ძაღლების ჰიპერპოპულაციის მართვის პროგრამა მცხეთა-მთიანეთის რეგიონშიც დაიწყო

"აგროთანადაფინანსების სახელმწიფო პროგრამა პროექტების ხარისხს გაზრდის" - Galt & Taggart

Galt & Taggart-ის შეფასებით, აგროთანადაფინანსების სახელმწიფო პროგრამა გრძელვადიანად პოზიტიურია - გაზრდის პროექტების ხარისხს, სექტორის კორპორატიზაციას და სახელმწიფო რესურსების მიზნობრივ გამოყენებას. მათივე ცნობით, განახლებული პროგრამა სახელმწიფო თანადაფინანსებას  ერთიან ჩარჩოში აქცევს და ამავე დროს ამკაცრებს პროექტების შესრულების, მონიტორინგის, აუდიტისა და აღრიცხვის მოთხოვნებს."ცვლილება გრძელვადიანად პოზიტიურია - გაზრდის პროექტების ხარისხს, სექტორის კორპორატიზაციას და სახელმწიფო რესურსების მიზნობრივ გამოყენებას. თუმცა, გრანტის ჩარიცხვის ვალდებულებების შესრულების შემდეგ ჩარიცხვამ და აგროკრედიტის სუბსიდიის შემცირებამ, შესაძლოა შეანელოს საინვესტიციო აქტივობა, განსაკუთრებით მცირე და საშუალო პროექტებში", - ვკითხულობთ ინფორმაციაში.მათივე ცნობით, მოქმედი მოდელი სექტორს გაფართოებისკენ უბიძგებს, რაც პროდუქტიულობას გაზრდის."ახალი თანადაფინანსების მოდელი მოიზიდავს საშუალოდ უფრო მსხვილ ინვესტორებს, რადგან მათ კაპიტალის მობილიზების, საბანკო დაფინანსების მოზიდვისა და მომწოდებლებთან მოლაპარაკების უკეთესი შესაძლებლობა აქვთ. ამასთან, ინვესტიციების ეფექტიანობა მოიმატებს ინვესტიციების ჯამური მოცულობის შესაძლო კლების ხარჯზე. მოქმედი მოდელის ფარგლებში, ინვესტორს პროექტის დაფინანსება თვითონ უწევს. გრანტი მხოლოდ ვალდებულებების შესრულების, აუდიტისა და ადგილზე კონტროლის შემდეგ ირიცხება (მაქსიმუმ 18-24 თვე). ასევე, აგროკრედიტის პროცენტის სუბსიდია შემცირდა და 11%-დან სებ-ის რეფინანსირების განაკვეთზე (8.25% ივლ-26) გადავიდა, ხოლო პერიოდი 48 თვიდან 36 თვემდე შემცირდა. ამ ყოველივემ შესაძლოა ინვესტიციაზე უკუგება შეამციროს, განსაკუთრებით დაბალი საწყისი კაპიტალის შემთხვევაში. რამაც, საბოლოო ჯამში შესაძლოა ჯამური საინვესტიციო აქტივობა შეანელოს", - ვკითხულობთ კვლევაში.ცნობისთვის, აგროთანადაფინანსების სახელმწიფო პროგრამა 2026 წლის 1 ივლისს ამოქმედდა.

"თელავში სეტყვამ ჩვენი ვენახები დააზიანა, თუმცა დაზღვევა გვაქვს, რაც ძალიან მნიშვნელოვანია" - მარანი "მილორაული"

მარანი "მილორაულის" დამფუძნებლის, თამარ მილორავას ინფორმაციით, თელავში მომხდარ სტიქიას ტურისტული ობიექტი არ დაუზიანებია, თუმცა მიმდინარე პერიოდში სეტყვამ მარნის ვენახები დააზიანა.როგორც სფეროს წარმომადგენელი "ბიზნესპარტნიორთან" განმარტავს, ამ ეტაპზე ზარალის ზუსტი მოცულობის შეფასება მიმდინარეობს. მისივე თქმით, კომპანიას ვენახები დაზღვეული აქვს, რაც მსგავსი რისკების მართვისთვის მნიშვნელოვან ინსტრუმენტს წარმოადგენს."ზაფხული ძალიან არასტაბილურია. ხშირად იცვლება ამინდი და ეს ყველაფერი კახეთში, ვენახების მდგომარეობაზე, ცხადია, გავლენას ახდენს. უშუალოდ სტიქიას რაც შეეხება, ჩვენი მარანი თელავში უნივერსიტეტის ქუჩის მიმდებარედ მდებარეობს, ამიტომ სტიქია არ შეგვეხო. მსგავსი წვიმები და კლიმატური ცვლილებები, ძალიან საშიშია - პრობლემას ყველა მევენახეს უქმნის. მიმდინარე პერიოდში ერთხელ ჩვენი ვენახიც დაისეტყვა, თუმცა დაზღვევა გვაქვს. ზოგად ჭრილში, ვენახის დაზღვევა აუცილებელია, სახელმწიფოც შემოდის ზარალის ანაზღაურების წილში. წლის განმავლობაში ჩვენი ზარალი ანაზღაურდება, ზუსტად რა თანხაზეა საუბარი ვერ დავაკონკრეტებ, თუმცა დაზღვევა ყველას უნდა ჰქონდეს", - აღნიშნავს თამარ მილორავა.ამასთან, საქართველოში ქონების დაზღვევის ტენდენციებზე "ბიზნესპარტნიორს" დაზღვევის სახელმწიფო ზედამხედველობის სამსახურიდან აცნობეს, რომ დაზღვევის მიმართულებით პენეტრაცია ჯერ კიდევ დაბალია. რის გამოც, მიუხედავად თელავში სტიქიის მასშტაბისა, სადაზღვევო კომპანიებში ზარალის შესახებ შეტყობინებების დიდი რაოდენობა არ შესულა.ცნობისთვის, მარანი "მილორაული" თელავში მდებარეობს, ხოლო ობიექტის ვენახები ახმეტის მიკროზონაშია გაშენებული, რომლის საერთო ფართობი დაახლოებით 7,5 ჰექტარია. შეგახსენებთ, რომ უხვი ნალექის შედეგად 12 ივლისს მდინარე თელავის ხევი ადიდდა. მოვარდნილი ღვარცოფი ქალაქის ქვედა ნაწილში მდებარე ხიდმა ვერ გაატარა, კალაპოტიდან გადმოსულმა მდინარემ კავკასიონისა და ალაზნის ქუჩები დატბორა. სტიქიის შედეგად დაიტბორა საცხოვრებელი სახლების სარდაფები, მაღაზიები, აფთიაქები, მიმდებარე ტერიტორიაზე არსებული ყველა სახელმწიფო და კომერციული ობიექტი.bp.ge 

დავით სონღულაშვილმა ქუთაისში ნახევარფაბრიკატების საწარმო "კულინარი" დაათვალიერა

გარემოს დაცვისა და სოფლის მეურნეობის მინისტრი დავით სონღულაშვილი ქ. ქუთაისში შპს „კულინარის“ ნახევარფაბრიკატების მწარმოებელი საწარმოს  საქმიანობას ადგილზე გაეცნო.შპს „კულინარი“ თვეში 110 ტონა ნახევარფაბრიკატს აწარმოებს. კომპანიის პროდუქცია იყიდება ადგილობრივ ბაზარზე, ქვეყნის მასშტაბით მოქმედ ქსელურ მარკეტებში. საწარმოსა და მის სადისტრიბუციო ქსელში, ჯამში, 100 ადამიანია დასაქმებული.კომპანია „კულინარი“ სოფლის განვითარების სააგენტოს ბენეფიციარია. საწარმოს შექმნისა და განვითარების ეტაპზე კომპანიამ არაერთხელ ისარგებლა პროექტით „შეღავათიანი აგროკრედიტი“.შეღავათიანი აგროკრედიტის პროექტის ფარგლებში იმერეთის რეგიონში ბანკების მიერ გაცემულია 300 მლნ ლარზე შეღავათიანია აგროსესხი, სოფლის განვითარების სააგენტოს თანადაფინანსება 7,7 მლნ ლარია.მინისტრთან ერთად,  მინისტრის მოადგილეები ლაშა ავალიანი და გიორგი წკრიალაშვილი, ქუთაისის მერი დავით ერემეიშვილი,  სოფლის განვითარების სააგენტოს დირექტორი ზურაბ გოზალიშვილი, სურსათის ეროვნული სააგენტოს უფროსი გიორგი იაკობაშვილი და ადგილობრივი ხელისუფლების წარმომადგენლები იმყოფებოდნენ.

"სექტორის მიზანი არა ათიათასობით ტონა ჩაის წარმოება, არამედ ხარისხიანი პროდუქციის შექმნაა" - "გრინგოლდი"

ქართული ჩაის მწარმოებელი კომპანია "გრინგოლდის" ერთ-ერთი დამფუძნებლისა და წარმოების ხელმძღვანელის, ნიკა სიორიძის შეფასებით, ქართული პროდუქტი ნელ-ნელა ევროპულ ბაზარზე საკუთარ ნიშას იკავებს.როგორც "ბიზნესპარტნიორთან" კომპანიის წარმომადგენელი განმარტავს, სექტორის მიზანია არა ათიათასობით ტონა ჩაის წარმოება, არამედ ისეთი ხარისხიანი პროდუქციის შექმნა, რომელიც უცხოურ ბაზარზე კონკურენტუნარიანი იქნება."ევროპულ ბაზარზე, მაგალითად გერმანიაში, პოლონეთსა და ჩეხეთში, ნელ-ნელა ჩვენს ნიშას ვიკავებთ. პროცესი უკვე დაწყებულია, რადგან ბოლო სამი წლის განმავლობაში არა მხოლოდ ჩვენი, არამედ სხვა ქართული კომპანიების ექსპორტიც იზრდება. მიუხედავად ამისა, ქართული ჩაი ჯერ კიდევ საკმარისად ცნობადი არ არის - ბოლო 30 წლის განმავლობაში სექტორი ფაქტობრივად მკვდარი იყო, ამიტომ დღეს რთულია კონკურენცია გავუწიოთ ჩინეთს, შრი-ლანკასა და ინდოეთს. თუმცა, იქიდან გამომდინარე, რომ ქართული ჩაი ორგანული და ნატურალურია სრულიად განსხვავებული გემოვნური თვისებები აქვს. მთავარი მიზანი არ არის ათიათასობით ტონა ჩაის წარმოება, არამედ ისეთი ხარისხიანი პროდუქტის შექმნა, რომელიც ბაზარზე კონკურენტუნარიანი იქნება. ქართული ჩაი ჩვენი ბუნებრივი და კლიმატური პირობებიდან გამომდინარე უნიკალური და განსხვავებულია, ამიტომ  საკუთარი მომხმარებელი აუცილებლად ეყოლება", - აცხადებს ნიკა სიორიძე."გრინგოლდის" ერთ-ერთი დამფუძნებელი გამოწვევების შესახებაც საუბრობს და აღნიშნავს, რომ სექტორს  სახელმწიფოს მხრიდან მხარდაჭერა აქვს, თუმცა აუცილებელი მარკეტინგული სტრატეგიის კიდევ უფრო გააქტიურება."რაც შეეხება გამოწვევებს, სახელმწიფოს მხრიდან 2016 წლიდან მხარდაჭერა გვაქვს, რადგან სწორედ მაშინ დაიწყო ჩაის რეაბილიტაციის პროგრამა. ასევე ხელმისაწვდომია შეღავათიანი აგროკრედიტები. თუმცა, ახლა უკვე იმ ეტაპზე ვართ, როდესაც მკვეთრი მარკეტინგული სტრატეგიაა აუცილებელი. მეტი ჩართულობის ქვეშ ვგულისხმობ რეგიონებში ვიზიტებსაც. მაგალითად, კარგი იქნება, თუ გურიაში უფრო ხშირად ჩამოვლენ. სეზონი დაწყებულია და მნიშვნელოვანია პროცესების ადგილზე გაცნობა. როგორც კახეთში რთველის პერიოდში ხშირად მიდიან და პროცესის მიმდინარეობას აკვირდებიან, ასევე სასურველია, ჩაის სექტორის მიმართაც მეტი ყურადღება იყოს და ადგილზე უფრო ხშირად ხდებოდეს ვიზიტები", - აღნიშნავს კომპანიის წარმომადგენელი.ცნობისთვის, ქართული ჩაის მწარმოებელი კომპანია "გრინგოლდი" აზიურ ბაზარზეც გავიდა. კომპანიის პლანტაციები, რომელიც 29 ჰექტარს მოიცავს ოზურგეთის მუნიციპალიტეტ სოფელ ნაგომარში მდებარეობს. "გრინგოლდი" 20 სახის ჩაის აწარმოებს. პროდუქცია წარმოდგენილია ადგილობრივ ბაზარზე ქსელურ მარკეტებში: "სპარი", "ორ ნაბიჯი", "დეილი", "გუდვილი" და ა.შ. ამასთან, "გრინგოლდი"-ს საექსპორტო ქვეყნებია: ჩეხეთი, გერმანია, საფრანგეთი, დიდი ბრიტანეთი, უკრაინა. bp.ge 

"ადგილობრივ ბაზარზე ზადიანი ღვინო დიდ პრობლემას არ უნდა წარმოადგენდეს" - ზაზა ასათიანი

2027 წლის 1-ელი თებერვლიდან ადგილობრივ ყველა კატეგორიის ღვინოზე სავალდებულო დეგუსტაციის ამოქმედებას კომპანია „ღვინის ქურდების“ თანადამფუძნებელი ზაზა ასათიანი „ბიზნესპარტნიორთან“ აფასებს.მისი თქმით, ადგილობრივ ბაზარზე ზადიანი (არასასურველი არომატები და გემოები, რომლებიც ღვინოს არასწორი დაყენების, შენახვის ან ჰაერთან კონტაქტის შედეგად უჩნდება) ღვინო დიდ პრობლემას არ უნდა წარმოადგენდეს, რადგან ქართული მეღვინეობა განვითარდა. შესაბამისად, მისი თქმით, დეგუსტაციის პროცესი ბიუროკრატიულ მექანიზმებს შექმნის, რამაც შესაძლოა ღვინის ბაზარზე გამოჩენა გარკვეული დროით გაწელოს.„საექსპორტო ღვინო ყოველთვის გადის დეგუსტაციას და შემიძლია გითხრათ, რომ ეს პროცესი საკმაოდ ლმობიერია. ანგარიშს ბევრ ფაქტორს უწევენ. თუ ეს პროცესი ისევე ლმობიერი დარჩება, როგორც ახლა არის - შესაძლოა შეიქმნას გარკვეული ბიუროკრატიული მექანიზმი, რომელიც ღვინის ბაზარზე გამოჩენის პროცესს გააჭიანურებს და მომხმარებელს მხოლოდ და მხოლოდ ზადიანი ღვინისგან დაიცავს. რამდენად სწრაფად და გამჭვირვალედ მოხდება დეგუსტაციის პროცესი, მნიშვნელოვანი საკითხია. ყველა რეგულაციას აქვს დადებითი და უარყოფითი მხარეები და განვითარებას აფერხებს ხოლმე. შესაძლოა სწორი მიმართულებას აძლევდეს, მაგრამ ტემპს ნამდვილად აფერხებს. პირადად მე ვფიქრობ, რომ ზადიანი ღვინო დიდ პრობლემას არ უნდა წარმოადგენდეს ადგილობრივ ბაზარზე, რადგან ქართული მეღვინეობა განვითარდა და აღარ არის 90-იანი წლები, როცა გაფუჭებული ღვინო იყიდებოდა ყველგან. აქედან გამომდინარე, მეღვინეები იცავენ მინიმალურ ხარისხს და დიდი მოთამაშეები მით უმეტეს. ამასთან დახლის ღვინოებიც უკვე სტანდარტიზებულია.ვფიქრობ, რომ ბაზარზე არსებული ღვინიდან წუნდებული ძალიან მცირე რაოდენობა იქნება, რადგან უკვე ძალიან იშვიათად შემხვედრია წუნდებული ღვინო“, - აცხადებს ზაზა ასათიანი.ცნობისთვის, კანონპროექტით შემოდის ალკოჰოლიანი სასმელების სავალდებულო QR-ნიშანდება, რომელიც უნდა შეიცავდეს ინფორმაციას სერტიფიცირების შესახებ და ალკოჰოლიანი სასმლის შესახებ. ნიშანდების წესი მინისტრმა უნდა დაამტკიცოს, ხოლო სისტემა 2027 წლის 1 თებერვლიდან ამოქმედდება.გარდა ამისა, საქართველოს პარლამენტმა მესამე მოსმენით განიხილა და მხარი დაუჭირა „ვაზისა და ღვინის შესახებ“ საქართველოს კანონში ცვლილებებს.  კანონპროექტის თანახმად, იცვლება „მცირე ზომის მარნის“ დეფინიცია და მისი წლიური წარმადობის მაქსიმალური ზღვარი 40 000 ლიტრიდან 25 000 ლიტრამდე მცირდება. ამასთან, ტერმინი „სახლის ღვინო“ იცვლება ტერმინით - „ბუნებრივი ღვინო“. ბუნებრივი ღვინო მიიღება ორგანული ყურძნის ტკბილის სპონტანური დადუღებით, სადაც დაუშვებელია ნებადართული ოპერაციებისა და ნივთიერებების გამოყენება, გარდა გოგირდის დიოქსიდისა, რომლის შემცველობა არ უნდა აღემატებოდეს 50 მგ/ლ-ს.bp.ge