საქართველო სოფლებში წყლის სისტემების რეაბილიტაცია-მშენებლობისთვის ADB-სგან €200 მლნ-ს მიიღებს

"ჯანსაღი პროდუქტის წარმოება დიდ თეორიულ ცოდნას საჭიროებს, აგრონომიულ მომსახურებას უცხოელები გვიწევენ" - "ბიო ბაღები"

ორგანული (გარდამავალი ბიო) ვაშლის მწარმოებელი კომპანიის "ბიო ბაღების" წარმოების ხელმძღვანელის, დავით ჯაფარიძის შეფასებით, საქართველოში ბიო მიმართულების განვითარება ძალიან მნიშვნელოვანია, თუმცა აღნიშნული პროცესი დიდ შრომასთან ასოცირდება.როგორც დავით ჯაფარიძე "ბიზნესპარტნიორთან" განმარტავს, "ბიო ბაღებს" პროდუქტის მოყვანაში უცხოელი აგრონომები, იტალიელები ეხმარებიან."მოგეხსენებათ, ბიო მიმართულება ეკოლოგიურად ძალიან სუფთა პროდუქტია, პესტიციდებს არ შეიცავს - შესაბამისად, საქართველოში ამ მიმართულების განვითარება ძალიან მნიშვნელოვანია. პირველ რიგში, ჯანმრთელობის კუთხით, თუმცა დიდ შრომასთან ასოცირდება. კერძოდ, აღნიშნული მიმართულება დიდ თეორიულ ცოდნას საჭიროებს, აგრონომიულ მომსახურებას უცხოელი აგრონომები, იტალიელები გვიწევენ. ჯანსაღი პროდუქტის წარმოებას დაკვირვება, სიფრთხილე უნდა, ჩვენ აღნიშნული გამოცდილება ნაკლები გვაქვს, ამიტომ უცხოელების ჩართულობა გვჭირდება. ბუნებისთვის, ადამიანისთვის ბიოლოგიურად სუფთა პროდუქტი კარგია - აი, მაგალითად, ისევე როგორც ავტომანქანა, რომელსაც გამონაბოლქვი არ აქვს. რა თქმა უნდა, არ ვამბობ, რომ ჩვეულებრივი პროდუქტი, ჯანმრთელობისთვის მავნეა, ყველაფერს თავის სტანდარტი აქვს, ამ მიმართულებით ჩვენი ქვეყანა საკმაოდ წინაა წასული, მაგრამ ორგანული წესით მოყვანილ პროდუქტი ეკოლოგიურად უფრო სუფთა გახლავთ", - აღნიშნავს "ბიო ბაღების" წარმოების ხელმძღვანელი.დავით ჯაფარიძე კომპანიის წარმოების შესახებ დეტალურად საუბრობს და აღნიშნავს, რომ ამჟამად, მეურნეობა ბიოსერტიფიცირების პროცესშია."ვაშლის მოყვანა და ბიოსერტიფიცირება  2023 წელს დაიწყო. ამასთან, სპეციალურად ბიო წარმოებისთვის  განკუთვნილი ვაშლის ჯიშები შეირჩა, რომლებიც  სხვადასხვა, დაავადებების მიმართ რეზისტენტულია. ორგანული წესით ვაშლის წარმოება განსაკუთრებული პირობების დაცვას გულისხმობს, მაგალითად, პროდუქტის მოყვანისას გამოიყენება, მხოლოდ ორგანული სასუქი და ბიო პრეპარატები, არ ვიყენებთ პესტიციდებს და ა.შ.ჩვენ  2 ჯიშის ვაშლი მოგვყავს: "ვები", რომელიც განსაკუთრებულად ტკბილი გემოთი გამოირჩევა და მეორე: "რუბელიტი", რომელსაც არომატული გემო აქვს. ვფიქრობ, როდესაც ბაღები სრულ მსხმოიარობაში შევა დაახლოებით, 400 ტონამდე ნედლეულს მივიღებთ -წარმადობა წლებთან ერთად გაიზრდება. ჩვენი მიმართულების პოპულარიზება იმედია, მალე დაიწყება და ამ სფეროს განვავითარებთ.რაც შეეხება გაყიდვების მიმართულებას, ვაშლის რეალიზაცია 2024 წელს დავიწყეთ, ადგილობრივ ბაზარზე წარმოდგენილი ვართ: "აგროჰაბში", "ნიკორაში", "ფრესკოში", "გუდვილში და ე.წ. უბნის მაღაზიებშიც", - აცხადებს კომპანიის წარმოების ხელმძღვანელი.ცნობისთვის, ბიო ბაღები გორის მუნიციპალიტეტში, სოფელ ზერტში 8 ჰა-ზე ორგანული წესით  ვაშლის მოყვანას აწარმოებს, მეურნეობა ბიოსერტიფიცირების პროცესშია. ამასთან,  2024 წელს ბაღს "გარდამავალი ბიო"-ს სტატუსი მიენიჭა. კომპანია ბიოსერტიფიკატის მიღებას 2027 წლისთვის ელოდება.bp.ge 

"ღვინის მიმართ მოთხოვნის შემცირება თვალსაჩინოა, ახალი თაობა ღვინოს ნაკლებად მოიხმარს" - Winiveria

ღვინის მიმართ მოთხოვნის შემცირება თვალსაჩინოა, ახალი თაობა ღვინოს ნაკლებად მოიხმარს, - ამის შესახებ მეღვინეობა Winiveria-ის დამფუძნებელმა და დირექტორმა ზვიად გურაშვილმა “ბიზნესპარტნიორთან” განაცხადა.მისივე თქმით, მოთხოვნის შემცირების ერთ-ერთი მიზეზი შეიძლება იყოს ის, რომ ხარისხიანი ღვინო ძვირფას პროდუქტად ითვლება და შესაძლოა, ყველასთვის ხელმისაწვდომი არ არის."გამომდინარე იქიდან, რომ ჩვენ 18 ქვეყანაში გავდივართ ექსპორტზე, ყოველდღიური შეხება გვაქვს ბაზრის ტენდენციებზე. ახალი თაობა ნაკლებად მოიხმარს ღვინოს, ამის მიზეზად რამდენიმე ფაქტორი შეიძლება ჩაითვალოს, მათ შორის, ახალი თაობისთვის გარკვეულ პროდუქტებზე, სხვადასხვა თრობის საშუალებებზე ხელმისაწვდომობის ზრდა. ისინი გართობისა და განტვირთვის სხვა გზებს მიმართავენ და სწორედ ამიტომ, მოთხოვნა მათი მხრიდან ნაკლებია.ამასთან, უნდა აღინიშნოს რუსეთ-უკრაინის ომის გავლენაც. გარკვეული ფინანსური კრიზისის წინაშე დადგა ევროპის მოსახლეობა. ადამიანს, რომლებიც ხშირად სვამდნენ ღვინოს, ეს მოხმარება შემცირებულია. ასევე, საქართველოსთვის მნიშვნელოვანი ბაზრები იყო რუსეთი და უკრაინა და ამ ომიდან გამომდინარე ხარისხიან და მაღალფასიან პროდუქტზე დღითი დღე მცირდება მომხმარებელიც და მოთხოვნაც”, - განაცხადა ზვიად გურაშვილმა.კომპანიის დამფუძნებლის ცნობით, ამ ეტაპზე მათი წარმადობის 70% ექსპორტზე იყიდება, ხოლო 30% ადგილობრივ ბაზარზე. კომპანია ექსპორტის მიმართულებით გაფართოებაზე მუშაობას აგრძელებს.ცნობისთვის, მეღვინეობა Winiveria 1995 წელს კახეთში, სოფელ ვარდისუბანში დაფუძნდა. მარანი თავდაპირველად დაახლოებით, 4 სახეობის ქვევრის ღვინოს აწარმოებდა. 2014 წელს, კი გაფართოვდა და ახალი მარანი ააშენა, რომელიც თანამედროვე წარმოებაა და 1 მლნ. ბოთლზეა გათვლილი. დღესდღეობით მეღვინეობა 23 დასახელების პროდუქტს აწარმოებს, მათ შორის, 17 სახეობის ღვინოს, 2 სახეობის ცქრიალას, 2 სახეობის პეტნატს და 2 სახეობის ჭაჭას.bp.ge 

Winiveria აზიის ბაზარზე შესვლას გეგმავს - მეღვინეობა იაპონურ და კორეულ პარტნიორებს ეძებს

მეღვინეობა Winiveria აზიის ბაზარზე განვითარებას გეგმავს. როგორც კომპანიის დამფუძნებელმა და დირექტორმა ზვიად გურაშვილმა "ბიზნესპარტნიორთან" აღნიშნა,  Winiveria სანდო და მყარ პარტნიორს ეძებს, რომელთანაც გრძელვადიან თანამშრომლობას შეძლებს.მეღვინეობის დამფუძნებელი აცხადებს, Winiveria-ის გაყიდვების 30% ადგილობრივ ბაზარზე მოდის, ხოლო 70% ექსპორტზე იყიდება."მეღვინეობა Winiveria 1995 წელს კახეთში, სოფელ ვარდისუბანში დაფუძნდა. თავდაპირველად დაახლოებით, 4 სახეობის ქვევრის ღვინოს ვაწარმოებდით. 2014 წელს, გავფართოვდით და ახალი მარანი ავაშენეთ, რომელიც თანამედროვე წარმოებაა, რომელიც 1 მლნ. ბოთლზეა გათვლილი. დღესდღეობით ჩვენ 17 სახეობის ღვინოს ვაწარმოებთ, ასევე, 2 სახეობის ცქრიალას, 2 სახეობის პეტნატს და 2 დასახელების ჭაჭას. ანუ ჯამში 23 დასახელების პროდუქტი გვაქვს. წელს ასევე, გავაკეთეთ ახალი ბრენდი, რომელსაც ჰქვია "აკაპელა". აღნიშნული პროდუქტი ქსელური მარკეტებისთვის შევქმენით, რადგან Winiveria პრემიუმ სეგმენტის ღვინოა და შედარებით მაღალ ფასშია. "აკაპელას" ბრენდში სულ 2 სახეობის ღვინოა და ქსელურ მარკეტებში იყიდება. Winiveria-ის მიმართულებით ლიდერი პოზიციები გვიკავია ადგილობრივ ბაზარზე, სხვადასხვა ქსელში, HoReCa სექტორსა, თუ ღვინის მაღაზიებში. რაც შეეხება ექსპორტის მიმართულებას - 18 ქვეყანას მოიცავს ჩვენი გაყიდვები. მათ შორის, წარმოდგენილები ვართ ევროპულ და ამერიკულ ბაზარზე. აშშ-ში 2018 წლიდან ვართ წარმოდგენილები, თუმცა ნელი ტემპით მიდიოდა განვითარება, რის გამოც იმპორტიორი შევცვალეთ და წლევანდელ წელს 22 შტატს მოვიცავთ და კიდევ უფრო მეტად განვითარების მოლოდინი მაქვს. რაც შეეხება ახალ ბაზრებს - რა თქმა უნდა, ჩვენთვის ძალიან საინტერესოა ისეთი ქვეყნები, სადაც არ ვართ წარმოდგენილი და ასეთია, აზიის ქვეყნები, მათ შორის, იაპონია და სამხრეთ კორეა. გარდა ამისა, ჩვენთვის საინტერესოა, პოლონეთის ბაზარი. მომავალში სწორედ ამ მიმართულებით ვიმუშავებთ", - აცხადებს ზვიად გურაშვილი. bp.ge 

"წელს მოცვი ახალ საექსპორტო ბაზარზეც გავიტანეთ, ჯამში ექსპორტი 40%-ით გაიზარდა" - მოცვის მწარმოებელთა ასოციაცია

საქართველომ წელს მოსავლის სახით, დაახლოებით, 7 ათასი ტონა ლურჯი მოცვი მიიღო, მაშინ, როდესაც წინა წლის მოსავალი 5 ათას ტონას არ აღემატებოდა, - ამის შესახებ „ბიზნესპარტნიორს“  ლურჯი მოცვის მწარმოებელთა ასოციაციის აღმასრულებელმა დირექტორმა შოთა ცუკოშვილმა  განუცხადა.მისივე თქმით, გაზრდილი მოსავლიანობიდან გამომდინარე, წელს ქვეყანამ ექსპორტის ზრდაც შეძლო, ვინაიდან, როგორც ცნობილია, ადგილობრივი წარმოების მოცვი თითქმის 100 პროცენტით ექსპორტზე გადის.მიმდინარე წლის სამ კვარტალში, წინასწარი მონაცემებით, საქართველომ 6,900 ტონა მოცვი გაიტანა საზღვარგარეთ, რაც წლიურად თითქმის 40%-ით გაზრდილი მაჩვენებელია.ზრდა ფიქსირდება შემოსავლებშიც -  საქართველომ მოცვის ექსპორტიდან, დაახლოებით, 46 მილიონი დოლარი მიიღო, რაც წინა წლის ანალოგიურ მაჩვენებელთან შედარებით 65%-ით მეტია.„რაც შეეხება საექსპორტო ქვეყნებს, წელს ქართული ლურჯი მოცვის ექსპორტი 8 ქვეყანაში განხორციელდა, მათ შორის როგორც ევროკავშირის ბაზრებზე, ისე დუბაისა და ინდოეთში. აღსანიშნავია, რომ ინდოეთი ქართული მოცვისთვის ახალი ბაზარია და წელს, აქ ექსპორტი პირველად განხორციელდა. უნდა ითქვას, რომ ბაზრების დივერსიფიცირებაზე მუდმივად ვმუშაობთ და ამ მიზნით, მონაწილეობას ვიღებთ სხვადასხვა გამოფენებში. მაგალითად, სულ რამდენიმე კვირის წინ საქართველოს ლურჯი მოცვის მწარმოებელთა ასოციაციამ ხილისა და ბოსტნეულის ერთ-ერთ წამყვან საერთაშორისო გამოფენაში, სახელწოდებით Fruit Attraction 2025 - მიიღო მონაწილეობა. ღონისძიება ესპანეთის დედაქალაქ მადრიდში გაიმართა. გამოფენაში ქართველ მწარმოებლებთან ერთად ჩართული იყო 2 ათასზე მეტი კომპანია მსოფლიოს 150 ქვეყნიდან“, - აღნიშნა შოთა ცუკოშვილმა.მისივე ინფორმაციით, ვიზიტის ფარგლებში, ქართული დელეგაციის წევრები და მწარმოებლები მოცვის საერთაშორისო ორგანიზაციის თავმჯდომარეს, მარიო სტეტას შეხვდნენ და სექტორის მთავარი გამოწვევები და შესაძლებლობები განიხილეს.  შეხვედრაზე ისაუბრეს ისეთ საკითხებზეც, როგორებიცაა: ხარისხის სტანდარტების გაუმჯობესება,  საექსპორტო ბაზრების დივერსიფიკაცია, ასევე ინოვაციური ტექნოლოგიების დანერგვა.როგორც ლურჯი მოცვის მწარმოებელთა ასოციაციის აღმასრულებელმა დირექტორმა აღნიშნა, ექსპორტის ზრდასთან ერთად, გაზრდილია თავად ქართული ლურჯი მოცვის ხარისხი და მისი საექსპორტო ღირებულებაც.„წელს მოცვის გლობალურ ბაზარზე საკმაოდ მაღალი ფასები დაფიქსირდა, რაც ზოგიერთ მსხვილ მწარმოებელ ქვეყანაში, ცუდი კლიმატური პირობების გამო შემცირებულ მოსავალს უკავშირდება. პროდუქტის სიმცირემ კი, მისი ღირებულების ზრდა განაპირობა. ცხადია, მოცვის საერთაშორისო ფასის მატება, ქართული მოცვის საექსპორტო ღირებულებაზეც აისახა და ერთი კილოგრამი, სხვადასხვა ხარისხიდან გამომდინარე, 4-დან 8 ევრომდე ღირდა“, - განმარტა შოთა ცუკოშვილმა.საბოლოო ჯამში, ქართველი მოცვის მწარმოებლები ამბობენ, რომ ეს არის საკმაოდ მაღალშემოსავლიანი სექტორი და საქართველოს აქვს უნიკალური პოტენციალი, გახდეს მნიშვნელოვანი მოთამაშე ევროპასა და აზიას შორის, მოცვის მიწოდების ჯაჭვში.დარგის წარმომადგენლები მომავალი წლის საპროგნოზო მოსავალზეც საუბრობენ და ელიან, რომ 2026 წლისთვის, წლევანდელი მოსავალი გაორმაგდება, ვინაიდან, წლიდან წლამდე იზრდება ქვეყანაში გაშენებული მოცვის პლანტაციების ფართობი. ამჟამად, ქვეყანაში მოცვის ბაღები ჯამში 3000 ჰექტარზეა გაშენებული..bp.ge 

"რაჭული თეთრას და მწვანეს ნაზავი ჩამოვასხით - პროდუქციის რეალიზაცია 20%-ით გაიზარდა" - "ველეულა"

რაჭაში, ამბროლაურის რაიონ სოფელ ძირაგეულში მდებარე, ღვინის მარნის "ველეულას" პროექტ მენეჯერის, ნინო მღებრიშვილის ინფორმაციით, წინა წლის ანალოგიურ პერიოდთან შედარებით, პროდუქციის რეალიზაცია დაახლოებით 20%-ით გაიზარდა, რასაც მარნის წარმომადგენელი კმაყოფილ მომხმარებლებს უკავშირებს.როგორც "ბიზნესპარტნიორთან" ნინო მღებრიშვილი აღნიშნავს, ტურისტული ობიექტი ასორტიმენტის გაზრდაზე მუდმივად მუშაობს, მაგალითად, ახლახან კომპანიამ რაჭული თეთრას და მწვანეს ნაზავი ჩამოასხა.მისივე თქმით, ღვინის მარანი წელიწადში დაახლოებით, 10 000-მდე ბოთლ ღვინოს აწარმოებს."ჩვენი საკუთარი ვენახები ძირაგეულში და საკეციაში გვაქვს, რომლის ფართობი 2 ჰექტარს მოიცავს. ადგილწარმოშობის ღვინოს ხვანჭკარას ვამზადებთ, ასევე გვაქვს: "ალექსანდროული", "ძელშავი" რაჭული "თეთრა", "საფერავი" და "ცოლიკაური". წინა წლის ანალოგიურ პერიოდთან შედარებით, მომხმარებელთა რაოდენობა გაიზარდა, რასაც კმაყოფილ მომხმარებლებს ვუკავშირებ. ზოგადად ჭრილში კი, ქვეყანაში მიმდინარე პოლიტიკური მოვლენები წარმოებაზე ძალიან მოქმედებს. გაყიდვების კუთხით, ძირითადი მომხმარებლების წილი მაინც თბილისზე მოდის.ახალგაზრდა მეღვინე გვყავს, რომელიც ყოველთვის ახალი გემოს ძიებაშია. ჩვენთან ერთ-ერთ ყველაზე ტოპ გაყიდვად ღვინოდ "ვერ ველევი" ითვლება, რომელიც საქართველოს 3 რეგიონის, 3 ჯიშის ყურძნისგან მზადდება ("რაჭული მწვანე", "იმერული ცოლიკაური" და "კახური რქაწითელი").  ასორტიმენტის გაზრდას მუდმივად ვცდილობთ, სულ ახლახან რაჭული თეთრას და მწვანეს ნაზავი ჩამოვასხით, რომელმაც ძალიან დიდი მოწონება განსხვავებული არომატის გამო დაიმსახურა", - აღნიშნავს "ველეულას" პროექტ მენეჯერი.ნინო მღებრიშვილი თქმით, ამ ეტაზე "ველეულა" ექსპორტზე არ გადის."ღვინის ფასის დიაპაზონს რაც შეეხება, 1.5 ღვინის ფასი 17 ლარიდან იწყება, პროდუქციას სოციალური ქსელის მეშვეობით აქტიურად ვყიდით. ამასთან, ადგილობრივ ბაზარზე 8 000-ს მოსავალში და სხვადასხვა, ღვინის სპეციფიკურ მაღაზიებში ვართ წარმოდგენილი. ქსელურ მარკეტებში ნაკლებად შეძლებთ ჩვენს ნახვას, მაგალითად, "სპარში" სულ რამდენიმე პოზიციაზე ვართ", - აცხადებს მარნის წარმომადგენელი.ნინო მღებრიშვილი რაჭაში მიღებულ რთველის შესახებაც საუბრობს და ხაზს უსვამს, რომ კომპანიას წელს კარგი მოსავალი ჰონდა."წელს ზოგადად ძალიან კარგი რთველი მივიღეთ. ამასთან, ინფორმაციულ კამპანიებს ხშირად ვატარებთ, რომ მომხმარებლები დავაინტერესოთ, ღვინის "ივენთებიც" ხშირად გვაქვს. რაჭა ზოგადად, როგორც ქართველებისთვის, ასევე უცხოელებისთვის ძალიან საინტერესო ადგილი გახდა", - აცხადებს მარნის წარმომადგენელი.ცნობისთვის, ღვინის მარანი "ველეულა" რაჭაში, ამბროლაურის რაიონ სოფელ ძირაგეულში მდებარეობს, ხოლო ადგილობრივ ბაზარზე 2022 წლიდან ოპერირებს.BP.GE