სურსათის ეროვნულმა სააგენტომ ვანში ყველის არალეგალური საწარმო გამოავლინა

"მოხმარების ზრდის შემთხვევაში, ქართული ნუში შესაძლოა სრულად შიდა ბაზარზე რეალიზდეს" - ნიკო ნიკოლაძე

საქართველოს არ აქვს პოტენციალი, რომ ნუშის მსხვილი ექსპორტიორი ქვეყანა გახდეს, თუმცა ეს არ ნიშნავს იმას, რომ ჩვენ წარმოებული ნუშის რეალიზაცია ადგილობრივ, ან მეზობელ ქვეყნებში არ შეგვიძლია, - ამის შესახებ ნუშისა და კაკლის მწარმოებელთა ასოციაციის სამეთვალყურეო საბჭოს წევრმა ნიკო ნიკოლაძემ გადაცემა "ბიზნესპარტნიორში" განაცხადა.მისივე ინფორმაციით, აღნიშნული შეფასება გამომდინარეობს ციფრებიდან, კერძოდ - აშშ წლიურად დაახლოებით, 1 400 000-მდე ტონა ნუშს აწარმოებს, მაშინ როცა ჩვენ მომდევნო წელს 1500 ტონა ნუშს ველოდებით."შეუძლებელია სხვა ქვეყნის პრაქტიკის მორგება საქართველოზე, ანუ მაგალითად, შეუძლებელია აშშ-ის მოდელი, რომელიც მთავარი მწარმოებელია ნუშის, დააკოპირო და მაგალითად, საგარეჯოში გააშენო იგივე მოდელის ბაღი, რადგან განსხვავებული კლიმატური რეჟიმი და სხვადასხვა ტიპის ტექნიკაზე განსხვავებული ხელმისაწვდომობა გვაქვს, ამიტომ საჭიროა მისი ერთგვარი მორგება ჩვენს რეალობაზე. ეს გამოცდილება უკვე დაგროვებულია. ბოლო რამდენიმე წლის განმავლობაში ხდება საოცრად საინტერესო პროექტების განხორციელება საქართველოში, რომელსაც საკმაოდ კარგი პერსპექტივა აქვს, რომ საჰექტრო მოსავლიანობა გაზარდოს და მიიღოს ის მოსავალი, რომელიც კონკურენტუნარიანია იქნება საერთაშორისო ბაზრებზე ფასის ჭრილში. რაც შეეხება ხარისხის - ამ კუთხითაც არ გვაქვს პრობლემა, რადგან მაგალიტად, თუ 2.4 ტონა ნუშის გულს მოვიყვანთ 1 ჰა-ზე ეს ნიშნავს, რომ საკმაოდ მაღალი კალიბრია, ნუშის ფორმა ლამაზია და შესაბამისად, შეგიძლია იფიქრო საერთაშორისო ბაზარზე.დღეს ნუშის ფასი უბრუნდება რეალურ მაჩვენებელს და მოსახლეობას ეძლევა საშუალება, რომ 1 კგ ნუში იყიდოს. საქართველოში თუ 100 გრამი ნუშის მოხმარება იყო 1 სულ მოსახლეზე, ეს დაახლოებით, სამჯერ არის გაზრდილი. თუ მოხმარება დაეწევა ევროპის მაჩვენებელს, რომელიც 1 სულ მოსახლეზე 2.5 კგ-ია წლის განმავლობაში - ის მოცულობა, რომელსაც საქართველო აწარმოებს სრულად შეიძლება ადგილობრივ ბაზარზე დარჩეს იმ კონკურენტულ ფასად, რომელ ფასადაც ჩვენ პროდუქტი შეიძლება საერთაშორისო ბაზარსაც შევთავაზოთ. ნუშის წარმოება შეიძლება საინტერესო ბიზნეს მოდელად იქცევს, თუ საჰექტრო მოცულობა დაეწევა იმ მაჩვენებელს, რომელიც მაგალითად არის ესპანეთში", - აცხადებს ნიკო ნიკოლაძე.ცნობისთვის, გარემოს დაცვისა და სოფლის მეურნეობის სამინისტროში დარგობრივი საბჭო იქმნება, რომელიც ფერმერების მხარდაჭერას, გამოწვევების იდენტიფიცირებას და კაკლისა და ნუშის სექტორის კოორდინირებულ განვითარებას ისახავს მიზნად. მინისტრი უკვე შეხვდა დარგის წარმომადგენლებს.bp.ge  

"ფაქტია, რომ ღვინის ეროვნული სააგენტოს მიერ განხორციელებული რეგულაციები დადებითად მუშაობს" - ზვიად კორძაძე

ფაქტია, რომ ღვინის ეროვნული სააგენტოს მიერ აქამდე განხორციელებული რეგულაციები დადებითად მუშაობს და სამეწარმეო ვენახების გაშენების შესახებ ახალი რეგულაციაც არ მგონია ცუდი იყოს, - ამის შესახებ "ბარბალეს მარანის" დამფუძნებელი, ზვიად კორძაძე „ბიზნესპარტნიორთან“ განაცხადა.მისივე ინფორმაციით, თუკი ღვინის ხარისხის ზრდა გვინდა ამისთვის რეგულაცია საჭიროა. "ფაქტია, რომ ღვინისა და ვენახების რაოდენობის ზრდისა და ყალბი ცნობების გაცემის აღკვეთის კუთხით ძალიან ბევრი რამ გაკეთდა. მით უმეტეს იმის გათვალისწინებით, რომ ეს რეგულაცია ეხება კომერციული მიზნებისთვის განკუთვნილ ვენახს - რა თქმა უნდა, ამას გარკვეულწილად მოწესრიგება სჭირდება. თუ უშუალოდ რეგულაციის კუთხით  რაიმე ჩასასწორებელი ან გასამართი იქნება იმედი მაქვს, რომ ჩასწორდება. ამჟამად, თვითონ რეგულაციის მიმართ მე არანაირი უარყოფითი დამოკიდებულება არ მაქვს, რადგან თუ ჩვენ ღვინის ხარისხზე ვფიქრობთ ასეც უნდა იყოს. ეს რეგულაცია თუ იმას მოიცავს, რომ ვენახის გაშენება სტანდარტებით უნდა მოხდეს და მოწეული მოსავალიც უნდა შეესაბამებოდეს სტანდარტებს - ეს ძალიან კარგია. უბრალოდ სტანდარტებთან მიმართებაში თუ მევენახეს დასჭირდება წაშველება, რომ ადაპტირება მოახდინოს მათ შორის, გამოცდილების, მოსავლის დაბინავების და ბაზრების მოძიების კუთხით - კარგი იქნება", - აცხადებს ზვიად კორძაძე.ცნობისთვის, გარემოს დაცვისა და სოფლის მეურნეობის მინისტრის ბრძანებით სამეწარმეო ვენახის გაშენების წესი დამტკიცდა. დოკუმენტი განსაზღვრავს სამეწარმეო ვენახის გაშენებასა და აღდგენა-განახლებასთან დაკავშირებულ პრინციპებს და პირობებს.bp.ge

"ევროპაში ღვინის რეალიზაცია შემცირდა - ჩვენი საექსპორტო წილი 70%-დან 45%-მდე დაკორექტირდა" - "ღვარძელაშვილების მარანი"

ევროპაში ღვინის რეალიზაცია შემცირდა - საექსპორტო წილი 70%-დან 45%-მდე დაკორექტირდა, - ამის შესახებ ბიოღვინოს მწარმოებელი კომპანიის “ღვარძელაშვილის მარნის“ დამფუძნებელი გიორგი ღვარძელაშვილი "ბიზნესპარტნიორთან" განაცხადა.მისივე ინფორმაციით, ამჟამად ყველაზე მეტად მზარდ საექსპორტო ბაზრად ამერიკის შეერთებული შტატები ითვლება, სადაც კომპანია გაფართოებას გეგმავს. "ჯამში 8 ქვეყანაში ვიყავით და 3 ქვეყანა ჩავხსენით. გაუქმდა ინგლისი, ჰოლანდია და იტალია. რეალიზაციის ტენდენცია 2025 წელს დაიწყო. ევროპაში ალკოჰოლურ სასმელებს უკვე ნაკლებად სვამენ, უკვე ეკონომიკურადაც ისეთი ხელგაშლილები აღარ არიან როგორც წინა წლებში და ა.შ. ბევრი ფაქტორია, რამაც აღნიშნული ტენდენცია გამოიწვია. მიუხედავად ყველაფრისა, აშშ-ს ბაზარი სარეალიზაციოდ ყველაზე მზარდ ბაზრად ითვლება. შესაბამისად, ჩვენც ორიენტირებულები ვართ, რომ აშშ-ს ბაზარზე გავფართოვდეთ. ამჟამად, ექპორტზე ჩვენი პროდუქციის 45% იყიდება, დანარჩენი კი ადგილობრივად ჩვენს ღვინის მარანში. ტურისტული კუთხით ჩემს მარანში 2026 წლის დასაწყისში საკმაოდ დაბალი მაჩვენებლები იყო, თუმცა მარტის შუა რიცხვებიდან გააქტიურდა და დღეში შესაძლოა 3-4 ჯავშანი იყოს. ძირითადად არიან ესპანეთიდან", - აცხადებს გიორგი ღვარძელაშვილი.მანვე აღნიშნა, რომ "ღვარძელაშვილების მარანი" ჩინეთში ექსპორტისთვისაც ემზადება, ღვინის ნიმუშები წაღებულია და მეღვინეობა პასუხს ელოდება.ცნობისთვის, "ღვარძელაშვილის მარნის" ვენახი თელავის რაიონის სოფელ  კონდოლში, 5 ჰექტარ მიწის ფართობზეა გაშენებული. კომპანია ღვინოს 2014 წლიდან აწარმოებს, ხოლო ექსპორტზე 2018 წლიდან გადის.bp.ge 

თბილისში განსხვავებული კონცეფციის ღვინის ბარი გაიხსნა, სადაც ღვინის რეალიზაციას თავად მეღვინე ახდენს

ქართული ღვინის პოპულარიზაციის მიზნით, თბილისში ადგილობრივი ბაზრისთვის სრულიად განსხვავებული კონცეფციის ღვინის ბარი გაიხსნა, სადაც ღვინის რეალიზაციას, კონსულტანტის ნაცვლად, თავად მეღვინე ახდენს.როგორც „ბიზნესპარტნიორს“ მეღვინეობა „8000 ისტორიის“ მარკეტინგის ხელმძღვანელმა გვანცა ნიკოლეიშვილმა  განუცხადა, მსგავსი ფორმატის ბარის გახსნის იდეა მას და მის მეუღლეს გაუჩნდათ და მალევე, ეს იდეა რეალობად აქციეს.„მე და ჩემი მეუღლე უშუალოდ, პირისპირ ვხვდებით მომხმარებელს და ვაცნობთ ბარში წარმოდგენილი ღვინოების ისტორიას, ასევე, მათი წარმოების პროცესს. ამ ეტაპზე, ჩვენს ბარში წარმოდგენილია ჩვენივე წარმოებული 10 სახეობის ქართული ღვინო, მათ შორის - ბუდეშური, მცვივანი, ხიხვი, რქაწითელი და სხვაა“, - აღნიშნა გვანცა ნიკოლეიშვილმა.მისივე თქმით, მეღვინეობა „8000 ისტორიის“ განსხვავებული კონცეფციის ღვინის ბარით, უმეტესად, საქართველოში ტურისტული მიზნით მყოფი უცხოელები ინტერესდებიან, მათ შორის  - ვიზიტორები შვეიცარიიდან, ნიდერლანდებიდან და ევროპის სხვა წარმატებული სახელმწიფოებიდან.ბარში, რომელსაც „მეღვინე“ ჰქვია, ამჟამად, საშუალო და მაღალი საფასო სეგმენტის ღვინოები იყიდება.ცნობისთვის, მეღვინეობა „8000 ისტორია“ 2021 წელს დაარსდა და მისი ისტორია სათავეს კახეთში იღებს, კერძოდ -  სოფელ ველისციხეში. კომპანია ქართული ღვინოების ფართო ასორტიმენტს აწარმოებს — როგორც კლასიკური ევროპული მეთოდით დაყენებულ ღვინოებს, ასევე ქვევრის, ტრადიციულ ქართულ ღვინოებს.bp.ge 

"მიმდინარე წელს გვსურს, რომ იაპონიის ბაზარზე პირველი ნაბიჯები გადავდგათ" - "თბილღვინო"

მიმდინარე წელს გვსურს, რომ იაპონიის ბაზარზე პირველი ნაბიჯები გადავდგათ, - ამის შესახებ "თბილღვინოს" თანადამფუძნებელმა გიორგი მარგველაშვილმა  "ბიზნესპარტნიორთან" განაცხადა.მისივე ინფორმაციით, კომპანია იაპონიის გარდა, აშშ-ში განვითარების ახალ ეტაპზე გადადის, რომელიც პრემიუმ ღვინოების ექსპორტს ითვალისწინებს. "აშშ-ს ბაზარზე ჩვენ გვაქვს ერთგვარი პრემიუმიზაციის სტრატეგია და გვინდა, რომ ჩვენი ახალი პრემიუმ კატეგორიის ღვინოები წარვადგინოთ. მოლაპარაკება გვაქვს რამდენიმე მსხვილ ამერიკელ იმპორტიორთან და სავარაუდოდ, წლის ბოლომდე აღნიშნული პარტნიორობა შედგება. ვფიქრობთ, რომ აღნიშნულით ამერიკულ ბაზარზე ჩვენი განვითარების გარკვეული ახალი ეტაპი დაიწყება. აშშ-ში მცირე გადატვირთვები გვაქვს, თუმცა ახლა გადავდივართ ახალ ეტაპზე.რაც შეეხება ცნობადობას - როგორც აშშ-ში ისე, დასავლეთ ევროპის ბაზრებზე ქართული ღვინის ცნობადობა და გაყიდვები მზარდია. მაგალითად, 2025 წელს ჯამურად ჩვენი კომპანიის გაყიდვები 10%-ით გაიზარდა. ჩვენ მუდმივად ვვითარდებით, თუმცა კონკრეტულ საინვესტიციო მოცულობას ვერ გეტყვით. ჩვენ საკმაო ინვესტციების გვაქვს განხორციელებული ჩვენი საწარმოო სიმძლავრეების შექმნაში და გათანამედროვეობაში. ასევე, იმ მარკეტინგულ კამპანიებში, რომელსაც სხვადასხვა ქვეყანაში ვაწარმოებთ და კიდევ გვაქვს დაგეგმილი. გვსურს, რომ მსოფლიოს 10 მოწინავე ქვეყანაში შევიდეთ, როგორც ქართული მოწინავე გლობალური ღვინის ბრენდი. მათ შორის, აშშ, დიდი ბრიტანეთი, გერმანია, შვეიცარია, კანადა, სკანდინალვიის ქვეყნები და ასევე, იაპონია", - აცხადებს გიორგი მარგველაშვილი.ცნობისთვის, "თბილღვინო"  ქართული ღვინის მწარმოებელი წამყვანი კომპანიაა საქართველოში, რომლის პროდუქციაც ექსპორტზე მსოფლიოს 30 ქვეყანაში გადის. "თბილღვინოს" ისტორია გასული საუკუნის 60-იან წლებში იწყება. 1962 წელს საქართველოში ერთ-ერთი ყველაზე დიდი ღვინის საწარმო გაიხსნა, რომელიც 90-იან წლებში კერძო კომპანიად იქცა და მალევე დაიმკვიდრა მნიშვნელოვანი ადგილი ადგილობრივ და საერთაშორისო ბაზარზე. დაარსებიდან დღემდე, "თბილღვინომ" უდიდესი აღიარება და უამრავი ჯილდო მოიპოვა, მათ შორის ლონდონის საერთაშორისო კონკურსებზე: Decanter World Wine Awards, International Wine Challenge და International Wine & Spirit Competition."თბილღვინოს" ვენახებში გაშენებულია სხვადასხვა ქართული ყურძნის ჯიში და მდებარეობს ქინძმარაულის, მუკუზნის და წინანდლის მიკროზონებში.bp.ge