"საქართველოს ღვინოები: უძველესი ფესვები, თანამედროვე არომატები" - ქართული ღვინის დეგუსტაცია აშშ-ში გაიმართა

"ღვინის მაღაზიებში პროდუქციას ხშირად არ ვყიდი, რადგან თანხის გადახდას აგვიანებენ" - "მარანი გელოვანი"

ადგილობრივ ღვინის მაღაზიებში გარკვეული სახის გამოწვევები არსებობს, რაც ძირითად მეღვინეებისთვის თანხის დაგვიანებით გადახდას უკავშირდება.როგორც "მარანი გელოვანის" დამფუძნებელი, აკაკი გელოვანი "ბიზნესპარტნიორთან" აღნიშნავს, გარკვეული დროის განმავლობაში პროტესტის განცდა ჰქონდა და ქვეყნის მასშტაბით ბევრ ობიექტზე პროდუქციას საერთოდ არ შეჰქონდა.ტურისტული სექტორის წარმომადგენლის შეფასებით, ხშირად ღვინის მაღაზიის მფლობელებმა ბიზნესის კეთება საერთოდ არ იციან.აკაკი გელოვანი ქსელურ მარკეტებში პროდუქტის განთავსების საკითხსაც მიმოიხილავს და აცხადებს, რომ აღნიშნული ხაზითაც ბევრი პრობლემაა."ერთი პერიოდი პროტესტი მქონდა, საქართველოში ღვინოს არ ვყიდდი, რადგან ფულს არ იხდიან, ბიზნესი არ იციან და სათანადოდ არ გვეპყრობიან. აქედან გამომდინარე, ქვეყნის მასშტაბით, მხოლოდ 2-3 ადგილზე ვარ წარმოდგენილი. საქმეში დიდი შრომა მაქვს ჩადებული და თანხას ხშირად 6 თვის მერეც არ გიხდიან ხოლმე, აქედან გამომდინარე მათთან პარტნიორობას თავი დავანებე. გამიმართლა, რომ ექსპორტზე გავედი და სხვადასხვა ქვეყნის წარმომადგენლებთან (იაპონია, აშშ, გერმანია, პოლონეთი, ავსტრია, საფრანგეთი, შვეიცარია) აქტიური საქმიანი ურთიერთობა მაქვს. საკუთარ თავს თავად უნდა ვცეთ პატივი, თორემ ტაშს არავინ დაგვიკრავს.  რამდენი შემთხვევაა იცით, რომ 6 თვის განმავლობაში ადგილობრივი ღვინის მაღაზიები თანხის გადახდას აგვიანებენ?! კონკრეტული მაღაზიების ჩამონათვალისგან თავს შევიკავებ, მაგრამ მსგავსი შემთხვევები მერწმუნეთ ხშირია. იმედია, სიტუაცია შეიცვლება...რაც შეეხება ქსელურ მარკეტებში პროდუქტის განთავსებას,  როგორც ვიცი, ამ ხაზითაც ბევრი გამოწვევაა. უბრალოდ ქსელურ მარკეტებში შესული არ ვარ, რადგან ბიო ღვინოს ვაწარმოებ და მათ საკმარისი რაოდენობის პროდუქტს ვერ მივაწვდი. კერძოდ, ქსელურ მარკეტებში უფრო ხშირად ინდუსტრიული ღვინო იყიდება. ნატურალური ღვინო სხვა სეგმენტი გახლავთ, ძვირად იყიდება და იაფი არ ღირს", - აცხადებს აკაკი გელოვანი.ცნობისთვის, "მარანი გელოვანი" თბილისიდან 25კმ-ში, სოფელ ქვემო წყლულეთში, მდებარეობს და კახური ჯიშის ბიო ღვინოს ამზადებს. ასორტიმენტში შედის: "რქაწითელი", "კახურ მწვანე", "ქისი" და "საფერავი". ექსპორტზე კი 2017 წლიდან გადის, საექსპორტო ქვეყნებია - იაპონია, აშშ, გერმანია, პოლონეთი, ავსტრია, საფრანგეთი და შვეიცარია.ამასთან, აღსანიშნავია, რომ ქსელურ მარკეტებთან მიმართებით უარყოფითი პოზიცია, სხვადასხვა ბიზნესის წარმომადგენლებსაც აქვთ. მათ შორისაა "ჩირჩხელას" აღმასრულებელი დირექტორი, ირმა კვაჭანტირაძე. მეწარმის განცხადებით, კომპანიას ადგილობრივ ბაზარზე გაფართოება სურს, თუმცა სუპერმარკეტებში პროდუქციის შეტანა დიდ თანხებთანაა დაკავშირებული.როგორც მან "ბიზნესპარტნიორთან" აღნიშნა, ქსელურ მარკეტებში პროდუქციის შეტანაზე - კერძოდ, თითოეული სახეობის მარკეტის თაროზე განთავსებისთვის 1500 ლარია გადასახადი, რაც საკმაოდ ძვირია.გარდა ამისა, ქსელური მარკეტების მაღალ გადასახადებზე "ბიზნესპარტნიორთან" სათამაშოების ნაკრების ადგილობრივი მწარმოებელი კომპანია "ქართული თემის“ დამფუძნებელმა მანუჩარ ლობჟანიძემაც ისაუბრა. მისი თქმით, სახელმწიფომ კანონი უნდა მიიღოს, რომ ქსელურ მარკეტებს 5%-ზე მაღალი "ქეშბექის" მოთხოვნის საშუალება არ ჰქონდეთ.bp.ge

საქართველოში კაკლის მოსავალი გაიზარდა, ფერმერები ტექნიკაში ინვესტიციას ზრდიან - "ანიგოზი"

საქართველოში კაკლის მოსავალი გაიზარდა და 4500 ტონა შეადგინა, ფერმერები მოსავლის ამღებ ტექნიკაში ინვესტიციას ზრდიან, - ამის შესახებ კაკლის გადამმუშავებელი საწარმო "ანიგოზის" თანადამფუძნებელმა ანა ქევხიშვილმა "ბიზნესპარტნიორთან" განაცხადა. მისივე თქმით, ახალი ტექნოლოგიების დანერგვამ გარკვეული დრო მოითხოვა და ამან მოსავლის ხარისხზეც იმოქმედა."დიდი რაოდენობის მოსავლის აღება ხელით ფიზიკურად შეუძლებელი იყო და ძალიან ბევრმა ფერმერმა ინვესტიცია მოსავლის ამღებ ტექნიკაში განახორციელა. შესაბამისად, ამან გამოიწვია ის, რომ სანამ ადამიანები ახალ ტექნოლოგიურ ცვლილებებს შეეჩვეოდნენ, მოსავლის აღების პროცესი გაჭიანურდა. აღნიშნულმა ფაქტორმა, კი მოსავლის ხარისხზე გარკვეულწილად იმოქმედა. გამომდინარე აქედან, რეგიონების მიხედვით არასტაბილური ხარისხი გვხვდება. გვაქვს როგორც მაღალი ხარისხის კაკალი, რომელიც საექსპორტო პოტენციალის არის და გვაქვს შედარებით დაბალ ხარისხიანი. ამ თვალსაზრისით ბაზარი დივერსიფიცირებულია. ადგილობრივი ფერმერებისთვის როგორც საექსპორტო, ისე ადგილობრივი ბაზარი საინტერესო გასაღების ბაზრად რჩება", - აცხადებს ანა ქევხიშვილი.გარდა ამისა, მანვე აღნიშნა, რომ საერთაშორისო ბაზარზე ფასები დასტაბილურდა, ადგილობრივ ბაზარზე კი ფასები არ მცირდება და შარშანდელ ნიშნულს ინარჩუნებს."ადგილობრივ ბაზარზე ხარისხობრივი მაჩვენებლიდან გამომდინარე, ფასები იცვლება - იწყება 7-8 ლარიდან და ადის 12 ლარამდე. მოსავლის 50%ადგილობრივ ბაზარზე, ხოლო 50% ექსპორტზე იყიდება. ჩვენთვის ყველაზე მნიშვნელოვანი საექსპორტო ბაზარია ევროკავშირი, ასევე, გალფის და მეზობელი ქვეყნები", - აღნიშნა მან.კაკლის გადამმუშავებელი საწარმო „ანიგოზი“ სოფელ მარტყოფში პანდემიის პერიოდში, კერძოდ 2021 წელს, სოფლის განვითარების სააგენტოს თანადაფინანსებით ამოქმედდა. პროექტში, დაახლოებით, 3 მლნ ლარის ინვესტიცია ჩაიდო. თანამედროვე დანადგარებით აღჭურვილი საწარმო ამჟამად, ორი მიმართულებით მუშაობს, კერძოდ, ფერმერებისგან იბარებს როგორც სველ მდგომარეობაში, ახალ დაკრეფილ კაკალს, ასევე მშრალ კაკალს მეორადი გადამუშავებისთვის.bp.ge 

"ჩინეთი საინტერესო ბაზარია, მოთხოვნის შესაბამისად, მზად ვართ წარმადობა გავზარდოთ" - კასპის საკონსერვო ქარხანა

ჩინეთი ჩვენთვის საინტერესო ბაზარია და მოთხოვნის შესაბამისად, მზად ვართ წარმადობა გავზარდოთ, - ამის შესახებ კასპის საკონსერვო ქარხნის (შპს TMT-მა) დირექტორმა, ოთარ მერებაშვილმა "ბიზნესპარტნიორთან" განაცხადა, რითაც საქართველოსა და ჩინეთის გარემოს დაცვისა და სოფლის მეურნეობის სამინისტორებს შორის გაფორმებულ მემორანდუმებს გამოეხმაურა.მისი თქმით, აღნიშნული მიმართულების განვითარების შემთხვევაში, კასპის საკონსერვო ქარხანა არა მხოლოდ წარმადობას, არამედ ასორტიმენტსაც გაზრდის."ჩვენთვის ჩინეთი ძალიან საინტერესო ბაზარია. აქამდეც გვქონდა მცდელობა ჩინურ ბაზარზე შესვლასთან დაკავშირებით. ნიმუშები წაიღეს რამდენჯერმე, თუმცა არანაირი გამოხმაურება არ ყოფილა. თუ აღნიშნული ბაზარი ჩვენთვის უფრო ხელმისაწვდომი გახდა, რა თქმა უნდა, აქტიურად დავიწყებთ ამ მიმართულების განვითარებას. მიუხედავად იმისა, რომ ჩინეთი ძალიან დიდი ბაზარია ვფიქრობ, მოთხოვნის დაკმაყოფილებას შევძლებთ და მთავარია პროდუქცია ექსპორტზე გავიტანოთ", - აცხადებს ოთარ მერებაშვილი.მანვე აღნიშნა, რომ ამ ეტაპზე კასპის საკონსერვო ქარხნის პროდუქცია ექსპორტზე აქტიურად გადის ისეთ ქვეყნებში როგორიც არის გერმანია, აშშ, ავსტრია, პოლონეთი და სხვა.შეგახსენებთ, კასპის საკონსერვო ქარხანა (შპს TMT) 2006 წელს, კასპის საკონსერვო კომბინატის ბაზაზე დაფუძნდა, რომელიც 1961 წლიდან ფუნქციონირებდა. კომპანია აწარმოებს ნატურალურ, ეკოლოგიურად სუფთა და უსაფრთხო პროდუქციის ნაირსახეობებს, ჯამში 40 სახეობამდე. მათ შორის, ბოსტნეულის კონსერვებს, საწებელებს, მურაბებს, ჯემებს და ა.შ. bp.ge 

"ჩინეთიდან ქათმის ფეხებზე მოთხოვნაა, თუმცა არ მგონია მოცულობის კუთხით, საქართველო მიმზიდველი ბაზარი იყოს"

ჩინეთიდან ქათმის ფეხებზე მოთხოვნა არსებობს, თუმცა არ მგონია მოცულობის კუთხით, საქართველო მიმზიდველი ბაზარი იყოს, - ამის შესახებ კომპანია "ჩირინას" (ბრენდი "ბიუ-ბიუ") დამფუძნებელმა რევაზ ვაშაკიძემ "ბიზნესპარტნიორთან" განაცხადა.მისივე თქმით, ქათმის ფეხების გამო კომპანია წარმადობის ზრდას არ გეგმავს, თუმცა თუ ჩინეთის ბაზარი გაიხსნება, აღნიშნული მიმართულებით მუშაობა შესაძლებელია. "ჩინეთის მოსახლეობა 1.41 მილიარდია. ამ ქვეყანაში საწარმოებიც არის და სხვა ყველაფერი. საქართველოში მოსახლეობა,დაახლოებით, 3.5 მლნ-ს შეადგენს. ჩვენ რა უნდა შევთავაზოთ ჩინეთს? ეს ყველაფერი არარეალურია. ჩინეთისთვის რაოდენობრივად საინტერესო ბაზარი ვიქნებით? ქათმის წარმოება ჩვენთან მინიმალურია. ჩინეთიდან ქათმის ფეხზე მოთხოვნა არის, თუმცა როგორც უკვე აღვნიშნე საქართველოში წარმოების მოცულობა მცირეა. მე 5 წელი ვმუშაობდი ამ საკითხზე. მათ შორის, ფეხის, კისრის და თავის ექსპორტზე, თუმცა ჩინეთის ბაზარზე პროდუქციის გატანა საკმაოდ რთული იყო და არ გამოვიდა. თუ სახელმწიფოებს შორის ეს საკითხები მოწესრიგდება შემდეგ შესაძლებელია ამაზე ფიქრი დავიწყოთ. ჩინეთი საკმაოდ ჩაკეტილი ბაზარია და იქ ექსპორტი თითქმის შეუძლებელი იყო. ახლა გავიგეთ, რომ მემორანდუმები ფორმდება და ვნახოთ როგორ იქნება. აღსანიშნავია, რომ ჩინელები თავადაც იყვნენ საქართველოში ჩამოსულები და თქვეს, რომ ქათმის ფეხებს წაიღებდნენ", - აცხადებს რევაზ ვაშაკიძე.ცნობისთვის,  საქართველოს გარემოს დაცვისა და სოფლის მეურნეობის სამინისტროსა და ჩინეთის სოფლის მეურნეობის სამინისტროებს შორის ურთიერთთანამშრომლობის მემორანდუმს ეწერება ხელი.  გარემოს დაცვისა და სოფლის მეურნეობის მინისტრის დავით სონღულაშვილის ინფორმაციით, აღნიშნული მემორანდუმი საქართველოს შესაძლებლობას გაუხსნის  ქათმის ხორცის ექსპორტთან დაკავშირებით. bp.ge

"ჩინელები ქათმის ფეხებს ეძებენ - ქართულ მეფრინველეობას ახალი შესაძლებლობა ეძლევა" - ზურაბ უჩუმბეგაშვილი

ჩინელები ეძებენ არა ქათმის ხორცს, არამედ ქათმის ფეხებს - ქართულ მეფრინველეობას ექსპორტის ახალი შესაძლებლობა ეძლევა, - ამის შესახებ მეფრინველეობის განვითარების ასოციაციის ხელმძღვანელმა ზურაბ უჩუმბეგაშვილმა "ბიზნესპარტნიორთან" განაცხადა.მისივე შეფასებით, ქათმის ფეხი საქართველოში არც თუ ისე პოპულარულია, თუმცა ჩინელები დიდი სიამოვნებით წაიღებენ. გარდა ამისა, მანვე აღნიშნა, რომ ქათმის ფეხებზე მზარდი მოთხოვნა, საქართველოში ქათმის ხორცის წარმადობას გაზრდის, რაც იმპორტს შეამცირებს. "ჩინური სამზარეულოდან გამომდინარე, ქათმის ფეხი მათთვის დელიკატესია. აღნიშნულ ნაწილს ამუშავებენ მარინადში, სოიოში და სხვადასხვა საკმაზში. სავსებით პერსპექტიული მიმართულებაა.რაც შეეხება ხორცს - დღევანდელი მდგომარეობით, ყველაზე დიდი რაოდენობის გაყინული ქათმის ხორცი, ფილე საქართველოში სწორედ ჩინეთიდან შემოდის. შესაბამისად, ჩინეთიდან ეს ქათმის ფილე გააგრძელებს შემოსვლას, ხოლო საქართველოდან ჩინურ ბაზარზე ქათმის ფეხებს გავიტანთ. ჩინეთთან ექსპორტის საკითხი საქართველოს მხრიდან წახალისებულია, მაგრამ ჩინეთის მხრიდან არის ხოლმე გარკვეული ბარიერები, თუმცა რადგან სამთავრობო დონეზე ეწერება მემორანდუმებს ხელი, ეს ბარიერები, სავარაუდოდ, ჩინეთის მხრიდანაც აღარ იქნება. აღსანიშნავია, რომ ჩინეთის ბაზარი იმდენად დიდია, რომ ჩვენი პროდუქცია მათთვის ზღვაში წვეთია, მაგრამ ქათმის ფეხზე გაზრდილი მოთხოვნა ქვეყნის შიგნით, წარმოებებს გაზრდის. წარმოებაში თითოეული თეთრი ითვლება და ქათმის ნაწილები დაბალ ფასში გადის, ამ პროდუქციას "სასუპე ნაკრები" (თავი, ფეხები, კისერი) ჰქვია და ჩალის ფასად იყიდებოდა. ახლა, როცა მოთხოვნა და ფასი გაიზრდება, რა თქმა უნდა, შესაძლებელია წარმადობა გაიზარდოს. თუ წარმოება გაიზრდება, იმპორტი შემცირდება", -  აცხადებს ზურაბ უჩუმბეგაშვილი. ცნობისთვის,  საქართველოს გარემოს დაცვისა და სოფლის მეურნეობის სამინისტროსა და ჩინეთის სოფლის მეურნეობის სამინისტროებს შორის ურთიერთთანამშრომლობის მემორანდუმს ეწერება ხელი.  გარემოს დაცვისა და სოფლის მეურნეობის მინისტრის დავით სონღულაშვილის ინფორმაციით, აღნიშნული მემორანდუმი საქართველოს შესაძლებლობას გაუხსნის  ქათმის ხორცის ექსპორტთან დაკავშირებით. bp.ge