კონფერენციაზე - AgriFuture Georgia აგროწარმოების გლობალურ ტენდენციებზე იმსჯელეს

"ქართული ჩაი ნაზი არომატით გამოირჩევა, რაც უცხოელ მომხმარებლებში განსაკუთრებულ ინტერესს იწვევს" - "ჩაი მამათი"

კომპანია "ჩაი მამათის" დამფუძნებლის, დირექტორის, კახა ურუშაძის ინფორმაციით, ოზურგეთის ჩაის ევროპულ ბაზარზე სერიოზული პერსპექტივა აქვს.როგორც მეწარმე "ბიზნესპარტნიორთან" აღნიშნავს, ქართული პროდუქტი თავისი ნაზი არომატითა და განსხვავებული გემოვნური თვისებებით გამოირჩევა, რაც მას მაგალითად, თურქული, აზერბაიჯანული ჩაისგან განასხვავებს და უცხოელ მომხმარებლებში განსაკუთრებულ ინტერესს იწვევს."ყოფილი საბჭოთა კავშირის ქვეყნებში: რუსეთში, უკრაინაში, ყაზახეთში ქართული ჩაი ყველას ახსოვს. შესაბამისად, ძალიან დიდი პრობლემების გარეშე გარკვეული ნიშის დაკავება შეგვიძლია. კონკრეტულად ოზურგეთის ჩაი გერმანიაში, საფრანგეთში ძალიან აქტიურად იყიდება, სერიოზული პერსპექტივა გვაქვს. ჩვენს ნედლეულს განსხვავებული გემოვნური თვისებები აქვს, თურქული, აზერბაიჯანული პროდუქტისგან გამორჩეული - ქართულ ჩაის უფრო ნაზი არომატი აქვს და თავისი მომხმარებელი ჰყავს", - აცხადებს კახა ურუშაძე.კომპანიის დამფუძნებელი კონკურენციის საკითხსაც მიმოიხილავს და ხაზს უსვამს, რომ ქართულ ჩაის უცხოურ ბაზარზე საკუთარი ნიშის დაკავება მაღალი ხარისხითა და გამორჩეული გემოვნური თვისებებით შეუძლია."მოგეხსენებათ უცხოეთში ძალიან დიდი კონკურენციაა და აღნიშნულ გამოწვევას მაღალი ხარისხით, გამორჩეული დიზაინით უნდა შევხვდეთ. ამასთან, აუცილებელი მკვეთრი მარკეტინგული ჩართულობა. სხვათა შორის, ევროპაშიც მაღალი ხარისხის ჩაი ხშირი არ გახლავთ, შესაბამისად, ჩვენი ნიშის დაკავება შეგვიძლია", - აღნიშნავს კახა ურუშაძე.წარმოების ხელმძღვანელი ექსპორტის მნიშვნელობასაც განიხილავს. მისი თქმით, კომპანიის მთავარი მიზანი - პროდუქციის უცხოეთში გატანაა."ამჟამად, პროდუქციის ნიმუშები საბერძნეთში, იტალიაში, აშშ-ში გადავაგზავნეთ, ლაბორატორიამ შეამოწმა და უმაღლესი შეფასება მივიღეთ. პროდუქციის გატანა ევროკავშირის და ყოფილი საბჭოთა კავშირის ქვეყნებში გვინდა. საექსპორტო ხაზის მიმართულებით აქტიურად ვმუშაობთ, მოლაპარაკებებიც მიმდინარეობს, თუმცა დამატებით დეტალებს ამ ეტაპზე, ვერ დაგიკონკრეტებთ", - აცხადებს "ჩაი მამათის" დირექტორი.ასევე, "ჩაი მამათის" დირექტორი უშუალოდ გაყიდვების შესახებაც საუბრობს და ხაზს უსვამს, რომ გასული წლის ანალოგიურ პერიოდთან შედარებით პროდუქციის რეალიზაცია გაორმაგდა."გაყიდვების რაოდენობა დადებითი დინამიკით მიდის - შარშან "გუდვილში", როდესაც შევედით, დეგუსტაციაც ჩავატარეთ, მომხმარებელს, როგორც ჩანს, პროდუქცია მოეწონა, თუმცა გარკვეული სახის პრობლემაც გვაქვს - მარკეტინგი. ძალიან მნიშვნელოვანია სწორი მარკეტინგული ჩართულობა, რომ ჩვენს შესახებ საზოგადოების დიდმა ნაწილმა გაიგოს.სუფთა პროდუქტს ვაწარმოებთ, რომელსაც არაჯანსაღი დანამატი არ აქვს.  რაც შეეხება ნედლეულს, გარდა ჩვენი ჩაის პლანტაციისა (14 ჰექტარი) ნედლეულს ადგილობრივი ფერმერებისგანაც ვიძენთ. ბაზარზე "გუდვილში" ვართ წარმოდგენილი, თუმცა გვინდა, რომ გავფართოვდეთ და ქსელური მარკეტები მოვიცვათ. ამ ეტაპზე, მოლაპარაკება "ნიკორასთან", "ფრესკოსთან" მიმდინარეობს. ამასთან, პროდუქციას სოციალური ქსელის მეშვეობითაც ვყიდით", - აცხადებს კახა ურუშაძე.ცნობისთვის, კომპანია "ჩაი მამათი" ლანჩხუთის რაიონში, სოფელ მამათში  მდებარეობს, პლანტაცია გაშენებული 14 ჰექტარზე აქვს. კომპანია ადგილობრივ ბაზარზე 2 წელია ოპერირებს.bp.ge 

ამერიკელმა იმპორტიორმა ღვინო აგვისტოში გამამზადებინა, თუმცა ამ დრომდე ველოდები - "ღვარძელაშვილების მარანი"

ამერიკის ტვირთი გამზადებული მაქვს, მაგრამ არ მიაქვთ. ამერიკელმა იმპორტიორმა აგვისტოში გამამზადებინა ღვინო, უნდა წაეღო, თუმცა ამ დრომდე ველოდები. ვწერ და მისგან პასუხია "დამაცადე", - ამის შესახებ ბიოღვინოს მწარმოებელი კომპანიის “ღვარძელაშვილის მარნის“ დამფუძნებელი გიორგი ღვარძელაშვილი "ბიზნესპარტნიორთან" აცხადებს.მისივე შეფასებით, აღნიშნულის მიზეზი აშშ-ის ახალი სატარიფო პოლიტიკაა."იმპორტიორთან ბოლო კომუნიკაციის დროს მან მითხრა, რომ აშშ-ში ღვინის რეალიზაცია ზოგადად შემცირდა. როგორც მან განმიმარტა ახალი თაობა ტრადიციულ ღვინოს აღარ მოიხმარს და უფრო პოპულარული უალკოჰოლო ღვინო გახდა. სწორედ ამიტომ ღვინის მოხმარება აშშ-ში შემცირდა. გარდა ამისა, მათივე განმარტებით, ტრამპის მიერ შემოღებული ახალი ტარიფების გამო იმპორტიორს აღარ უღირს, რომ აშშ-ში ღვინო შეიტანოს. ცუდი სიტუაციაა მსოფლიოში. ქართული ღვინის მოხმარების სტატისტიკა ყოველ წელს მზარდი იყო, თუმცა 2024 წლის ბოლო კვარტალმა და 2025 წელმა აჩვენა, რომ ქართული ღვინის ექსპორტმა არამარტო აშშ-ში, არამედ ევროპაშიც იკლო. ჩემი წარმადობის 70% ექსპორტზე იყიდებოდა. ახლა კი ეს მაჩვენებელი 50%-მდე შემცირდა. მიუხედავად ამისა, აღსანიშნავია, რომ გაყიდვები არ შეცვლილა, რადგან ადგილზე მყავს ძალიან ბევრი ვიზიტორი. მარნის დაარსების დღიდან დღემდე - წელს რეკორდული რაოდენობის ტურისტს ვუმასპინძლე. ისინი ძირითადად, ინგლისიდან იყვნენ. ადრე ექსპორტის მიმართულების განვითარებას ვგეგმავდი, თუმცა, რადგან გლობალურად ასეთი მდგომარეობაა, გადავწყვიტე მარანს და ტურისტულ ნაწილს უფრო დიდი ყურადღება დავუთმო", - აცხადებს გიორგი ღვარძელაშვილი.მანვე აღნიშნა, რომ "ღვარძელაშვილების მარანი" იაპონიაში ექსპორტისთვისაც ემზადება, მოლაპარაკებები დასრულებულია და პირველი ექსპორტიც სავარაუდოდ, მალე განხორციელდება.ცნობისთვის, "ღვარძელაშვილის მარნის" ვენახი თელავის რაიონის სოფელ  კონდოლში, 5 ჰექტარ მიწის ფართობზეა გაშენებული. კომპანია ღვინოს 2014 წლიდან აწარმოებს, ხოლო ექსპორტზე 2018 წლიდან გადის.რაც შეეხება ამერიკის სატარიფო პოლიტიკას, აშშ-ის პრეზიდენტმა დონალდ ტრამპმა ამერიკაში იმპორტირებულ თითქმის ყველა საქონელზე მინიმუმ 10%-იანი ტარიფების დაწესების შესახებ  მიმდინარე წლის აპრილში განაცხადა. აღსანიშნავია ისიც, რომ ტრამპის მიერ გამოცხადებული ტარიფების ფარგლებში საქართველოს, სომხეთისა და აზერბაიჯანის მიმართ საბაზისო 10%-იანი ტარიფი იმოქმედებს. რაც შეეხება ვადებს, საბაზისო 10%-იანი ტარიფები 5 აპრილს ამოქმედდა.CNBC-ის ინფორმაციით, ტარიფები არ ეხება შემდეგ პროდუქციას:  ფარმაცევტული პროდუქტები ნახევარგამტარები ხის მასალა სპილენძი და ოქრო ენერგეტიკული რესურსები და მინერალები, რომლებიც აშშ-ში მიუწვდომელია. bp.ge 

"ღვინის ექსპორტს წელიწადში გაყიდვების 10%-ი უჭირავს" - მერებაშვილის მამული

მერებაშვილის მამულის დამფუძნებლის, შალვა მერებაშვილის ინფორმაციით, გასული წლის ანალოგიურ პერიოდთან შედარებით, ტურისტულ ობიექტზე ვიზიტორების რაოდენობა 15%-ით გაიზარდა, ხოლო მომხმარებლების 99%-ი უცხოელი ვიზიტორები იყვნენ.როგორც მეღვინე "ბიზნესპარტნიორთან" განმარტავს, მომხმარებელთა ზრდა სივრცის გაფართოებამ განაპირობა, კერძოდ, მაღალი მოთხოვნის გამო, "მერებაშვილის მამულში" რამდენიმე თვის წინ სასტუმრომაც დაიწყო ფუნქციონირება.მისივე თქმით, მაგალითად, 2024 წელს მამულს 41 ქვეყნიდან 5 000-ზე მეტი ვიზიტორი ესტუმრა."მეღვინეობა-მევენახეობა ოჯახური, საუკუნეების ტრადიციაა გახლავთ. მამული კასპში მდებარეობს, ვენახი სოფელ ოკამში გვაქვს, სადაც 2 ჰექტარზე 4 სახეობის ენდემური, ადგილობრივი ვაზის ჯიში მოგვყავს. კერძოდ, თეთრყურძნიანი ვაზის ჯიშებიდან ჩინური და გორული მწვანე გვაქვს, ხოლო შავყურძნიანებიდან თავკვერი და უნიკალური ქართლის ვაზის ჯიში - შავკაპიტო. ყურძენი ორგანული პრეპარატებით მოგვყავს და ბუნებრივი ღვინის მწარმოებლები გახლავართ. ამჟამად, 6 სახის მშრალ ღვინოს ვაწარმოებთ - ნაწილი ქვევრში ტრადიციული მეთოდითაა დაყენებული, ნაწილს კი ევროპული წესით ვამზადებთ. ასევე ჩვენივე გამოხდილი ჭაჭა გვაქვს.ვიზიტორებს, რაც შეება 99%-ი საერთაშორისო სტუმარი გვყავს, რადგან ადგილობრივი მოსახლეობა ღვინის მიმართულებით ძირითადად კახეთს სტუმრობს ხოლმე. ვიზიტორები ყველაზე ხშირად მაინც გერმანიიდან, ბალტიისპირეთის ქვეყნებიდან, ისრაელიდან, პოლონეთიდან, აღმოსავლეთ ევროპის ქვეყნებიდან გვსტუმრობენ. გასული წლის ანალოგიურ პერიოდთან შედარებით, მომხმარებლების რაოდენობა გაიზარდა, სასტუმრო ავაშენეთ და ჩამოსულ სტუმრებს ადგილზე განთავსებასაც ვთავაზობთ, ეს ყველაფერი კი ვიზიტორების ზრდაზე ადეკვატურად აისახება. ახალი ტურისტული კომპანიებიც გამოჩნდნენ, ამასთან კმაყოფილი მომხმარებლების რიცხვიც მუდმივად მზარდია", - აღნიშნავს მამულის დამფუძნებელი.შალვა მერებაშვილი ექსპორტის შესახებაც საუბრობს და აღნიშნავს, რომ ღვინის რეალიზაციის კუთხით ექსპორტს, წელიწადში გაყიდვების 10%-ი უჭირავს.მეღვინე წარმადობის საკითხსაც მიმოიხილავს და ხაზს უსვამს, რომ "მერებაშვილის მამული" წელიწადში 5 000 ბოთლ ღვინოს აწარმოებს."ადგილობრივ ბაზარზე, ამ ეტაპზე წარმოდგენილი არ ვართ, რადგან ღვინის 90%-ი ტურისტულ ობიექტზე იყიდება. ჩვენთან მოსულ ვიზიტორს, ღვინის დაგემოვნებას, სხვადასხვა, კულინარიულ აქტივობებს ვთავაზობთ, დანარჩენი წილი კი, ექსპორტზე გერმანიაში და იაპონიაში -  ტოკიოში გადის.რაც შეეხება ადგილობრივ ბაზარს, საინტერესო მიმართულებაა, მაგრამ წელიწადში 5 000 ბოთლ ღვინოს ვაწარმოებთ, ადგილზე დიდი მოთხოვნაა, პარტნიორებსაც პროდუქციას ვაწვდით, შესაბამისად, ღვინის ხარისხის გაუარესებას არ ვაპირებთ. სამომავლოდ, ღვინის წარმოების გაზრდასაც ვფიქრობთ, რადგან ახალგაზრდა ვენახები გვაქვს და დროსთან ერთად მეტ მოსავალს ვიღებთ. ძალიან კარგი რთველი გვაქვს, უმაღლესი ხარისხის ყურძენი მოვკრიფეთ, მომავალი წლისთვის, ალბათ, წარმადობა რამდენიმე ათასი ბოთლით გაიზრდება", - აცხადებს აღნიშნავს ტურისტული ობიექტის დამფუძნებელი."მერებაშვილის მამულის" დამფუძნებელი კორპორაციული შეკვეთების მიმართულებასაც მიმოიხილავს. მისი თქმით, ტურისტული ობიექტი აღნიშნული ხაზით გააქტიურებას გეგმავს."კორპორაციულ შეკვეთებს, რაც შეეხება ამ მიმართულებით უფრო გააქტიურებას ვაპირებთ. ჯერჯერობით, სადღესასწაულო ღონისძიებებს არ ვემსახურებით, თუმცა როგორც უკვე აღვნიშნე, წელს ჩვენს მამულს სასტუმროც დაემატა და მომავალი წლიდან უკვე შეკვეთებიც გვაქვს, მაგალითად, ქორწილების დაორგანიზება გვინდა", - აცხადებს შალვა მერებაშვილი.ცნობისთვის, "მერებაშვილის მამულის" მეღვინეობა შიდა ქართლში, კასპში მდებარეობს, ტურისტულ ობიექტს 2 ჰექტარზე გაშენებული ვენახი სოფელ ოკამში აქვს. მარანი ადგილობრივ ბაზარზე 2018 წლიდან ოპერირებს.bp.ge 

"სამეფო თაფლი" გაყიდვების 50%-იანი ზრდის შემდეგ, პირველი ბრენდული ფილიალის გახსნას გეგმავს

კომპანია "სამეფო თაფლი", რომელიც 50-მდე სხვადასხვა, შეფუთვის პროდუქციას აწარმოებს მომავალ წელს თბილისში პირველი ბრენდული ფილიალის გახსნას გეგმავს. როგორც კომპანიის დამფუძნებელი, გიორგი გომელაური "ბიზნესპარტნიორთან"  აღნიშნავს, პროექტის საინვესტიციო ღირებულება დაახლოებით $200 000-ია.ბიზნესმენის ინფორმაციით, "სამეფო თაფლი" ასორტიმენტის ხაზის გაფართოებაზეც მუშაობს. კერძოდ, უახლოეს მომავალში, ამჟამად არსებულ პროდუქციას ჩურჩხელაც დაემატება.გიორგი გომელაური გაყიდვების საკითხსაც მიმოიხილავს და აცხადებს, რომ წინა წლის ანალოგიურ პერიოდთან შედარებით, მომხმარებლების რაოდენობა 50%-ით გაიზარდა, რასაც  პროდუქციის მაღალ ხარისხს, ასორტიმენტის ზრდას, ტურისტების დიდ ნაკადს და ქვეყანაში არსებულ ეკონომიკურ სტაბილურობას უკავშირებს."ახალ ბრენდულ მაღაზიაში, წარმოდგენილი  კიდევ უფრო ფართო ასორტიმენტით იქნებით. ზოგადად, რომ გითხრათ, ცაცხვის და გაზაფხულის (მაისის) თაფლს ვაწარმოებთ. ნედლეულის ერთი ნაწილი კახეთიდან მოგვაქვს, ხოლო მეორე ნაწილი - წაბლის თაფლი დასავლეთ საქართველოდანაა. წარმოების დაახლოებით, 50% საკუთარი გვაქვს, ხოლო დანარჩენს პარტნიორი მეფუტკრეებისგან ვიღებთ.საერთო ჯამში 50-მდე, სხვადასხვა, შეფუთვის პროდუქცია გვაქვს, რომელიც ძირითადად 4 კატეგორიად იყოფა: თაფლის ასორტიმენტი, ასევე მურაბა/ჯემი, თაფლის დისტილატი (დისტილირებული ალკოჰოლური სასმელი თაფლისგან) და რა თქმა უნდა, პროდუქციის შემადგენლობაშია გოზინაყის დიდი არჩევანი.ჩვენთვის ხარისხი პრიორიტეტულია. 2017 წელს პროდუქციის წარმოება რა ხარისხითაც დავიწყეთ, ახლაც ზუსტად იმავე ხარისხი გვაქვს. მოგეხსენებათ ხარისხის გაფუჭება ბიზნესს კუთხით არასახარბიელო შედეგის მომტანია. ყველაფერს ვაკეთებთ, რომ პრემიუმ კლასის დონე შევინარჩუნოთ", - აცხადებს გიორგი გომელაური.კომპანიის დამფუძნებელი პროდუქციის დამზადების შესახებაც საუბრობს და ხაზს უსვამს, რომ კომპანია აღნიშნული მიმართულებით ნაწილობრივ თანამედროვე ტექნოლოგიებს იყენებს.რაც შეეხება კორპორაციულ გაყიდვებს გიორგი გომელაურის თქმით, კორპორაციული გაყიდვების დიდი წილი ახალი წლის პერიოდზე მოდის."როგორც აღვნიშნე, მთავარია ხარისხი არ გაფუჭდეს. ამიტომ თუ რომელიმე თანამედროვე ტექნოლოგია წარმოების პროცესს გაგვიმარტივებს, მაგრამ ხარისხს, თუნდაც ოდნავ გააუარესებს, მაშინ მსგავს დანადგარზე უარს ვიტყვით", - აცხადებს "სამეფო თაფლის" წარმომადგენელი.კომპანიის დამფუძნებელი საექსპორტო მიმართულებითაც საუბრობს და აღნიშნავს, რომ კომპანია უცხოურ ბაზარზე გასვლაზე აქტიურად მუშაობდა, თუმცა მსოფლიოში მიმდინარე პროცესებმა სიტუაცია შეაფერხა."ამჟამად, ექსპორტის მიმართულებით განვითარებას ვცდილობთ. მოგეხსენებათ, ქართული ბაზარი მცირეა, საჭიროა უცხოეთში გასვლა, რომ ადგილობრივი წარმოება დაფასდეს. კონკურენციას, რაც შეეხება, სხვებზე არასდროს ვსაუბრობთ, მხოლოდ იმას ვიტყვი, რომ ჩვენი პროდუქციის მაღალი ხარისხის სტაბილურობა, გაყიდვებზეც აისახება. კერძოდ, ყოველ წელს გაყიდვები მზარდია. აღნიშნული ავტომატურად ნიშნავს, რომ კმაყოფილი მომხმარებელი მუდმივად გვემატება", - აცხადებს "სამეფო თაფლის" წარმომადგენელი.კომპანიის დამფუძნებლის ინფორმაციით, საერთაშორისო ხარისხის სერტიფიკატების აღება პროდუქციის ხარჯს ძალიან აძვირებს."ეკო სერტიფიკატების, ან საერთაშორისო ხარისხის ნიშნების (BIO, Organic და სხვ.) აღება ძალიან აძვირებს ხარჯებს. უფრო რომ დავაზუსტო, ისედაც  ბიო მიმართულებას მივყვებით და იმის გამო, რომ ჩვენს ნაწარმს "ბიო"-ს ლოგო ჰქონდეს პროდუქციისთვის ფასის  მომატებას არ ვაპირებთ. ზოგადად "სამეფო თაფლის" პროდუქციის ღირებულება 7 ლარიდან იწყება და 70 ლარამდე მერყეობს", - აღნიშნავს გიორგი გომელაური.ცნობისთვის, კომპანია "სამეფო თაფლი" ადგილობრივ ბაზარზე 8 წელია ოპერირებს. კომპანიას საერთო ჯამში 50-მდე, სხვადასხვა, შეფუთვის პროდუქცია აქვს, რომელიც ძირითადად 4 კატეგორიად იყოფა: თაფლის ასორტიმენტი, ასევე მურაბა/ჯემი, თაფლის დისტილატი (დისტილირებული ალკოჰოლური სასმელი თაფლისგან) და გოზინაყი.ამასთან, "სამეფო თაფლის" პროდუქცია წარმოდგენილია დიდ სავაჭრო ქსელებში, მაგალითად, "კარფური", "აგროჰაბი", "გუდვილი", "ევროპროდუქტი", "ფრესკო" და ა.შ. კომპანიას საკუთარი შოურუმიც აქვს.bp.ge 

"სნეილ ქეჩი" გაზაფხულიდან "ლოკოკინას მუსინის" წარმოებას იწყებს

"სნეილ ქეჩი" გაზაფხულიდან "ლოკოკინას მუსინის"(ლორწო) წარმოებას იწყებს. როგორც „ბიზნესპარტნიორთან“ ქართულ-ნორვეგიული კომპანია „სნეილ ქეჩის“ (ნადი გრუპის) თანადამფუძნებელმა მერაბ ნადარაიამ განაცხადა, პროდუქციის 100%-ვე ექსპორტზე გაიყიდება.მისივე ცნობით, კომპანიას უკვე აქტიური მოლაპარაკებები აქვს იტალიასთან და სამხრეთ კორეასთან, თუმცა ამ ეტაპზე, კონკრეტული ბრენდების დასახელებისგან თავს იკავებს."თავდაპირველად, წარმოება შეზღუდული რაოდენობით დაიწყება და მოთხოვნის შესაბამისად გავფართოვდებით. საწყის ეტაპზე, გასაყიდად ლოკოკინას ლორწოს გავიტანთ, ხოლო შემდეგ ამის გადამუშავება და ფხვნილად ქცევა მოხდება. აღნიშნული გამოიყენება კონსმეტოლოგიაში და კანის მოვლის საშუალებების დასამზადებლად. პროექტის საინვესტიციო ღირებულება 150 000 ევროს შეადგენს. იტალიასთან და სამხრეთ კორეასთან აქტიური მოლაპარაკებები გვაქვს და ვფიქრობთ, რომ მოლაპარაკებების პროცესი წარმატებით დასრულდება. აღნიშნული ქვეყნებისთვის საქართველოს ბაზარი საინტერესოა, რადგან ევროპასთან შედარებით პროდუქცია უფრო იაფია", - განაცხადა მერაბ ნადარაიამ.ცნობისთვის, ლოკოკინების ნახევარფაბრიკატების ქარხანა სენაკის რაიონის სოფელ მენჯში მდებარეობს. „სნეილ ქეჩმა“ ლოკოკინების ნახევარფაბრიკატების ქარხნის მშენებლობაში 2 მლნ ევროს ინვესტიცია განახორციელა. ქარხანა 1 800 კვადრატულ მეტრ ფართობზე აშენდა.bp.ge