ღვინის ეროვნული სააგენტოს მხარდაჭერით, ჩინეთში ქართული ღვინის წარდგენა გაიმართა

"მიმდინარე წელს გვსურს, რომ იაპონიის ბაზარზე პირველი ნაბიჯები გადავდგათ" - "თბილღვინო"

მიმდინარე წელს გვსურს, რომ იაპონიის ბაზარზე პირველი ნაბიჯები გადავდგათ, - ამის შესახებ "თბილღვინოს" თანადამფუძნებელმა გიორგი მარგველაშვილმა  "ბიზნესპარტნიორთან" განაცხადა.მისივე ინფორმაციით, კომპანია იაპონიის გარდა, აშშ-ში განვითარების ახალ ეტაპზე გადადის, რომელიც პრემიუმ ღვინოების ექსპორტს ითვალისწინებს. "აშშ-ს ბაზარზე ჩვენ გვაქვს ერთგვარი პრემიუმიზაციის სტრატეგია და გვინდა, რომ ჩვენი ახალი პრემიუმ კატეგორიის ღვინოები წარვადგინოთ. მოლაპარაკება გვაქვს რამდენიმე მსხვილ ამერიკელ იმპორტიორთან და სავარაუდოდ, წლის ბოლომდე აღნიშნული პარტნიორობა შედგება. ვფიქრობთ, რომ აღნიშნულით ამერიკულ ბაზარზე ჩვენი განვითარების გარკვეული ახალი ეტაპი დაიწყება. აშშ-ში მცირე გადატვირთვები გვაქვს, თუმცა ახლა გადავდივართ ახალ ეტაპზე.რაც შეეხება ცნობადობას - როგორც აშშ-ში ისე, დასავლეთ ევროპის ბაზრებზე ქართული ღვინის ცნობადობა და გაყიდვები მზარდია. მაგალითად, 2025 წელს ჯამურად ჩვენი კომპანიის გაყიდვები 10%-ით გაიზარდა. ჩვენ მუდმივად ვვითარდებით, თუმცა კონკრეტულ საინვესტიციო მოცულობას ვერ გეტყვით. ჩვენ საკმაო ინვესტციების გვაქვს განხორციელებული ჩვენი საწარმოო სიმძლავრეების შექმნაში და გათანამედროვეობაში. ასევე, იმ მარკეტინგულ კამპანიებში, რომელსაც სხვადასხვა ქვეყანაში ვაწარმოებთ და კიდევ გვაქვს დაგეგმილი. გვსურს, რომ მსოფლიოს 10 მოწინავე ქვეყანაში შევიდეთ, როგორც ქართული მოწინავე გლობალური ღვინის ბრენდი. მათ შორის, აშშ, დიდი ბრიტანეთი, გერმანია, შვეიცარია, კანადა, სკანდინალვიის ქვეყნები და ასევე, იაპონია", - აცხადებს გიორგი მარგველაშვილი.ცნობისთვის, "თბილღვინო"  ქართული ღვინის მწარმოებელი წამყვანი კომპანიაა საქართველოში, რომლის პროდუქციაც ექსპორტზე მსოფლიოს 30 ქვეყანაში გადის. "თბილღვინოს" ისტორია გასული საუკუნის 60-იან წლებში იწყება. 1962 წელს საქართველოში ერთ-ერთი ყველაზე დიდი ღვინის საწარმო გაიხსნა, რომელიც 90-იან წლებში კერძო კომპანიად იქცა და მალევე დაიმკვიდრა მნიშვნელოვანი ადგილი ადგილობრივ და საერთაშორისო ბაზარზე. დაარსებიდან დღემდე, "თბილღვინომ" უდიდესი აღიარება და უამრავი ჯილდო მოიპოვა, მათ შორის ლონდონის საერთაშორისო კონკურსებზე: Decanter World Wine Awards, International Wine Challenge და International Wine & Spirit Competition."თბილღვინოს" ვენახებში გაშენებულია სხვადასხვა ქართული ყურძნის ჯიში და მდებარეობს ქინძმარაულის, მუკუზნის და წინანდლის მიკროზონებში.bp.ge 

"ღვინის ქურდები" კორეის ბაზარზე გასასვლელად ემზადება

"ღვინის ქურდები" კორეის ბაზარზე გასასვლელად ემზადება. როგორც კომპანია „ღვინის ქურდების“ თანადამფუძნებელმა ზაზა ასათიანმა „ბიზნესპარტნიორთან“ განაცხადა, პირველი ექსპორტი სავარაუდოდ გაზაფხულის ბოლოს განხორციელდება.მანვე აღნიშნა, რომ კომპანია კორეიდან საქართველოში სავარაუდო პარტნიორების ჩამოსვლას მაისში ელოდება და პოზიტიური მოლოდინები აქვს."წლის ბოლოს იაპონიაში, საკმაოდ სერიოზულ პარტნიროთან დავიწყეთ ურთიერთობა, რომელიც თავის ბაზარზე ბევრ რესტორანს, სასტურმოსა და მაღაზიას ამარაგებს. რაც შეეხება კორეის ბაზარს, გვქონდა დეგუსტაციები, გასინჯეს და მივიღეთ პირველადი დადებითი შთაბეჭდილებები. შესაბამისად, გვაქვს მოლოდინი, რომ აღნიშნულ ბაზარზეც გამოვჩნდებით.ჩვენ ადგილობრივადაც დავიწყეთ პატარ-პატარა კამპანიები, რადგან აღმოჩნდა, რომ უცხოეთში უფრო გვიცნობენ, ვიდრე საქართველოში, თუმცა საერთო ჯამში, ჩვენი სამიზნე ბაზარი მაინც საექსპორტო მიმართულებებია. გვინდა, რომ ჩვენი კომპანიის გაყიდვების 80% სწორედ ექსპორტზე მოდიოდეს", - აცხადებს ზაზა ასათიანი.მისივე თქმით, "ღვინის ქურდების" გაყიდვების წინა წლის ანალოგიურ პერიოდთან შედარებით გაზრდილია და კომპანია განვითარებას როგორც ადგილობრივ, ისე უცხოურ ბაზრებზე აქტიურად განაგრძობს.შეგახსენებთ, ღვინის კომპანია „ღვინის ქურდები“ 2015 წელს წინანდალში დაფუძნდა. დაფუძნებიდან პირველი ორი წელი კომპანიის საქმიანობის კონცეფცია მოიცავდა მევენახე გლეხების მოძიებას მთელი ქვეყნის მასშტაბით და მათ გადაყვანას ეკოლოგიურად სუფთა პროდუქციის წარმოებაზე, ასევე კომპანია მათ  ღვინის ბრენდირებასა და სარეალიზაციო ქსელში პროდუქციის გატანაში ეხმარებოდა. bp.ge 

"საომარი პროცესები ღვინის სექტორზე პირდაპირ გავლენას ვერ ახდენს, თუმცა ლოგისტიკური სირთულეები მნიშვნელოვნად გაიზარდა" - "ღვინის ქურდები"

ის ქვეყნები, სადაც ახლა საომარი პროცესები მიმდინარეობს ღვინის ქვეყნებად არ ითვლება და შესაბამისად, ღვინის სექტორზე პირდაპირ გავლენას არ მოახდენს, თუმცა საკმაოდ სერიოზული ლოგისტიკური სირთულეებია წარმოქმნილი, - ამის შესახებ კომპანია „ღვინის ქურდების“ თანადამფუძნებელმა ზაზა ასათიანმა "ბიზნესპარტნიორთან" განაცხადა, რითაც ახლო აღმოსავლეთში შექმნილი ვითარების გავლენა შეაფასა.მისივე ინფორმაციით, ღვინის გაყიდვების დინამიკა დამოკიდებულია იმაზე, თუ რამდენად სწრაფად მოგვარდება აღნიშნული ლოგისტიკური პრობლემები."იმ  აზიის ქვეყნებში, სადაც ქართული ღვინო გადის, ან გასვლის პერსპექტივა აქვს - იქ არც ომია და არანაირ სამხედრო კონფლიქტებს ადგილი არ აქვს, მათ შორის, ჩინეთში, იაპონიაში და ა.შ. თუმცა აღნიშნულ ქვეყნებში ტვირთის ტრანსპორტირებისთვის სწორედ იმ ქვეყნების სივრცეს იყენებენ, სადაც ახლა პრობლემებია. შესაბამისად, ვფიქრობ, რომ ეს ყველაფერი არა მხოლოდ ღვინის პრობლემაა, არამედ ეს საერთო სავაჭრო კრიზისისკენ მიმავალი გზაა და ვფიქრობ, რომ რაიმე გამოსავალი გამოიძებნება", - აცხადებს ზაზა ასანიძე.მანვე აღნიშნა, რომ ომი არასდროს უხდება ბიზნესს და სავაჭრო ურთიერთობებს და იმედს გამოთქვამს, რომ პროცესები მალე დასტაბილურდება. ცნობისთვის, ახლო აღმოსავლეთში ვითარება მკვეთრად გამწვავდა - ისრაელსა და ირანს შორის სამხედრო დაპირისპირებაში, ჩართულია აშშ-იც. პარალელურად აქტიურია ირანის მხარდამჭერი ჯგუფები რეგიონში, რაც კონფლიქტს ფართომასშტაბიან რეგიონულ კრიზისად აქცევს. უსაფრთხოების რისკების გამო ახლო აღმოსავლეთის რამდენიმე ქვეყანაში საჰაერო სივრცე დროებით დახურულია, მრავალი საერთაშორისო რეისი გაუქმდა ან შეიცვალა მარშრუტი.bp.ge

"შირაქი" გაფართოვდა - კომპანია მოცარელას წარმოებას გეგმავს

რძის გადამამუშავებელი საწარმო „შირაქი“ გაფართოვდა.  კომპანიამ ახალ საწარმოში 3 მლნ ლარის ინვესტიცია განახორციელა და დღიური წარმადობა გაზარდა. როგორც „შირაქის“ დამფუძნებელი ნიკოლოზ ბენიაიძემ  „ბიზნესპარტნიორთან“ საუბრისას განმარტავს, კომპანია დღიურად 10 ტონა ნედლ რძეს აწარმოებს.„ახლახან გადავედით ახალ ქარხანაში, გარდაბნის მუნიციპალიტეტში, პირველ ეტაპზე 3 მილიონი ლარის ინვესტიცია განვახორციელეთ, თუმცა კიდევ მოითხოვს დამატებით ინვესტიციას. ბაზარი ნელ-ნელა გავზარდეთ. ვგეგმავთ ახალი, უფრო მასშტაბური ფერმის გაკეთებას და ამ მიმართულებით გაფართოებასაც. წინსვლა გვაქვს, ვიზრდებით, თუმცა საწარმოს მასშტაბიდან გამომდინარე, წარმოების ზრდა 5-ჯერ შეგვიძლია,"-აცხადებს ბენიაიძე.კომპანია რძემჟავა პროდუქტების ასორტიმენტის გაფართოებასაც აპირებს. მათ შორის, ევროპული ყველის ნაირსახეობების წარმოებას გეგმავს„გვყავდა ფრანგი სპეციალისტი, რომელიც ახალი პროდუქტების დანერგვაში სამომავლოდაც დაგვეხმარება. გვინდა, უახლოეს ერთ წელში მოცარელას წარმოებაც დავიწყოთ. ამას სჭირდება ახალი დანადგარებიც. თუ ბაზარი გაგვიშვებს, ასორტიმენტის გაფართოების მიმართულებით აქტიურად ვიმუშავებთ,“-აღნიშნა ნიკოლოზ ბენიაიძემ.მისივე თქმით, ბაზარზე ფალსიფიცირებული რძის პროდუქციის მწარმოებლები უნდა გამოვლინდნენ და ამ მხრივ უფრო მეტი მუშაობაა საჭირო.„თუ არ გამოვიდნენ ჩრდილიდან ფალსიფიკატორები, არ დარეგისტრირდნენ ოფიციალურად, არ დანერგეს HACCP-ი, ეს  ართულებს ოპერირებას. მომხმარებელი შეცდომაშია შეყვანილი. ამიტომ კეთილსინდისიერი მეწარმეები ძნელად იზრდებიან. ბევრმა ვერც გაუძლო კონკურენციას და არის რამდენიმე საწარმოც გაჩერებული.“-აღნიშნა ნიკოლოზ ბენიაიძემ.შეგახსენებთ, "შირაქი" 2012 წელს დაფუძნდა. ამჟამად კომპანია რამდენიმე დასახელების ყველს  და რძის პროდუქტებს აწარმოებს. მათ შორისაა,  შირაქის სულგუნი, შებოლილი სულგუნი, შირაქის ქართული ყველი, შირაქის იმერული ყველი "ექსტრა",შირაქის ნადუღი და სხვა. წარმოებული პროდუქციის ძირითადი ნაწილი ადგილობრივ ბაზარზე იყიდება. მცირე ნაწილი კი ექსპორტზეც გადის. კომპანიის საკუთრებაშია დედოფლისწყაროში მდებარე ფერმა. წარმოებისთვის კომპანია  რძეს ადგილობრივი ფერმერებისგანაც იბარებს. 

"მწვანილზე ძალიან დიდი მოთხოვნაა და ზოგჯერ დეფიციტი იქმნება" - "ჰერბია"

მწვანილისა და ბოსტნეულის მწარმოებელი კომპანია "ჰერბიას" თანადამფუძნებლის დავით ჯანელიძის განცხადებით, ქვეყანაში მწვანილზე ძალიან დიდი მოთხოვნაა და ზოგჯერ დეფიციტი იქმნება.როგორც მან "ბიზნესპარტნიორთან" აღნიშნა, ბაზარზე არიან სხვა კომპანიებიც, რომლებიც მსგავსს პროდუქტს აწარმოებენ, თუმცა ეს საკმარისი არ არის და კიდევ უფრო მეტად უნდა მოხდეს განვითარება."გამოწვევები არსებობს. პირველად წარმოებაში დეფიციტები იქმნება. ჩვენი მხრიდან ყოველწლიურად ვამატებთ სასათბურე მეურნეობებს პირველად წარმოებას ვზრდით, მაგრამ ეს მაინც არ არის საკმარისი. ქვეყანაში არსებული სიტუაციიდან გამომდინარე კონკრეტულად მწვანილზე ძალიან დიდი მოთხოვნაა და თითქმის ყველა ქსელურ მარკეტში შევდივართ. შესაბამისად, ზოგჯერ დეფიციტი იქმნება. ჩვენ ჩვენი წარმოების გარდა, 500 პარტნიორი ფერმერი გვყავს, რომლებიც ჩვენთვის აწარმოებენ პროდუქციას. მომავალში ვფიქრობთ, რომ კიდევ უფრო გავფართოვდეთ და შევეცდებით ეს დანაკლისები შევავსოთ.გარდა ამისა, პრობლემაა იმპორტულ პროდუქტთან მიმართებაში. ქვეყანაში ირანიდან პროდუქცია, ფაქტობრივად, დემპინგურ ფასად შემოდის და მას ფასში კონკურენციას ქართული პროდუქტი ვერ უწევს და ქართული წარმოება იჩაგრება. გამოსავალი არის ის, რომ როგორც მინიმუმ პროდუქციის იდენტიფიცირება უნდა მოხდეს რომელია ქართლი და რომელი იმპორტირებული", - აცხადებს დავით ჯანელიძე.კომპანიის თანადამფუძნებლის თქმით, მიმდინარე წელს "ჰერბია" ტექნოლოგიურ განვითარებას გეგმავს."გვინდა, რომ პირველად წარმოებაში თანამედროვე ტექნოლოგიების შემოვიტანოთ, რაც წარმადობის ზრდის საშუალებას მოგვცემს. მაგალითად, წინა წელს 10%-მდე გავზარდეთ ჩვენი წლიური სასათბურე მეურნეობის წარმადობა, თუმცა ძალიან რთულია თქმა ახლა რა რაოდენობით გაიზრდება. ვფიქრობთ, რომ აღნიშნულ პროექტში 0.5 მლნ ლარამდე დაიხარჯება", - აღნიშნა დავით ჯანელიძემ.მანვე აღნიშნა, რომ მიუხედავად იმისა, რომ ჰერბია ბოსტნეულსაც აწარმოებს - მათი მთავარი მიმართულება მაინც  მწვანილია და განვითარებასაც სწორედ ამ მიმართულებით გეგმავს. bp.ge