევით...უცხოელებს აღნიშნული მიმართულება ძალიან აინტერესებთ, შესაბამისად, ჩვენც გვინდა, რომ მიმდინარე ტენდენციას ფეხი ავუწყოთ და ვცდილობთ ბიო მევენახეობის განვითარებაში, საკუთარი წვლილი შევიტანოთ", - აღნიშნავს მაკა თედორაძე.ცნობისთვის, ხელვაჩაურის რაიონ, სოფელ ერგეში მდებარე მარანი „ჩხაველი“ ბათუმიდან 11 კმ-ში მდებარეობს. ოჯახური ტიპის მარანი 4 სახეობის ღვინოს: "ჩხაველს", "ცოლიკაურს", "საფერავსა" და "ქისს" აწარმოებს.  ვენახი 2 000 კვ მეტრზეა გაშენებული.bp.ge