აშშ-ში, ქსელურ სუპერმარკეტებსა და საცალო გაყიდვების 20 ობიექტში ქართული ღვინის პოპულარიზაციის კამპანია მიმდინარეობს

"სამეწარმეო ვენახების გაშენების ახალი წესი ყურძნის ხარისხის ზრდას ხელს შეუწყობს" - "ღვინის ქურდები"

სამეწარმეო ვენახების გაშენების ახალი წესი ძალიან კარგი იქნება და ყურძნის ხარისხობრივ ზრდას გამოიწვევს, - ამის შესახებ მეღვინეობა "ღვინის ქურდების" თანადამფუძნებელმა ზაზა ასათიანმა "ბიზნესპარტნიორთან"  „ვაზისა და ღვინის შესახებ საქართველოს კანონში ცვლილების შეტანის თაობაზე კანონპროექტის“ შეფასებისას განაცხადა.მისივე თქმით, მსგავსი რეგულაციების ამოქმედებისა და სუბსიდირების მოხსნის შემთხვევაში, დაახლოებით 10 წელში ქართული ღვინო მნიშვნელოვნად უფრო მაღალ დონეზე იქნება."ზოგადად, სახელმწიფოს მხრიდან რეგულაციების და შეზღუდვების მომხრე არ ვარ, მაგრამ ზოგიერთ შემთხვევაში ეს ამართლებს. მე ვფიქრობ, რომ თუ ყველაფერი აღსრულდა, ეს რა თქმა უნდა, დადებით შედეგებს გამოიწვევს. მე საკმაოდ მაღალი დონის უცხოელ ღვინის ექსპერტებთან მქონია შეხვედრა, რომლებმაც მითხრეს, რომ ქართული ვენახის პოტენციალი სრულად გამოყენებული და ათვისებული არ არის. ბევრი ისეთი ადგილი, რომელიც ვენახისთვის იდეალური იქნებოდა, სავენახედ საერთოდ არ არის განხილული და ხშირ შემთხვევაში, ვენახები ისეთ ადგილას არის გაშენებული, სადაც ყურძნის ჯიშობრივი შესაძლებლობები მაქსიმალურად არ არის ათვისებული. ყველა ჯიშს შესაბამისი გარემო, ნიადაგი და კლიმატი სჭირდება. ახლა სპონტანურად უკვე მეტ-ნაკლებად ხდება ვენახების გაშენება, რადგან თავმოყვარე კომპანია და სუბიექტი ნიადაგის რაღაც ანალიზს მაინც აკეთებს, თუმცა მაინც სასურველია, რომ უფრო მეტი რჩევა მოხდეს. სახელმწიფო რადგან ამ რეგულაციას თავის თავზე იღებს - ალბათ, მევენახეებს დაეხმარება და იაფად, ან უფასოდ გაუკეთებს ნიადაგის ექსპერტიზას. შესაძლოა ზოგს ეს ახალი მიდგომა არ მოეწონოს, რადგან უკვე შეძენილი აქვთ ვენახისთვის ადგილი და სააგენტომ უთხრას, რომ ეს ადგილი არ არის იდეალური, მაგრამ ვფიქრობ, რომ მაინც კარგი ინიციატივაა. ზოგადად, ღვინის ეროვნული სააგენტო კარგად მუშაობს, თავის საქმეს კარგად აკეთებს და მივყვებით ქართული მეღვინეობის განვითარების ხედვაში. ერთადერთი ჩემი წუხილი იყო სუბსიდირების ნაწილში. ძალიან დიდი თანხები მიდიოდა აღნიშნული მიმართულებით, რაც ინდუსტრიას არაფერს არ არგებდა და მე როგორც ვიცი, ამის მოხსნაზეც არის საუბარი", - განაცხადა ზაზა ასათიანმა.ცნობისთვის, საქართველოს მთავრობამ მიმდინარე კვირაში განიხილა და მოიწონა „ვაზისა და ღვინის შესახებ საქართველოს კანონში ცვლილების შეტანის თაობაზე კანონპროექტი“, რომლის მიზანია ხარისხიანი, კონკურენტუნარიანი ყურძნისეული წარმოშობის ალკოჰოლიანი სასმელების წარმოების, ასევე, რეალიზაციისათვის აუცილებელი ადგილობრივი და საერთაშორისო ბაზრების მოთხოვნათა გათვალისწინების ხელშეწყობა. ახალი რეგულაცია, მათ შორის, ითვალისწინებს მომავალი წლიდან სამეწარმეო ვენახის გაშენებაზე თანხმობას, რომელსაც სსიპ ღვინის ეროვნული სააგენტო გასცემს.bp.ge 

"ქართულ ღვინოზე მოთხოვნა საკმაოდ მზარდია - კომპანიის გაყიდვები 30%-ით გაიზარდა" - მეღვინეობა "ჩელთი"

აზიისა და ევროპის, ასევე ამერიკის ბაზარზე ქართულ ღვინოზე მოთხოვნა საკმაოდ მზარდია, - ამის შესახებ კომპანიის კომერციული დირექტორი ანა მირიანაშვილი "ბიზნესპარტნიორთან" აცხადებს. მისივე ინფორმაციით, კომპანიის გაყიდვების ზრდა შეინიშნება როგორც ადგილობრივ, ისე უცხოურ ბაზრებზე."წინა წლის ანალოგიურ პერიოდთან შედარებით, "ჩელთის" გაყიდვები დაახლოებით, 30%-ით გაიზარდა, თუმცა წლის ბოლოს უფრო დაზუსტებული მონაცემები გვექნება.აღსანიშნავია, რომ წელს დავიმატეთ ახალი ბაზარი - საფრანგეთი და ასევე, გავფართოვდით არსებულ ბაზრებზე. მათ შორის - ჩვენი ღვინოები წარმოდგენილია სხვადასხვა ქვეყნის HoReCa სექტორში და ქსელურ მარკეტებშიც. წელს ჩვენი ყველაზე დიდი მიღწევა ჩინეთში საკუთარი საწყობის გახსნა იყო. უნდა აღვნიშნოთ, რომ საკმაოდ დიდი ზრდაა ჩინეთის ბაზარზე. ყველგან დადებითი მაჩვენებლებია. ქართული ღვინო პოპულარული ხდება აზიის, ევროპისა და ამერიკის ბაზრებზე", - აცხადებს ანა მირიანაშვილი.რაც შეეხება საფასო კატეგორიას - როგორ "ჩელთის" კომერციული დირექტორი აცხადებს, ქართული ღვინო უფრო და უფრო მაღალ საფასო კატეგორიაში გადის."რა თქმა უნდა, არსებობს ტრადიციული ბაზრები, სადაც ქართული ღვინო შედარებით იაფად იყიდება, თუმცა განსაკუთრებით ევროპაში და ამერიკაში საკმაოდ მაღალ სეგმენტში ვართ. ძირითადად ქვევრის ღვინოებზეა ინტერესი, რაც საკმაოდ ძვირი ღირს", - აღნიშნავს ანა მირიანაშვილი.შეგახსენებთ, კომპანია "ჩელთი" ყვარელში, სოფელ შილდაში მდებარეობს. 80 ჰექტარზე "მეღვინეობა ჩელთის“ ვენახი, ხეხილის ბაღები, ტრადიციული მარნები, ბოთლების საძველე და ტურისტული კომპლექსია გაშენებული.„მეღვინეობა ჩელთის“ 21 სახეობის ღვინოს შორის ისეთ უძველეს ჯიშებსაც შეხვდებით, როგორიცაა ხიხვი და ქისი. ბიზნესი საოჯახოა და მისი დამფუძნებელი გიგა მირიანაშვილია.bp.ge 

"2026 წლიდან კვერცხის და ხორცის წარმოება დაახლოებით 3%-ით გაიზრდება" - ზურაბ უჩუმბეგაშვილი

საქართველოში მომავალი წლიდან მეფრინველეობის სექტორში დიდი ალბათობით, ზრდა დაფიქსირდება.  როგორც კომპანია "კუმისის" დამფუძნებელი, მეფრინველეობის განვითარების ასოციაციის ხელმძღვანელი ზურაბ უჩუმბეგაშვილი "ბიზნესპარტნიორთან" აღნიშნავს, მსოფლიოში ცილაზე მოთხოვნა გაზრდილია. შესაბამისად, ქვეყნის მასშტაბით 2026 წლიდან კვერცხის და ხორცის წარმოება დაახლოებით 3%-ით გაიზრდება. ზურაბ უჩუმბეგაშვილი სფეროში არსებულ გამოწვევების შესახებაც საუბრობს და ხაზს უსვამს, რომ ერთ-ერთი პრობლემური საკითხი იმპორტირებული საქონელია. "კუმისის" დამფუძნებლის ინფორმაციით, საქართველოში კვერცხის იმპორტის შემცირება ადგილობრივი წარმოების გაძლიერებას გამოიწვევს."შემცირებისთვის განსაკუთრებული უარყოფითი მუხტი არ გვაქვს. რაც შეეხება ზრდას მთელს მსოფლიოში და მათ შორის საქართველოში, ცილაზე მოთხოვნა გაზრდილია, შესაბამისად, კვერცხის და ხორცის წარმოება მომავალი წლიდან გაიზრდება. ზოგად ტენდენციას თუ შევხედავთ მაჩვენებელი ყოველწლიურად 3%-ით მატულობს. აღნიშნულ ტემპს მოთხოვნის ზრდას ვუკავშირებ, რითეილ ქსელი (მაღაზიების, სუპერმარკეტების, ან ონლაინ პლატფორმების ერთობლიობა, სადაც ერთი და იმავე ბრენდის პროდუქცია იყიდება) უფრო ორგანიზებული გახდა, პირობითად საქართველოში ქსელური მაღაზიები უფრო მეტია, ამიტომ მომხმარებლის მხრიდან დაინტერესებაც მაღალია. პროგნოზის გაკეთებაც აღარ გვიჭირს... რაც შეეხება გამოწვევებს -  არასამართლიანი ფასი გვაქვს ხოლმე დავუშვათ - იმპორტულ პროდუქციაზე ქვეყანაში საერთოდ არ არის კვერცხის იმპორტი საჭირო, რადგან ადგილობრივი წარმოება  მოთხოვნას სრულად აკმაყოფილებს. რა ვიცი, ალბათ, მარცვლეულზეც საქართველოში მაღალი ფასი გვაქვს", - აცხადებს "კუმისის" დამფუძნებელი.ცნობისთვის, კომპანია "კუმისი" ადგილობრივ ბაზარზე 2005 წლიდან ოპერირებს. თანამედროვე დონეზე აღჭურვილი საწარმოს საქმიანობა ქათმის კვერცხის წარმოებაა. კომპანია 2016 წლიდან ფლობს ISO 22 000 კატეგორიის სერტიფიკატს, რომელიც მენეჯმენტის გამართულ მუშაობას და წარმოებული კვების პროდუქტების უსაფრთხოების ნორმების მკაცრად დაცულობას ადასტურებს.bp.ge 

"კვერცხის იმპორტი შემცირებულია, ამიტომ სუპერმარკეტების დახლებზე ცარიელი ადგილი ჩანს" - ზურაბ უჩუმბეგაშვილი

ბოლო რამდენიმე დღეა ქვეყანაში, მაღაზიათა ქსელების დახლებზე კვერცხის დეფიციტი შეინიშნება. სიტუაციაში გასარკვევად "ბიზნესპარტნიორი" მეფრინველეობის განვითარების ასოციაციის ხელმძღვანელ ზურაბ უჩუმბეგაშვილს დაუკავშირდა, რომელიც აცხადებს, რომ  აღნიშნული პროდუქტი დეფიციტში არ არის და ის  უბრალოდ "ნაკლებობაშია".მისი თქმით, ქვეყნის მასშტაბით კვერცხის იმპორტი შემცირებულია, შესაბამისად სუპერმარკეტების დახლებზე ცარიელი ადგილი ჩანს.როგორც ზურაბ უჩუმბეგაშვილი აცხადებს, საქართველოში კვერცხის წარმოების 90%-ი ადგილობრივ ბაზარზე მოდის, ხოლო თურქეთიდან შემოსული იმპორტირებული საქონლის წილი 10%-ია. ბოლო წლებში კი, კვერცხის იმპორტი მხოლოდ თურქეთიდან ხორციელდებოდა.როგორც ზურაბ უჩუმბეგაშვილი განმარტავს, თურქეთიდან შემოსული მთელი პროდუქცია (სტანდარტული და სერტიფიცირებული კვერცხი) აშშ-ის ბაზარზე გადავიდა. აქედან გამომდინარე, საქართველოს ბაზარს კვერცხის ნაკლებობა დაეტყო. საერთო ჯამში, ქვეყანაში პროდუქტის იმპორტი გასულ წელს 60 მლნ იყო, წელს კი 10 მლნ-მდე დაიწია.ასოციაციის ხელმძღვანელი ადგილობრივ წარმოებასაც მიმოიხილავს და აღნიშნავს, რომ ადგილობრივ ბიზნესს წარმოება შემცირებული არ აქვს. ზურაბ უჩუმბეგაშვილის თქმით, ბაზრიდან თურქეთის ჩახსნა კარგია, რადგან ადგილობრივ წარმოებას პროდუქციის ნაკლებობის შევსების რესურსი აქვს."წელს კვერცხზე ფასის მომატებას არ ვაპირებთ, ყოველ შემთხვევაში მწარმოებლებისგან არ განიხილება. იცით რა ხდება?! გასულ წლებში ქვეყნის მასშტაბით ძალიან დიდი რაოდენობით იმპორტირებული საქონელი შემოდიოდა. წელს სხვადასხვა მიზეზის გამო იმპორტირებული პროდუქტი დიდი რაოდენობით არ შემოვიდა. საქსტატის ანგარიშის მიხედვითაც, ადგილობრივი ბიზნესი კვერცხს იმაზე მეტს აწარმოებს, ვიდრე წინა წლებში იყო. მოკლედ, იმპორტირებული პროდუქცია არ შემოსულა და აღნიშნული ადგილია დახლებზე ცარიელი, კვერცხის დეფიციტი არა, მაგრამ ცოტა ნაკლებობა შეინიშნება. აშშ-ში რა სიტუაციაა კვერცხთან დაკავშირებით კარგად იცით, 1 ცალი კვერცხი დაახლოებით $1 ღირდა, თურქეთის მთელი წარმოება (სტანდარტული და სერტიფიცირებული) აშშ-ის ბაზარზე აეწყო. დამატებით თურქეთმა კვერცხსა და ქათამზე კვოტები შემოიღო, ანუ თურქეთისთვის ქათმის ხორცისა და კვერცხის ექსპორტი კვოტირებულია.ადგილობრივ ბაზარს საკუთარი წარმოება შემცირებული არ აქვს, ჩვეულებრივად ვმუშაობთ.  წარმოიდგინეთ - კვერცხის იმპორტი 60 მლნ იყო, წელს კი 10 მლნ არ ყოფილა. ბაზარს აღნიშნული რაოდენობის პროდუქტი, რომ აკლდება ასე უცებ ვერ შევავსებთ, მომავალ წელს კი შევსებული იქნება. ზოგადად, ყოველწლიური გეგმა გვაქვს, რომ  წარმოება გავზარდოთ შარშან 6 000 მლნ-ზე ვიყავით და ამჟამად, 700 მლნ კვერცხს გადავცდით, წინ კიდევ თვე ნახევარია... რაც შეეხება ქათმის ჭირს, ყოველ წელს რაღაც ავადმყოფობაა ხოლმე, მაგრამ განსაკუთრებული და საგანგაშო არაფერი დაფიქსირებულა...", - აცხადებს ზურაბ უჩუმბეგაშვილი.იმპორტირებული საქონლის თემას მეფრინველეობის განვითარების ასოციაციის ხელმძღვანელი დეტალურად მიმოიხილავს და ხაზს უსვამს, რომ ამ ეტაპამდე ადგილობრივ ბიზნესს არასამართლიანი ფასის ეშინოდა, ახლა კი სურათი შეიცვალა."იმპორტირებული საქონელი იმდენად დაბალ ფასად შემოდიოდა, რომ წარმოების გაზრდა აღარ გვიღირდა, მხოლოდ რაღაც ნიშნულს ვიკავებდით. სხვა სიტუაციაა, როდესაც იცი რომ იმპორტირებული საქონელი არ შემოვა, მაშინ წარმოებას გაზრდი. არასამართლიანი ფასის გვეშინოდა, ამ ეტაპზე იმპორტირებული საქონელი ჩაეხსნა. რესურსი რომ წარმოება გავზარდოთ გვაქვს და მომავალი წლიდან გავაკეთებთ კიდეც. ეს ყველაფერი ადგილობრივ წარმოებაზე დადებითაც აისახება", - აცხადებს ზურაბ უჩუმბეგაშვილი.ცნობისთვის, როგორც საერთაშორისო მედიაში წერენ, აშშ-ში კვერცხის ფასი ასტრონომიულად მაღალი იყო, რაც ფრინველის გრიპის გამო შექმნილმა დეფიციტმა და მწარმოებლების მხრიდან გაზრდილმა ხარჯებმა გამოიწვია.bp.ge  

"ღვინის მაღაზიებში პროდუქციას ხშირად არ ვყიდი, რადგან თანხის გადახდას აგვიანებენ" - "მარანი გელოვანი"

ადგილობრივ ღვინის მაღაზიებში გარკვეული სახის გამოწვევები არსებობს, რაც ძირითად მეღვინეებისთვის თანხის დაგვიანებით გადახდას უკავშირდება.როგორც "მარანი გელოვანის" დამფუძნებელი, აკაკი გელოვანი "ბიზნესპარტნიორთან" აღნიშნავს, გარკვეული დროის განმავლობაში პროტესტის განცდა ჰქონდა და ქვეყნის მასშტაბით ბევრ ობიექტზე პროდუქციას საერთოდ არ შეჰქონდა.ტურისტული სექტორის წარმომადგენლის შეფასებით, ხშირად ღვინის მაღაზიის მფლობელებმა ბიზნესის კეთება საერთოდ არ იციან.აკაკი გელოვანი ქსელურ მარკეტებში პროდუქტის განთავსების საკითხსაც მიმოიხილავს და აცხადებს, რომ აღნიშნული ხაზითაც ბევრი პრობლემაა."ერთი პერიოდი პროტესტი მქონდა, საქართველოში ღვინოს არ ვყიდდი, რადგან ფულს არ იხდიან, ბიზნესი არ იციან და სათანადოდ არ გვეპყრობიან. აქედან გამომდინარე, ქვეყნის მასშტაბით, მხოლოდ 2-3 ადგილზე ვარ წარმოდგენილი. საქმეში დიდი შრომა მაქვს ჩადებული და თანხას ხშირად 6 თვის მერეც არ გიხდიან ხოლმე, აქედან გამომდინარე მათთან პარტნიორობას თავი დავანებე. გამიმართლა, რომ ექსპორტზე გავედი და სხვადასხვა ქვეყნის წარმომადგენლებთან (იაპონია, აშშ, გერმანია, პოლონეთი, ავსტრია, საფრანგეთი, შვეიცარია) აქტიური საქმიანი ურთიერთობა მაქვს. საკუთარ თავს თავად უნდა ვცეთ პატივი, თორემ ტაშს არავინ დაგვიკრავს.  რამდენი შემთხვევაა იცით, რომ 6 თვის განმავლობაში ადგილობრივი ღვინის მაღაზიები თანხის გადახდას აგვიანებენ?! კონკრეტული მაღაზიების ჩამონათვალისგან თავს შევიკავებ, მაგრამ მსგავსი შემთხვევები მერწმუნეთ ხშირია. იმედია, სიტუაცია შეიცვლება...რაც შეეხება ქსელურ მარკეტებში პროდუქტის განთავსებას,  როგორც ვიცი, ამ ხაზითაც ბევრი გამოწვევაა. უბრალოდ ქსელურ მარკეტებში შესული არ ვარ, რადგან ბიო ღვინოს ვაწარმოებ და მათ საკმარისი რაოდენობის პროდუქტს ვერ მივაწვდი. კერძოდ, ქსელურ მარკეტებში უფრო ხშირად ინდუსტრიული ღვინო იყიდება. ნატურალური ღვინო სხვა სეგმენტი გახლავთ, ძვირად იყიდება და იაფი არ ღირს", - აცხადებს აკაკი გელოვანი.ცნობისთვის, "მარანი გელოვანი" თბილისიდან 25კმ-ში, სოფელ ქვემო წყლულეთში, მდებარეობს და კახური ჯიშის ბიო ღვინოს ამზადებს. ასორტიმენტში შედის: "რქაწითელი", "კახურ მწვანე", "ქისი" და "საფერავი". ექსპორტზე კი 2017 წლიდან გადის, საექსპორტო ქვეყნებია - იაპონია, აშშ, გერმანია, პოლონეთი, ავსტრია, საფრანგეთი და შვეიცარია.ამასთან, აღსანიშნავია, რომ ქსელურ მარკეტებთან მიმართებით უარყოფითი პოზიცია, სხვადასხვა ბიზნესის წარმომადგენლებსაც აქვთ. მათ შორისაა "ჩირჩხელას" აღმასრულებელი დირექტორი, ირმა კვაჭანტირაძე. მეწარმის განცხადებით, კომპანიას ადგილობრივ ბაზარზე გაფართოება სურს, თუმცა სუპერმარკეტებში პროდუქციის შეტანა დიდ თანხებთანაა დაკავშირებული.როგორც მან "ბიზნესპარტნიორთან" აღნიშნა, ქსელურ მარკეტებში პროდუქციის შეტანაზე - კერძოდ, თითოეული სახეობის მარკეტის თაროზე განთავსებისთვის 1500 ლარია გადასახადი, რაც საკმაოდ ძვირია.გარდა ამისა, ქსელური მარკეტების მაღალ გადასახადებზე "ბიზნესპარტნიორთან" სათამაშოების ნაკრების ადგილობრივი მწარმოებელი კომპანია "ქართული თემის“ დამფუძნებელმა მანუჩარ ლობჟანიძემაც ისაუბრა. მისი თქმით, სახელმწიფომ კანონი უნდა მიიღოს, რომ ქსელურ მარკეტებს 5%-ზე მაღალი "ქეშბექის" მოთხოვნის საშუალება არ ჰქონდეთ.bp.ge