"ჰერბია" მწვანილისა და ბოსტნეულის წარმოებას აფართოებს - კომპანიამ HoReCa სექტორის მომარაგება დაიწყო

მწვანილისა და ბოსტნეულის მწარმოებელი კომპანია "ჰერბია", ადგილობრივ ბაზარზე მზარდი მოთხოვნის გამო, წარმოებას აფართოებს. როგორც კომპანიის თანადამფუძნებელი დავით ჯანელიძე "ბიზნესპარტნიორთან" აცხადებს, მოთხოვნა ყოველწლიურად მზარდია და დაახლოებით, 2 თვის წინ "ჰერბიამ" HoReCa სექტორის მომარაგებაც აქტიურად დაიწყო.„წინა წელს ჩვენი გაყიდვები თითქმის გაორმაგდა, ხოლო მიმდინარე წელს 50%-იან ზრდას ველოდებით. სწორედ ამიტომ ვგეგმავთ წარმოების გაზრდას — დაგვემატება 1 ჰექტარი სასათბურე მეურნეობა და ამ გაფართოებაში დაახლოებით, 1 მილიონ ლარს დავხარჯავთ. ამასთან, ვგეგმავთ, რომ HoReCa სექტორის მიმართულებით უფრო მეტად გავაქტიურდეთ.ამ ეტაპზე ჩვენი ძირითადი აქცენტი ადგილობრივ ბაზარზეა. მოთხოვნა იმდენად მაღალია, რომ სრულად დაკმაყოფილებასაც კი ვერ ვასწრებთ. ჩვენი პროდუქციის დაახლოებით 95% ადგილობრივ ბაზარზე იყიდება, ხოლო 5% ექსპორტზე - მათ შორის, გერმანიაში, ჰოლანდიასა და ბულგარეთში. მოთხოვნა უცხოეთიდან მაღალია, თუმცა ჩვენი პრიორიტეტი ჯერ ადგილობრივი ბაზრის მაქსიმალური მომარაგებაა“, – განმარტავს დავით ჯანელიძე.აღნიშნულის გარდა, ცოტა ხნის წინ კომპანიამ ონლაინ გაყიდვების კუთხით ახალი მიმართულება - Herbiadelivery.ge დაამატა. როგორც "ჰერბიას" თანადამფუძნებელი აცხადებს, ონლაინ გაყიდვები თანდათან იზრდება და ამ ინიციატივამ გაამართლა. გარდა ამისა, 2023 წელს „ჰერბიამ“ ბაზარზე ახალი პროდუქტი დაჭრილი მწვანილები და სალათის ფურცლების მიქსი წარმოადგინა, რაც როგორც დავით ჯანელიძე აღნიშნავს, საცალო ქსელებში და ასევე, HoReCa სექტორში დაინტერესებას იწვევს.ცნობისთვის, ''ჰერბიას" მაღალტექნოლოგიური საწარმო წყალტუბოში მდებარეობს. კომპანია  30-მდე დასახელების მწვანილს და ბოსტნეულს აწარმოებს და 200-ზე მეტი ადამიანი ჰყავს დასაქმებული.bp.ge

ტოკიოში ქართული ღვინის წარდგენა გაიმართა

ღვინის ეროვნული სააგენტოს მხარდაჭერით, ღვინის  მწარმოებელი ხუთი საოჯახო მარანი იაპონიის დედაქალაქ ტოკიოში გამართულ გამოფენაში ,RAW Wine Tokyo მონაწილეობდა. ამის შესახებ ინფორმაციას ღვინის ეროვნული სააგენტო ავცრელებს. იაპონელ ღვინის პროფესიონალებსა და მომხმარებლებს შესაძლებლობა მიეცათ, დაეგემოვნებინათ  ქართული მარნების: „ანდრიას ღვინო“, „ართანა ვაინსი“, „იორა“, „მანავი ვაინსი“, „გაბრიელი ვაინსი“  ღვინოები. გამოფენის სტუმრები ქართული ღვინის წარმოების უძველეს ტრადიციებსა და კულტურას გაეცნენ.გამოფენაზე RAW Wine  (The Artisan Wine Fair) მაღალი ხარისხის ბუნებრივი, ორგანული და ბიოდინამიკური ღვინოების მწარმოებლები იკრიბებიან. გამოფენის ორგანიზატორია ცნობილი ღვინის მაგისტრი საფრანგეთიდან იზაბელ ლეგერონი.გამოფენაზე ღვინის წარსადგენად ქართველმა მეწარმეებმა მხარდაჭერა იაპონიაში საქართველოს საელჩოსგანაც მიიღეს.იაპონია ქართული ღვინის ერთ-ერთი სტრატეგიული საექსპორტო ბაზარია. ღვინის ეროვნული სააგენტოს მხარდაჭერით, იაპონურ ბაზარზე ქართული ღვინის პირველი მასშტაბური წარდგენა 2014 წელს მოხდა. მას შემდეგ, სახელმწიფოს მხარდაჭერით,  ქართული ღვინის კომპანიები მუდმივად მონაწილეობენ პრესტიჟულ საერთაშორისო გამოფენებში Foodex Japan და Wine and Gourmet Japan, ტარდება ქართული ღვინის წარდგენა-დეგუსტაციები იაპონიის სხვადასხვა ქალაქში, იაპონელი ღვინის პროფესიონალებისა და მედიის წარმომადგენლებისთვის ეწყობა ღვინის  ტურები საქართველოს ყველა რეგიონში.აღსანიშნავია, რომ იაპონიაში ქართული ღვინის ექსპორტი მზარდია; მიმდინარე წლის ოთხ თვეში საქართველოდან იაპონიაში ექსპორტირებულია 71 ათას ლიტრამდე ღვინო, რაც 21%-ით აღემატება გასული წლის ანალოგიურ მაჩვენებელს.

თბილისში "ახალი ღვინის ფესტივალი" გაიმართა

ადგილობრივ ბაზარზე ქართული ღვინოპროდუქციის პოპულარიზაციის სახელწიფო პროგრამის ფარგლებში, თბილისში, „მთაწმინდის პარკში“, „ახალი ღვინის“ ფესტივალი გაიმართა. ამის შესახებ ინფორმაციას ღვინის ეროვნული სააგენტო ავრცელებს. სახელწიფო პროგრამას  ღვინის ეროვნული სააგენტო, საქართველოს გარემოს დაცვისა და სოფლის მეურნეობის სამინისტროსთან კოორდინაციით, უკვე მეორე წელია ახორციელებს.  პროგრამის ფარგლებში, ღვინის გამოფენები, კონკურსები და ფესტივალები მთელი ქვეყნის მასშტაბით იმართება, რაც მნიშვნელოვანია ქართული ღვინის პოპულარიზაციის, ღვინის ტურიზმის პოტენციალისა  და ღვინის სამომხმარებლო კულტურის გაზრდისთვის.„ახალი ღვინის ფესტივალი“ 2010 წლიდან, „ღვინის კლუბის“ ორგანიზებით ტარდება და მისი მიზანი ქართული ტრადიციული ქვევრის ღვინის პოპულარიზაცია, ახალი ჯიშებისა და მარნების აღმოჩენა, საქართველოში ღვინის განათლების დონის ამაღლება და სამომხმარებლო კულტურის განვითარებაა. წელს ფესტივალზე წარმოდგენილი იყო 170-მდე როგორც მცირე, საშუალო და დიდი მწარმოებლის 2024 წლის მოსავლის ღვინოები. ღონისძიება, ტრადიციულად, ქვევრის გახსნის ცერემონიით დაიწყო.აღსანიშნავია, რომ ფესტივალის მასშტაბი ყოველწლიურად  იზრდება და მას, ტრადიციულად, ქართველი და უცხოელი ღვინის პროფესიონალები და მოყვარულები საქართველოდან და მსოფლიოს სხვადასხვა ქვეყნიდან სტუმრობენ.

დავით სონღულაშვილი: ჩვენ ვაგრძელებთ მასშტაბური სახელმწიფო პროექტების განხორციელებას

გარემოს დაცვისა და სოფლის მეურნეობის მინისტრი დავით სონღულაშვილი კახეთის მხარეში იმყოფებოდა. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს. „დღეს თელავში გარემოსდაცვითი ზედამხედველობის დეპარტამენტის რეგიონული სამმართველოს ახალი შენობა გავხსენით, რომელიც აღჭურვილია თანამედროვე სტანდარტების ყველა საჭირო ინვენტარითა და ტექნიკით. პროფესიონალიზმთან ერთად, სათანადო სამუშაო პირობები, ასევე სოციალური გარანტიები და დაცულობის ხარისხი არის ის, რაც ჩვენი თანამშრომლების საქმიანობას ხდის გაცილებით ეფექტიანს. შესაბამისად ვიღებთ შედეგსაც. ჩემთვის განსაკუთრებულად მნიშვნელოვანია შევხვდე თანამშრომლებს. ადგილზე მოვისმინო საჭიროებების შესახებ - რა გამოწვევები აქვთ, სად ესაჭიროებათ გაძლიერება და მხარდაჭერა.  სწორედ ამ მიზნით, დღეს კახეთში გარემოსდაცვითი ზედამხედველობის დეპარტამენტის თანამშრომლებთან, დაცული ტერიტორიების რეინჯერებთან და ტყის მცველებთან სამუშაო შეხვედრები გაიმართა“, - განაცხადა დავით სონღულაშვილმა.მინისტრმა აგრარული მიმართულების განვითარების მხარდაჭერის მიზნით განხორციელებული და მიმდინარე სახელმწიფო პროექტების, ასევე, მეწარმეებთან და ფერმერებთან  პირდაპირი კომუნიკაციის მნიშვნელობაზე გაამახვილა ყურადღება.„მნიშვნელოვანია მეწარმეებისა და ფერმერებისგან მოვისმინოთ შეფასებები ყველა იმ პროექტზე, რომელსაც სამინისტრო სოფლის მეურნეობის განვითარებისთვის ახორციელებს; სამომავლოდ, სწორედ ამ ინფორმაციის შეჯერებით ვიმოქმედებთ. ასე ვიქნებით გაცილებით მოქნილები და შედეგზე ორიენტირებული. მოგეხსენებათ, ქართული აგროწარმოება მზარდია. პროდუქცია იყიდება როგორც ადგილობრივ ბაზარზე, ასევე აქტიურად გადის ექსპორტზე, რაც ჩვენი მთავარი მიზნის - ეკონომიკის გაძლიერების და ჩვენი მოსახლეობის კეთილდღეობის ზრდის საფუძველია. ჩვენ ვაგრძელებთ მასშტაბური სახელმწიფო პროექტების განხორციელებას, რითაც მხარს ვუჭერთ ქართული ხარისხიანი, უვნებელი პროდუქციის წარმოებას“, - აღნიშნა გარემოს დაცვისა და სოფლის მეურნეობის მინისტრმა.კახეთში ვიზიტის ფარგლებში, დავით სონღულაშვილმა გარემოსდაცვითი ზედამხედველობის დეპარტამენტის კახეთის რეგიონული სამმართველოს ახალი შენობა გახსნა. მინისტრმა სამუშაო შეხვედრები  გამართა გარემოსდაცვითი ზედამხედველობის დეპარტამენტის, სატყეო და დაცული ტერიტორიების სააგენტოების თანამშრომლებთან.დავით სონღულაშვილმა კახეთში სახელმწიფოს მხარდაჭერით შექმნილი საწარმოები: „ცივის ყველი“, „მეღვინეობა ვინე პონტო“ და „ბაბანეურის მარანი“ დაათვალიერა.მინისტრთან ერთად იმყოფებოდნენ კახეთის  მხარის სახელმწიფო რწმუნებული გიორგი ალადაშვილი, რეგიონული პოლიტიკისა და თვითმმართველობის კომიტეტის თავმჯდომარე ირაკლი ქადაგიშვილი  და შესაბამისი სამსახურების წარმომადგენლები.

დავით სონღულაშვილი ყვარელში სატყეო სამსახურის თანამშრომლებს შეხვდა და მათ სამუშაო პირობებს ადგილზე გაეცნო

გარემოს დაცვისა და სოფლის მეურნეობის მინისტრი დავით სონღულაშვილი, სახელმწიფო რწმუნებულთან კახეთის მხარეში გიორგი ალადაშვილთან და რეგიონული პოლიტიკისა და თვითმმართველობის კომიტეტის თავმჯდომარე ირაკლი ქადაგიშვილთან ერთად, ყვარელში სატყეო სამსახურის თანამშრომლებს შეხვდა და მათ სამუშაო პირობებს  ადგილზე გაეცნო. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს. კახეთის სატყეო სამსახურში 15 მეტყევე და 57 ტყის მცველია დასაქმებული. შენობა აღჭურვილია  მაღალი სტანდარტების საჭირო ინვენტარით და ტექნიკით.  ადგილობრივი მოსახლეობა განახლებულ სივრცეში ეროვნული სატყეო სააგენტოს ყველა სერვისით  სარგებლობს.სატყეო სამსახურის თანამშრომლებთან გამართულ შეხვედრაზე მინისტრმა ეროვნული სატყეო სააგენტოს თანამშრომელთა  სამუშაო პირობებსა და სოციალურ გარანტიებზე გაამახვილა ყურადღება და ხაზგასმით აღნიშნა, რომ განხორციელებულმა საკანონმდებლო ცვლილებებმა და შესაბამისმა აღსრულებამ მათი დაცულობის ხარისხი მნიშვნელოვნად გაზარდა.აღსანიშნავია, რომ ეროვნული სატყეო სააგენტო მეტყევეების სიცოცხლისა და ჯანმრთელობის დაზღვევას უზრუნველყოფს; გარდა ამისა, უკანონო ჭრების გამოვლენის დროს, რაც ხშირ შემთხვევაში გარკვეულ სირთულეებს უკავშირდება, განსაზღვრულია წახალისების ფორმის გამოყენება, რაც მნიშვნელოვნად ზრდის დასაქმებულთა მოტივაციას.ეროვნული სატყეო სააგენტო, ქვეყნის მასშტაბით,  9 რეგიონულ სატყეო სამსახურს აერთიანებს.