"აგროპარტნიორი" გილოცავთ აღდგომის ბრწყინვალე დღესასწაულს

შალვა ხეცურიანი: საქართველო ევროკავშირის წევრი რომ იყოს, ქართული ღვინისთვის იდეალური იქნებოდა

საქართველოს სომელიეთა ასოციაციის თავმჯდომარის, შალვა ხეცურიანის განცხადებით, საქართველოს ევროკავშირის წევრობა ქართული ღვინისთვის საუკეთესო პირობებს შექმნიდა.„რა იქნებოდა იდეალური სიტუაცია ქართული ღვინისთვის და არა მარტო ღვინისთვის, პირველი, რა თქმა უნდა, ჩვენ რომ ვიყოთ ევროკავშირის წევრი ქვეყანა.  ევროკავშირმა შიგნიდან უნდა აღმოაჩინოს, რომ ჰყავს ასეთი ახალი ქვეყანა, რომელმაც შეინარჩუნა ღვინის წარმოების არქაული წესი. ეს ძალიან მნიშვნელოვანია. ჩვენ ძალიან საინტერესო ქვეყანა ვართ. მეორე, ეს არის კლასიფიცირებული ვენახები, ასევე ძალიან მნიშვნელოვანია ქვევრის კლასიფიკაცია“,-  აღნიშნა შალვა ხეცურიანმა.მისივე თქმით, საქართველოს აქვს შანსი, მთლიან წარმოებაში გაზარდოს ბუნებრივი ღვინის წილი, თუმცა ხაზი გაუსვა, რომ აქ საუბარია მხოლოდ მაღალ ხარისხზე.„მნიშვნელოვანია აქცენტი ესთეტიკაზე, გარემოზე, სისუფთავეზე. ასევე,  ნაკლები ღვინის ფაშიზმი და შოვინიზმი, საკუთარი თავით აღტყინება, ეს გვიშლის ხელს ხარისხის მიღწევაში, და კიდევ მნიშვნელოვანია განათლება, ამერიკული, ფრანგული, გერმანული და სხვა, რადგან ვენახშიც, ღვინოშიც, მარკეტინგშიც, უცხოური საინტერესო გამოცდილებები ნამდვილად გვჭირდება, რომ გავძლიერდეთ და არა დავაკოპიროთ“, - განაცხადა შალვა ხეცურიანმა „ბიზნესპარტნიორის“ ღამის ეთერში.bp.ge 

"უამინდობის გამო, საჭირო რაოდენობის თაფლი ვერ ვაწარმოვეთ, საექსპორტო ქვეყნები სხვა ბაზრებზე გადაერთვნენ" - ქართველი მეფუტკრე

დასავლეთ საქართველოში, რომელზეც ქვეყანაში წარმოებული თაფლის უდიდესი წილი მოდის, ფუტკრის გავრცელებულ პარაზიტს ებრძვიან, რომელიც ანადგურებს ფუტკარს, - ამის შესახებ „ბიზნესპარტნიორს“  შპს „დესპანის“ დამფუძნებელმა ლადო ვარდოსანიძემ განუცხადა.მისი ვარაუდით, არ არის გამორიცხული რომ ეს დაავადება (საუბარია ტროპოლელაპსზე)  აღმოსავლეთ საქართველოშიც გადმოვიდეს. „და თუ ეს მოხდება, სავარაუდოდ,  ქვეყანაში ფუტკრების ოჯახების რაოდენობა განახევრდება“, - განმარტა ვარდოსანიძემ.როგორც შპს „დესპანის“ დამფუძნებელმა აღნიშნა, ამ გამოწვევასთან ბრძოლის მიზნით, მეფუტკრე ფერმერებს შეხვედრა ჰქონდათ სურსათის ეროვნულ სააგენტოსთან და დაიგეგმა სამუშაო ჯგუფების შექმნა, რომლებიც ამ დაავადებაზე იმუშავებენ, გარდა ამისა, თაფლის სექტორში არსებულ სხვა გამოწვევებსაც გადაჭრიან.უნდა ითქვას, რომ ქვეყანაში მეფუტკრეების ხელშეწყობის მიზნით გარკვეული პროგრამებიც ხორციელდება. მათ შორის, სოფლის განვითარების სააგენტო მეფუტკრეებს შესაძლებლობას აძლევს, ახალი სკები შეიძინონ. პროგრამის ფარგლებში, ბენეფიციარს შეუძლია მიიღოს თანადაფინანსება ერთი სკის ღირებულების არაუმეტეს 50%-ისა. პროგრამაში მონაწილეობის მისაღებად, პოტენციურ ბენეფიციარს  უნდა ჰყავდეს არანაკლებ 10 ფუტკრის ოჯახი.რაც შეეხება ქვეყნიდან თაფლის ექსპორტის საკითხს, აქ კლების მაჩვენებლები ფიქსირდება. კლება შეინიშნება როგორც მთლიანად წლიურ ჭრილში, ისე რამდენიმე თვის მონაცემებითაც. მაგალითისთვის, 2025 წლის იანვარ-თებერვალში საქართველოდან ექსპორტზე 530 კილო თაფლი გავიდა, მაშინ როდესაც გასული წლის ანალოგიურ პერიოდში, ეს მაჩვენებელი 13 ტონა იყო. აღნიშნული სტატისტიკური მონაცემები ცხადყოფს, რომ ქვეყანას ნატურალური თაფლის ექსპორტი თითქმის 96%-ით შეუმცირდა. მთლიანად, გასულ 2024 წელს კი, საქართველოდან უცხოეთში 271 ათასი დოლარის ღირებულების თითქმის 34 ტონა თაფლი გაიყიდა, რაც 2023 წელთან შედარებით, მოცულობაში თითქმის 70%-იანი შემცირებაა.„უნდა ითქვას, რომ ქართული თაფლის გასაღების მთავარი ბაზარი 2024 წლამდე ევროკავშირი იყო. მაგალითად, 2023 წელს ყველაზე დიდი მოცულობით თაფლი ექსპორტზე საფრანგეთში გავიდა, მანამდე ამ კუთხით ბულგარეთი ლიდერობდა, 2024 წელს კი აღნიშნულ პოზიციაზე - აზერბაიჯანი დაწინაურდა“, - აღნიშნა ლადო ვარდოსანიძემ.მან საექსპორტო ბაზრების ცვლილებასა და ექსპორტის კლების მიზეზებზეც ისაუბრა. შპს „დესპანის“ დამფუძნებლის თქმით, ექსპორტში კლების მიზეზი, ბოლო წლებში, ქვეყანაში დაფიქსირებული ცუდი კლიმატური პირობები გახდა, რის გამოც, საჭირო რაოდენობის თაფლი (საუბარია აკაციის თაფლზე) ვერ აწარმოეს, შესაბამისად, ის რაოდენობა, რასაც საექსპორტო ქვეყნები ითხოვდნენ, ვერ მიაწოდეს. ამის გამო, ეს ბაზრები სხვა მომწოდებლებზე გადაერთვნენ, მათ შორის - ჩინეთზე, რომელიც დაბალფასიან თაფლს აწარმოებს.ლადო ვარდოსანიძე ამბობს იმასაც, რომ ქართული თაფლი მაღალი ხარისხიდან გამომდინარე, მაღალ საფასო სეგმენტში გადის, შესაბამისად, საექსპორტო ბაზრებზე გასვლაში, მაღალი ფასიც უშლის ხელს.ცნობისთვის, ამჟამად, ქვეყანაში ოფიციალურად 1300-მდე საფუტკრე მეურნეობაა დარეგისტრირებული, რომლებიც 53 ათასზე მეტ სკას მოიცავს.bp.ge 

მეღვინეობა "კოლოტის" პროდუქცია ადგილობრივ ბაზარზე 1 თვეში გამოჩნდება

მეღვინეობა "კოლოტის" პროდუქცია ადგილობრივ ბაზარზე 1 თვეში გამოჩნდება. როგორც მეღვინეობა "კოლოტის" დამფუძნებელმა და დირექტორმა პაატა ლეკიაშვილმა "ბიზნესპარტნიორთან" განაცხადა, მეღვინეობა მოლაპარაკებებს როგორც ღვინის ფიზიკურ მაღაზიებთან, ისე ონლაინ გაყიდვების პლატფორმებთან აწარმოებს.მისივე ინფორმაციით, ახმეტის რაიონში მდებარე მეღვინეობა, ჯამში 2 დასახელების ღვინოსა და 2 დასახელების ჭაჭას აწარმოებს."ვენახი 7 წლის წინ გავაშენეთ. ამჟამად, 2 დასახელების ყურძენი - საფერავი და რქაწითელი გვაქვს. 2022 წელს პირველი მოსავალი ავიღეთ და აქცენტი ბიო მიმართულებაზე გავაკეთეთ. ჩვენი ვენახიც და პროდუქციაც ბიო სერტიფიცირებულია. ღვინის გარდა გვაქვს კლასიკური და მუხაში დავარგებული ჭაჭა. ამ ეტაპზე, წარმოებაში სხვა პროდუქცია არ გვაქვს.ჯერჯერობით ჩვენი პროდუქცია ბაზარზე არ გამოჩენილა. აქამდე, დამზადების პროცესი მიმდინარეობდა და ახლა გადავერთვეთ სარეალიზაციო ბაზრების მოძიებაზე", - აცხადებს პაატა ლეკიაშვილი.რაც შეეხება საექსპორტო გეგმებს - მეღვინეობა ადგილობრივი ბაზრის ათვისების პარალელურად საექსპორტო ბაზრების მოძიებაზე მუშაობს. პაატა ლეკიაშვილის თქმით, ამ ეტაპზე მოლაპარაკებები ყაზახეთთან მიმდინარეობს."გამომდინარე იქიდან, რომ ჩვენი ღვინო ბიო წარმოებაა, ფასი შედარებით სხვა ღვინოებთან მაღალია, რაც საქართველოს ბაზარზე ჩვეულებრივი მომხმარებლისთვის დიდი ფუფუნება იქნება. შესაბამისად, ჩვენი სამიზნე ბაზარი ევროპის ქვეყნები და ამერიკა იქნება, თუმცა აღმოსავლეთის ქვეყნებიდან თუ დაინტერესება იქნება, რა თქმა უნდა, აღნიშნულ მიმართულებებსაც ავითვისებთ. უცხოურ ბაზრებზე გასვლა, მთლიანად მათ სურვილზეა დამოკიდებული. თუმცა ამ ეტაპზე, მოლაპარაკებები გვაქვს ყაზახეთთან, ხოლო ევროპის ქვეყნებიდან გერმანიასთან და პოლონეთთან. ვფიქრობ, რომ საზღვარგარეთის ქვეყნებში საკმაოდ კონკურენტული ვიქნები როგორც გემოვნური თვისებებით, ისე ხარისხით. შესაბამისად, ვფიქრობთ, რომ ჩვენი ღვინო უცხოურ ბაზრებზე მაღალ საფასო კატეგორიაში გაიყიდება", - აცხადებს პაატა ლეკიაშვილი"კოლოტის" დამფუძნებლის ინფორმაციით, მეღვინეობის მიზანი პროდუქციის 80%-მდე ექსპორტზე, ხოლო დანარჩენი რაოდენობის ადგილობრივ ბაზარზე რეალიზაციაა.ცნობისთვის, "კოლოტის" 10 ჰა-ზე გაშენებული ვენახი და მარანი, ახმეტის რაიონის სოფელ ალავერდში მდებარეობს. მეღვინეობის წლიური წარმადობა კი, დისტილატების(გამოხდილი პროდუქცია) კუთხით 10-12 000 ბოთლია, ხოლო ღვინის კუთხით ჯამში 75 000 ბოთლამდე. bp.ge 

"სხვადასხვა სასოფლო სამეურნეო დარგში 50 ქალი გადავამზადეთ" - აჭარის სოფლის მეურნეობის მინისტრის მოადგილე

2024 წელს საპილოტე პროგრამის ფარგლებში, სხვადასხვა სასოფლო სამეურნეო დარგში 50 ქალი გადავამზადეთ, - ამის შესახებ აჭარის სოფლის მეურნეობის მინისტრის მოადგილემ ირმა აფხაზავამ “ბიზნესპარტნიორი პიკის საათში” განაცხადა.მისივე ინფორმაციით, აღნიშნული პროექტის მიმართ საკმაოდ მაღალი მოთხოვნაა და აჭარის სოფლის მეურნეობის სამინისტრო პროექტის განხორციელებას მიმდინარე წელსაც გეგმავს. "პროექტი ქართული ოცნების” ქალთა ორგანიზაციის ინიციატივით, საქართველოს რამდენიმე მუნიციპალიტეტისთვის გაკეთდა. ეს იყო სოფლად მენტორი ქალების გამოვლენა და სხვადასხვა სასოფლო სამეურნეო დარგში დასაქმებული ფერმერი ქალების გადამზადება. ძალიან საინტერესო პროექტია. ჩვენს ხუთივე მუნიციპალიტეტში: ხელვაჩაურის, ქობულეთის, ქედის, შუახევისა და ხულოს მუნიციპალიტეტში სოფლის მეურნეობის სხვადასხვა დარგების მიმართულებით 5 მენტორი ქალი გამოვყავით, რომელთაც მეწარმეობის კარგი გამოცდილება ჰქონდათ და მათ მიერ ჯამში 50 ქალი იქნა გადამზადებული.გადამზადება მოხდა ისეთ დარგებში როგორიც არის - მეღვინეობა, მებოსტნეობა, მესათბურეობა თუ კენკროვანი კულტურების წარმოების მიმართულება. რეგიონში და არა მხოლოდ რეგიონში ძალიან ბევრი წარმატებული ქალია, რომელთაც შეუძლიათ საქმიანობას მენტორობა შეუთავსონ. ჩვენ თემატურად შევიმუშავეთ ის ძირითადი მიმართულებები, რომელიც ძლიერი სოფლის მეურნეობის დარგებია. მაგალითად, ხულოს მუნიციპალიტეტში ჟოლოს წარმოების მიმართულებით გამოვყავით მენტორი, რომელსაც საწარმო აქვს, შუახევის მუნიციპალიტეტში ღია და დახურული გრუნტის ბოსტნეული კულტურების წარმოების მიმართულებით, ქედის მუნიციპალიტეტში მეფუტკრეობის და თაფლის წარმოების მიმართულებით, ხელვაჩაურის მუნიციპალიტეტში ჩირის წარმოების, ხოლო ქობულეთში მევენახეობა, მარნის წარმოების მიმართულებით", - აცხადებს ირმა აფხაზავა.შეგახსენებთ, საქართველოს რამდენიმე მუნიციპალიტეტში საპილოტე პროექტი განხორციელდა – საუბარია სოფლად მენტორი ქალების გამოვლენისა და სხვადასხვა სასოფლო სამეურნეო დარგში დასაქმებული ფერმერი ქალების გადამზადებაზე.bp.ge

"ფქვილზე საიმპორტო გადასახადის გაგრძელება საქართველოს ბაზარზე სწორი კონკურენციის პირობებს უზრუნველყოფს"

ფქვილზე საიმპორტო გადასახადის გაგრძელება საქართველოს ბაზარზე სწორი კონკურენციის პირობებს უზრუნველყოფს, -  ამის შესახებ ხორბლისა და ფქვილის მწარმოებელთა ასოციაციის დირექტორმა ლევან სილაგავამ “ბიზნესპარტნიორთან” განაცხადა.მისივე შეფასებით, აღნიშნული დადგენილების შედეგად, ადგილობრივი მწარმოებლები ხორბალს უპრობლემოდ ჩააბარებენ.“მთავრობასთან ერთად დავაკვირდებით ფასების დინამიკას და ამის მიხედვით, ახალ მოსავლამდე, ანუ ივნისამდე შეიძლება აღნიშნული გადაწყვეტილების კიდევ გაგრძელებაზე მსჯელობა.აღნიშნული გადაწყვეტილება ადგილობრივი წარმოებისთვის კარგია. ეს დადგენილება თავის დროზე განპირობებული იყო იქიდან, რომ მაშინ რუსეთმა ხორბლის შემოტანაზე მცურავი ბაჟის დაწესების გადაწყვეტილება მიიღო, რამაც რუსეთიდან იმპორტი წაახალისა, საქართველოს ბაზარზე არასწორი კონკურენციის პირობები დამყარდა, წისქვილკომბინატები გაჩერდა და ქართველმა ფერმერებმა ხორბალი ვერ ჩააბარეს.შესაბამისად, ეს გადაწყვეტილება მაშინ მიღებული იყო იმისთვის, რომ კონკურენციის პირობები დაბრუნებულიყო, წისქვილკომბინატები ამუშავებულიყო და ადგილობრივი ხორბლის მოსავალი მიღებულიყო. ამ დადგენილების გაგრძელება საქართველოს ბაზარზე კონკურენციის პირობებს და წისქვილკომბინატების მუშაობას ხელს უწყობს”, - აცხადებს ლევან სილაგავა.ცნობისთვის, ფქვილზე საიმპორტო გადასახადი  1 თვით, 2025 წლის 1-ელ აპრილამდე გახანგრძლივდა. ამასთან, გაიზარდა იმპორტის საფასურიც. ამის შესახებ მთავრობის დადგენილებაშია აღნიშნული. bp.ge