ღვინის ეროვნული სააგენტოს მხარდაჭერით, ქართული ღვინის წარდგენა ლონდონის ღვინის ფესტივალზე გაიმართა

"ადგილობრივ ბაზარზე ზადიანი ღვინო დიდ პრობლემას არ უნდა წარმოადგენდეს" - ზაზა ასათიანი

2027 წლის 1-ელი თებერვლიდან ადგილობრივ ყველა კატეგორიის ღვინოზე სავალდებულო დეგუსტაციის ამოქმედებას კომპანია „ღვინის ქურდების“ თანადამფუძნებელი ზაზა ასათიანი „ბიზნესპარტნიორთან“ აფასებს.მისი თქმით, ადგილობრივ ბაზარზე ზადიანი (არასასურველი არომატები და გემოები, რომლებიც ღვინოს არასწორი დაყენების, შენახვის ან ჰაერთან კონტაქტის შედეგად უჩნდება) ღვინო დიდ პრობლემას არ უნდა წარმოადგენდეს, რადგან ქართული მეღვინეობა განვითარდა. შესაბამისად, მისი თქმით, დეგუსტაციის პროცესი ბიუროკრატიულ მექანიზმებს შექმნის, რამაც შესაძლოა ღვინის ბაზარზე გამოჩენა გარკვეული დროით გაწელოს.„საექსპორტო ღვინო ყოველთვის გადის დეგუსტაციას და შემიძლია გითხრათ, რომ ეს პროცესი საკმაოდ ლმობიერია. ანგარიშს ბევრ ფაქტორს უწევენ. თუ ეს პროცესი ისევე ლმობიერი დარჩება, როგორც ახლა არის - შესაძლოა შეიქმნას გარკვეული ბიუროკრატიული მექანიზმი, რომელიც ღვინის ბაზარზე გამოჩენის პროცესს გააჭიანურებს და მომხმარებელს მხოლოდ და მხოლოდ ზადიანი ღვინისგან დაიცავს. რამდენად სწრაფად და გამჭვირვალედ მოხდება დეგუსტაციის პროცესი, მნიშვნელოვანი საკითხია. ყველა რეგულაციას აქვს დადებითი და უარყოფითი მხარეები და განვითარებას აფერხებს ხოლმე. შესაძლოა სწორი მიმართულებას აძლევდეს, მაგრამ ტემპს ნამდვილად აფერხებს. პირადად მე ვფიქრობ, რომ ზადიანი ღვინო დიდ პრობლემას არ უნდა წარმოადგენდეს ადგილობრივ ბაზარზე, რადგან ქართული მეღვინეობა განვითარდა და აღარ არის 90-იანი წლები, როცა გაფუჭებული ღვინო იყიდებოდა ყველგან. აქედან გამომდინარე, მეღვინეები იცავენ მინიმალურ ხარისხს და დიდი მოთამაშეები მით უმეტეს. ამასთან დახლის ღვინოებიც უკვე სტანდარტიზებულია.ვფიქრობ, რომ ბაზარზე არსებული ღვინიდან წუნდებული ძალიან მცირე რაოდენობა იქნება, რადგან უკვე ძალიან იშვიათად შემხვედრია წუნდებული ღვინო“, - აცხადებს ზაზა ასათიანი.ცნობისთვის, კანონპროექტით შემოდის ალკოჰოლიანი სასმელების სავალდებულო QR-ნიშანდება, რომელიც უნდა შეიცავდეს ინფორმაციას სერტიფიცირების შესახებ და ალკოჰოლიანი სასმლის შესახებ. ნიშანდების წესი მინისტრმა უნდა დაამტკიცოს, ხოლო სისტემა 2027 წლის 1 თებერვლიდან ამოქმედდება.გარდა ამისა, საქართველოს პარლამენტმა მესამე მოსმენით განიხილა და მხარი დაუჭირა „ვაზისა და ღვინის შესახებ“ საქართველოს კანონში ცვლილებებს.  კანონპროექტის თანახმად, იცვლება „მცირე ზომის მარნის“ დეფინიცია და მისი წლიური წარმადობის მაქსიმალური ზღვარი 40 000 ლიტრიდან 25 000 ლიტრამდე მცირდება. ამასთან, ტერმინი „სახლის ღვინო“ იცვლება ტერმინით - „ბუნებრივი ღვინო“. ბუნებრივი ღვინო მიიღება ორგანული ყურძნის ტკბილის სპონტანური დადუღებით, სადაც დაუშვებელია ნებადართული ოპერაციებისა და ნივთიერებების გამოყენება, გარდა გოგირდის დიოქსიდისა, რომლის შემცველობა არ უნდა აღემატებოდეს 50 მგ/ლ-ს.bp.ge 

"ნედლი რძის პრობლემის მოგვარებისთვის, ფალსიფიცირებული პროდუქტების მკაცრი კონტროლი აუცილებელია" - გიორგი ლიპარტელიანი

"ქართული რძის პროდუქტების" დამფუძნებლის, გიორგი ლიპარტელიანის შეფასებით, გარემოს დაცვისა და სოფლის მეურნეობის სამინისტროს  მიერ შემუშავებული ნედლი რძის წარმოების წახალისებისა და ბაზრის რეგულირების მიზნით შემუშავებული ახალი  გეგმა გაამართლებს იმ შემთხვევაში, თუ ქვეყნის მასშტაბით  ფალსიფიცირებული პროდუქტების იდენტიფიცირება და მკაცრი კონტროლი დაიწყება.ამასთან, როგორც გიორგი ლიპარტელიანი "ბიზნესპარტნიორთან" განმარტავს, რძის ფხვნილის რაიმე სახით შეზღუდვა არ შეიძლება, რადგან აღნიშნული ბაზარზე რძის დეფიციტს გამოიწვევს,მისივე შეფასებით, ქვეყანაში არსებობს კარგი პირობები ფერმერული მეურნეობის განვითარებისთვის, თუმცა დაინტერესებული პირებისგან საკმარისი ინტერესი და რესურსი ჯერ არ ჩანს. "პირველ რიგში, აუცილებელია ქვეყანაში რძის წარმოების გაზრდა და სხვადასხვა წარმოების მეთოდების წახალისება. ყველაზე მნიშვნელოვანია ფალსიფიცირებული პროდუქტების იდენტიფიცირება და მკაცრი კონტროლის დაწყება. ზოგადად, თუ შეიზღუდება მცენარეული ცხიმის შემცველი პროდუქტების გაყიდვა, ეს ნედლი რძის მოხმარებას ვერ გაზრდის. ნედლი რძის ხელშეწყობის ყველაზე ეფექტური გზა ბაზარზე ფალსიფიცირებული პროდუქტების მკაცრი კონტროლია. ხშირია შემთხვევები, როდესაც ყველი თითქოს ნატურალური რძითაა დამზადებული რეალურად კი აღნიშნულ სტანდარტს არ შეესაბამება - მაგალითად, რესტორნებში შემოთავაზებული ყველის ასორტიც ხშირად არ არის ნატურალური. ამ ყველაფრის კონტროლი უნდა გამკაცრდეს. საჭიროა მეწარმეების აქტიური მონიტორინგი, რაც საბოლოოდ ნატურალურ პროდუქტებზე მოთხოვნის ზრდასაც გამოიწვევს. თუ გარკვეული პროდუქტების, მაგალითად რძის ფხვნილის, მოხმარებას შევზღუდავთ, ეს  ბაზარზე დეფიციტის ზრდას გამოიწვევს და ნატურალური რძის სახელით არანატურალური პროდუქტები გაიყიდება. დღეს საქართველოში ნედლი რძე დეფიციტურია, თუმცა ეს არ ნიშნავს, რომ რძის ფხვნილი თავისთავად მავნებელია", - აცხადებს გიორგი ლიპარტელიანი."ქართული რძის პროდუქტების" დამფუძნებელი მომხმარებლების შესახებაც საუბრობს და აღნიშნავს, რომ ამ კუთხით სამინისტროს გადაწყვეტილება მისასალმებელია. კერძოდ, აუცილებელია პროდუქტების მკაფიოდ განსხვავება და მყიდველის სათანადო ინფორმირება."გეგმას დადებითად ვაფასებ მომხმარებლების კონტექსტში. ამ შემთხვევაში აუცილებელია პროდუქტების მკაფიოდ განსხვავება და მყიდველების სათანადო ინფორმირება. საჭიროა ანოტაციებზე მუშაობა, რათა მომხმარებელი უფრო ინფორმირებული იყოს. თუმცა აღნიშნულმა პროცესმა ბიზნესს ხელი არ უნდა შეუშალოს.ეტიკეტირების ცვლილებას რაც შეეხება, ყველა კომპანიისთვის პრობლემა იქნება, რადგან უმეტესწილად 5-6 თვის მარაგი გვაქვს. თუმცა სახელმწიფო უწყების წარმომადგენლებმა განაცხადეს, რომ აღნიშნულს გაითვალისწინებენ... ასევე უნდა შეიცვალოს დიზაინი, რაც ფინანსური კუთხით ბიზნესისთვის ნამდვილად დამატებითი ხარჯია", - აცხადებს სექტორის წარმომადგენელი. ცნობისთვის, გარემოს დაცვისა და სოფლის მეურნეობის სამინისტრომ ნედლი რძის წარმოების წახალისებისთვის ახალი გეგმა შეიმუშავა. რეფორმის ფარგლებში იგეგმება ნებაყოფლობითი ხარისხის ნიშნის (პიქტოგრამის) დანერგვა, რომელიც მომხმარებელს მიანიშნებს, რომ პროდუქტი 100%-ით ქართული ნედლი რძისგან არის დამზადებული. ასევე სავალდებულო გახდება მცენარეული ცხიმის შემცველი პროდუქტების მკაფიო ვიზუალური მარკირება როგორც ადგილობრივ, ისე იმპორტირებულ ნაწარმზე. სავაჭრო ქსელებში აღნიშნული პროდუქტები განცალკევებულად განთავსდება.გეგმის მნიშვნელოვანი ნაწილი ეთმობა სახელმწიფო კონტროლის გაძლიერებას. სურსათის ეროვნული სააგენტო გაამკაცრებს მონიტორინგს HoReCa სექტორში, აგრარულ ბაზრებსა და სადისტრიბუციო ქსელებში.ცნობისთვის, შპს "ქართული რძის პროდუქტები" ადგილობრივ ბაზარზე 2024 წელიდან ოპერირებს.bp.ge 

"ლავანდას ეთერზეთსა და კულინარიულ ლავანდაზე მოთხოვნა სტაბილურია" - "ნუკრიანის ლავანდის" სანერგე მეურნეობა

ლავანდას ეთერზეთით როგორც უცხოელები, ისე ქართველები ინტერესდებიან. როგორც ჩემთვის არის ცნობილი ეთერზეთს მასაჟისთვის იყენებენ. გარდა ამისა, მოთხოვნაა კულინარიულ ლავანდაზე, რომელსაც ძირითადად  HoReCa სექტორში ყიდულობენ, -  ამის შესახებ "ნუკრიანის ლავანდის" სანერგე მეურნეობის ავტორი და განმახორციელებელი კომპანია "ინფინიტი ტექნოლოჯი ჯორჯიას" დამფუძნებელი  ალექსანდრე მანველოვი "ბიზნესპარტნიორთან“ აცხადებს.მისივე ინფორმაციით, გაყიდვების ზრდის ტენდენცია სტაბილურია და წინა წლის მონაცემებთან შედარებით არ შეცვლილა."წელს ვიზიტორებს არ მივიღებთ, რადგან ჩვენთვის საინტერესო მიმართულება აღარ არის. კომპანია ამ ეტაპზე ეთერზეთებს, ჰიდროლატებს, საშეს და კულინარიულ ლავანდას აწარმოებს. გარდა ამისა, სანერგე მეურნეობაში მომხმარებლებს ლავანდის ნერგების შეძენაც შეუძლიათ", - აცხადებს ალექსანდრე მანველოვი.აღსანიშნავია, რომ სანერგე მეურნეობა ლავანდას საპონსაც აწარმოებდა, თუმცა აღნიშნული მიმართულებაც მაღალი თვითღირებულების გამო შეწყვიტა.ალექსანდრე მანველოვის ინფორმაციით, მათი პროდუქცია ამჟამად, როგორც ონლაინ, ისე ადგილზე - სანერგე მეურნეობაში იყიდება."ნუკრიანის ლავანდა" საქართველოს თანამედროვე ისტორიაში ლავანდის პირველი პლანტაციაა, რომელიც კახეთში, 2018 წელს გაშენდა. პლანტაცია 1,5 ჰა-ზეა გაშენებული.bp.ge 

"სამეწარმეო ვენახის გაშენების წესი უფრო მსხვილი მევენახეებისთვისაა აუცილებელი" - "მარანი გელოვანი"

"მარანი გელოვანის" დამფუძნებლის, აკაკი გელოვანის შეფასებით, სამეწარმეო ვენახის გაშენების წესის არსებობა უფრო ღვინის საწარმოების მფლობელებს და მსხვილ მევენახეებს სჭირდებათ, ვიდრე მცირე მარნებს.როგორც აკაკი გელოვანი "ბიზნესპარტნიორთან" განმარტავს, მცირე მარნები ძირითადად ისედაც ხარისხზე ორიენტირებული არიან, ხოლო მსხვილი მევენახეებისთვის გარკვეული ვალდებულებების არსებობდა  აუცილებელია. ამასთან, ბიზნეს სექტორის წარმომადგენლის თქმით, მცირე მარნებისთვის აღნიშნული წესის შესრულება ფინანსურად საკმაოდ მძიმე ტვირთია."ვენახის დარეგისტრირება მოიცავს გარკვეული თანხის გაღებას, ადგილზე სპეციალისტების მოყვანაც აუცილებელია. რაც შეეხება ხარისხს, პირადად მე დიდი მარანი არ მაქვს - სოლიდური თანხა გადავიხადე, რომ კარგი ნერგები მეყიდა. იმის თქმა მინდა, რომ ჩემი პირდაპირი ინტერესია მაღალი ხარისხის ღვინო ვაწარმოო, საუკეთესო ვენახი მქონდეს. აღნიშნული წესი ინდუსტრიული სფეროს წარმომადგენლებს უფრო დაეხმარებათ. კერძოდ, ვისაც ქარხნები აქვთ, მათთვის უფრო საჭიროა, გარკვეული ვალდებულებები ჰქონდეთ. პატარა მარნების შემთხვევაში, ისედაც შეზღუდული მასშტაბით ვმუშაობთ, ამიტომ მაღალ ხარისხზეც გავდივართ. ღვინო ექსპორტზე გაგვაქვს, უცხოეთში ვინ მოიწონებს პროდუქტს, თუ მაღალი ხარისხი არ გვექნება?! ჩვენი პირდაპირი ინტერესია ვენახი, მარანი, ღვინო და ეტიკეტი მაღალი ხარისხის იყოს. აღნიშნული წესი კარგი იქნებოდა, თუ სახელმწიფო სპეციალისტების ჯგუფს თავად გამოყოფდა და ვენახებს შეამოწმებდა. ამ შემთხვევაში პირიქით, მოხარული ვიქნებოდი, თუმცა ახლა ფინანსური კუთხით ეს ყველაფერი საკმაოდ რთული შესასრულებელია", - აცხადებს აკაკი გელოვანი.მეღვინე გამოწვევების შესახებაც საუბრობს და აღნიშნავს, რომ საგზაო ინფრასტრუქტურის გაუმართაობა კვლავ პრობლემად რჩება, რაც ბიზნესის განვითარებას ხელს უშლის.შეგახსენებთ, რომ "მარანი გელოვანი" თბილისიდან 25კმ-ში, სოფელ ქვემო წყლულეთში, მდებარეობს და კახური ჯიშის ბიო ღვინოს ამზადებს. ასორტიმენტში შედის: "რქაწითელი", "კახურ მწვანე", "ქისი" და "საფერავი". ექსპორტზე კი 2017 წლიდან გადის, საექსპორტო ქვეყნებია - იაპონია, აშშ, გერმანია, პოლონეთი, ავსტრია, საფრანგეთი და შვეიცარია.ცნობისთვის, გარემოს დაცვისა და სოფლის მეურნეობის მინისტრის ბრძანებით სამეწარმეო ვენახის გაშენების წესი 27 აპრილს დამტკიცდა. დოკუმენტი განსაზღვრავს სამეწარმეო ვენახის გაშენებასა და აღდგენა-განახლებასთან დაკავშირებულ პრინციპებს და პირობებს.bp.ge 

"ვინ ეგარი" ხილის გადამამუშავებელ ახალ საწარმოში პირველ მოსავალს აგვისტოში მიიღებს

ვაშლის ძმრის მწარმოებელი კომპანია "ვინ ეგარი" ხილის გადამამუშავებელ ახალ საწარმოში პირველ მოსავალს აგვისტოში მიიღებს. როგორც კომპანიის დამფუძნებელმა მარიამ პატარიძემ „ბიზნესპარტნიორთან“ განაცხადა, ლეჩხუმში ახალი საწარმოს მშენებლობა უკვე დასრულებულია და პროექტი მერიაშიც ჩაბარებულია.მისივე ინფორმაციით, "ვინ ეგარი" ახალ საწარმოში მუშაობის დაწყების შემდეგ წარმადობის ზრდასა და ვაშლის ჩირის წარმოებად გეგმავს."ჩვენს პროდუქციაზე მოთხოვნა მზარდია და შეიძლება ითქვას, რომ ყოველ წლიურად ორმაგდება. ახალი საწარმოს მშენებლობისთვის დაახლოებით, 500 000 ლარის ინვესტიცია განხორციელდა. ჩვენი ვაშლის ძმარი მოგეხსენებათ, რომ აბსოლუტურად ქართული, უწამლი ვაშლისგან მზადდება. შესაბამისად, ვაშლს ფერმერებისგან ჩავიბარებთ, რაც ადგილობრივი პროდუქციის რეალიზაციასაც ხელს შეუწყობს. ვფიქრობთ, რომ წარმადობის გაზრდის შემდეგ გვექნება შესაძლებლობა, რომ HoReCa სექტორშიც განვვითარდეთ. ამჟამად, ჩვენი პროდუქცია 40-მდე მაღაზიაშია წარმოდგენილი. მათ შორის, სულ ახლახან "გუდვილის" ქსელში შევედით, რაც ვფიქრობთ, კიდევ უფრო გაგვიზრდის გაყიდვებს", - აცხადებს მარიამ პატარიძე.მანვე აღნიშნა, რომ კომპანია პროდუქციის 100%-ვე ადგილობრივ ბაზარზე ყიდის, თუმცა მომდევნო წლიდან ექსპორტზე გასვლასაც გეგმავს.ცნობისთვის,"ვინ ეგარის” ვაშლის ძმარი გახლავთ ლეჩხუმის მაღალ მთიან სოფელში დაწყებული პატარა საოჯახო ბიზნესი, რომელიც 2021 წელს ფონდი “აფხაზინტერკონტის” ინოვაციურ საგრანტო კონკურსში გამარჯვების შემდეგ დაიწყო. კომპანია ტონობით ვაშლის გადამუშავებას ახდენს.პროდუქციის შეძენა შესაძლებელია, "წისქვილი ბაზრის" ფილიალებში, ასევე სხვადასხვა აგრო მაღაზიებში, როგორიცაა "ფერმარტი", "აგრო სახლი", "წილკანი" "ეკო კუთხე", "სუფრა", "მასა", ეპიკალურიე შოპ", ასევე, სუპერმარკეტების ქსელ "ნატურალში".  ვაშლის ძმრით მარაგდება ასევე, ქართული სტარტაპს/სტრიტ ფუდი -  "შოთი". სამომავლოდ კომპანია რეგიონების ქსელურ მაღაზიებშიც რეალიზაციასაც გეგმავს.bp.ge