ნიდერლანდების სამეფოში ქართული ღვინის წარდგენა გაიმართა

"წელს მოცვი ახალ საექსპორტო ბაზარზეც გავიტანეთ, ჯამში ექსპორტი 40%-ით გაიზარდა" - მოცვის მწარმოებელთა ასოციაცია

საქართველომ წელს მოსავლის სახით, დაახლოებით, 7 ათასი ტონა ლურჯი მოცვი მიიღო, მაშინ, როდესაც წინა წლის მოსავალი 5 ათას ტონას არ აღემატებოდა, - ამის შესახებ „ბიზნესპარტნიორს“  ლურჯი მოცვის მწარმოებელთა ასოციაციის აღმასრულებელმა დირექტორმა შოთა ცუკოშვილმა  განუცხადა.მისივე თქმით, გაზრდილი მოსავლიანობიდან გამომდინარე, წელს ქვეყანამ ექსპორტის ზრდაც შეძლო, ვინაიდან, როგორც ცნობილია, ადგილობრივი წარმოების მოცვი თითქმის 100 პროცენტით ექსპორტზე გადის.მიმდინარე წლის სამ კვარტალში, წინასწარი მონაცემებით, საქართველომ 6,900 ტონა მოცვი გაიტანა საზღვარგარეთ, რაც წლიურად თითქმის 40%-ით გაზრდილი მაჩვენებელია.ზრდა ფიქსირდება შემოსავლებშიც -  საქართველომ მოცვის ექსპორტიდან, დაახლოებით, 46 მილიონი დოლარი მიიღო, რაც წინა წლის ანალოგიურ მაჩვენებელთან შედარებით 65%-ით მეტია.„რაც შეეხება საექსპორტო ქვეყნებს, წელს ქართული ლურჯი მოცვის ექსპორტი 8 ქვეყანაში განხორციელდა, მათ შორის როგორც ევროკავშირის ბაზრებზე, ისე დუბაისა და ინდოეთში. აღსანიშნავია, რომ ინდოეთი ქართული მოცვისთვის ახალი ბაზარია და წელს, აქ ექსპორტი პირველად განხორციელდა. უნდა ითქვას, რომ ბაზრების დივერსიფიცირებაზე მუდმივად ვმუშაობთ და ამ მიზნით, მონაწილეობას ვიღებთ სხვადასხვა გამოფენებში. მაგალითად, სულ რამდენიმე კვირის წინ საქართველოს ლურჯი მოცვის მწარმოებელთა ასოციაციამ ხილისა და ბოსტნეულის ერთ-ერთ წამყვან საერთაშორისო გამოფენაში, სახელწოდებით Fruit Attraction 2025 - მიიღო მონაწილეობა. ღონისძიება ესპანეთის დედაქალაქ მადრიდში გაიმართა. გამოფენაში ქართველ მწარმოებლებთან ერთად ჩართული იყო 2 ათასზე მეტი კომპანია მსოფლიოს 150 ქვეყნიდან“, - აღნიშნა შოთა ცუკოშვილმა.მისივე ინფორმაციით, ვიზიტის ფარგლებში, ქართული დელეგაციის წევრები და მწარმოებლები მოცვის საერთაშორისო ორგანიზაციის თავმჯდომარეს, მარიო სტეტას შეხვდნენ და სექტორის მთავარი გამოწვევები და შესაძლებლობები განიხილეს.  შეხვედრაზე ისაუბრეს ისეთ საკითხებზეც, როგორებიცაა: ხარისხის სტანდარტების გაუმჯობესება,  საექსპორტო ბაზრების დივერსიფიკაცია, ასევე ინოვაციური ტექნოლოგიების დანერგვა.როგორც ლურჯი მოცვის მწარმოებელთა ასოციაციის აღმასრულებელმა დირექტორმა აღნიშნა, ექსპორტის ზრდასთან ერთად, გაზრდილია თავად ქართული ლურჯი მოცვის ხარისხი და მისი საექსპორტო ღირებულებაც.„წელს მოცვის გლობალურ ბაზარზე საკმაოდ მაღალი ფასები დაფიქსირდა, რაც ზოგიერთ მსხვილ მწარმოებელ ქვეყანაში, ცუდი კლიმატური პირობების გამო შემცირებულ მოსავალს უკავშირდება. პროდუქტის სიმცირემ კი, მისი ღირებულების ზრდა განაპირობა. ცხადია, მოცვის საერთაშორისო ფასის მატება, ქართული მოცვის საექსპორტო ღირებულებაზეც აისახა და ერთი კილოგრამი, სხვადასხვა ხარისხიდან გამომდინარე, 4-დან 8 ევრომდე ღირდა“, - განმარტა შოთა ცუკოშვილმა.საბოლოო ჯამში, ქართველი მოცვის მწარმოებლები ამბობენ, რომ ეს არის საკმაოდ მაღალშემოსავლიანი სექტორი და საქართველოს აქვს უნიკალური პოტენციალი, გახდეს მნიშვნელოვანი მოთამაშე ევროპასა და აზიას შორის, მოცვის მიწოდების ჯაჭვში.დარგის წარმომადგენლები მომავალი წლის საპროგნოზო მოსავალზეც საუბრობენ და ელიან, რომ 2026 წლისთვის, წლევანდელი მოსავალი გაორმაგდება, ვინაიდან, წლიდან წლამდე იზრდება ქვეყანაში გაშენებული მოცვის პლანტაციების ფართობი. ამჟამად, ქვეყანაში მოცვის ბაღები ჯამში 3000 ჰექტარზეა გაშენებული..bp.ge 

"რაჭული თეთრას და მწვანეს ნაზავი ჩამოვასხით - პროდუქციის რეალიზაცია 20%-ით გაიზარდა" - "ველეულა"

რაჭაში, ამბროლაურის რაიონ სოფელ ძირაგეულში მდებარე, ღვინის მარნის "ველეულას" პროექტ მენეჯერის, ნინო მღებრიშვილის ინფორმაციით, წინა წლის ანალოგიურ პერიოდთან შედარებით, პროდუქციის რეალიზაცია დაახლოებით 20%-ით გაიზარდა, რასაც მარნის წარმომადგენელი კმაყოფილ მომხმარებლებს უკავშირებს.როგორც "ბიზნესპარტნიორთან" ნინო მღებრიშვილი აღნიშნავს, ტურისტული ობიექტი ასორტიმენტის გაზრდაზე მუდმივად მუშაობს, მაგალითად, ახლახან კომპანიამ რაჭული თეთრას და მწვანეს ნაზავი ჩამოასხა.მისივე თქმით, ღვინის მარანი წელიწადში დაახლოებით, 10 000-მდე ბოთლ ღვინოს აწარმოებს."ჩვენი საკუთარი ვენახები ძირაგეულში და საკეციაში გვაქვს, რომლის ფართობი 2 ჰექტარს მოიცავს. ადგილწარმოშობის ღვინოს ხვანჭკარას ვამზადებთ, ასევე გვაქვს: "ალექსანდროული", "ძელშავი" რაჭული "თეთრა", "საფერავი" და "ცოლიკაური". წინა წლის ანალოგიურ პერიოდთან შედარებით, მომხმარებელთა რაოდენობა გაიზარდა, რასაც კმაყოფილ მომხმარებლებს ვუკავშირებ. ზოგადად ჭრილში კი, ქვეყანაში მიმდინარე პოლიტიკური მოვლენები წარმოებაზე ძალიან მოქმედებს. გაყიდვების კუთხით, ძირითადი მომხმარებლების წილი მაინც თბილისზე მოდის.ახალგაზრდა მეღვინე გვყავს, რომელიც ყოველთვის ახალი გემოს ძიებაშია. ჩვენთან ერთ-ერთ ყველაზე ტოპ გაყიდვად ღვინოდ "ვერ ველევი" ითვლება, რომელიც საქართველოს 3 რეგიონის, 3 ჯიშის ყურძნისგან მზადდება ("რაჭული მწვანე", "იმერული ცოლიკაური" და "კახური რქაწითელი").  ასორტიმენტის გაზრდას მუდმივად ვცდილობთ, სულ ახლახან რაჭული თეთრას და მწვანეს ნაზავი ჩამოვასხით, რომელმაც ძალიან დიდი მოწონება განსხვავებული არომატის გამო დაიმსახურა", - აღნიშნავს "ველეულას" პროექტ მენეჯერი.ნინო მღებრიშვილი თქმით, ამ ეტაზე "ველეულა" ექსპორტზე არ გადის."ღვინის ფასის დიაპაზონს რაც შეეხება, 1.5 ღვინის ფასი 17 ლარიდან იწყება, პროდუქციას სოციალური ქსელის მეშვეობით აქტიურად ვყიდით. ამასთან, ადგილობრივ ბაზარზე 8 000-ს მოსავალში და სხვადასხვა, ღვინის სპეციფიკურ მაღაზიებში ვართ წარმოდგენილი. ქსელურ მარკეტებში ნაკლებად შეძლებთ ჩვენს ნახვას, მაგალითად, "სპარში" სულ რამდენიმე პოზიციაზე ვართ", - აცხადებს მარნის წარმომადგენელი.ნინო მღებრიშვილი რაჭაში მიღებულ რთველის შესახებაც საუბრობს და ხაზს უსვამს, რომ კომპანიას წელს კარგი მოსავალი ჰონდა."წელს ზოგადად ძალიან კარგი რთველი მივიღეთ. ამასთან, ინფორმაციულ კამპანიებს ხშირად ვატარებთ, რომ მომხმარებლები დავაინტერესოთ, ღვინის "ივენთებიც" ხშირად გვაქვს. რაჭა ზოგადად, როგორც ქართველებისთვის, ასევე უცხოელებისთვის ძალიან საინტერესო ადგილი გახდა", - აცხადებს მარნის წარმომადგენელი.ცნობისთვის, ღვინის მარანი "ველეულა" რაჭაში, ამბროლაურის რაიონ სოფელ ძირაგეულში მდებარეობს, ხოლო ადგილობრივ ბაზარზე 2022 წლიდან ოპერირებს.BP.GE 

"ბიო ბაღები" 2027 წლისთვის ბიო სტატუსის მიღებას გეგმავს

ორგანული (გარდამავალი ბიო) ვაშლის მწარმოებელი კომპანია "ბიო ბაღების" ხელმძღვანელის, დავით ჯაფარიძის ინფორმაციით, ბიო მიმართულებით განვითარება საკმაოდ რთული პროცესია და გარკვეული სახის პროცედურების დაცვას საჭიროებს.როგორც მეწარმე "ბიზნესპარტნიორთან" განმარტავს, ზოგადად, ბიო ვაშლის მოყვანისას გამოწვევები იჩენს ხოლმე თავს, თუნდაც იმიტომ რომ არსებობს დაავადება - "ქეცი"."ორგანული წესით ვაშლის წარმოებისას გამოიყენება, მხოლოდ ორგანული სასუქი და ბიო პრეპარატები, არ ვიყენებთ პესტიციდებს და ა.შ.  სულ 2 ჯიშის ვაშლი მოგვყავს: "ვები", რომელსაც განსაკუთრებულად ტკბილი გემოთი გამოირჩევა და "რუბელიტი", რომელსაც არომატული გემო აქვს.ორგანული წარმოება ტრადიციულ ბაღებთან შედარებით  ნაკლებ მოსავლიანია, მიუხედავად ამისა ჩვენი მთავარი მიზანი ბიო პროდუქტის შექმნაა.აღსანიშნავია, ასევე რომ ბიო პროდუქციის წარმოება  მოყვანის შემდგომ მოითხოვს შენახვის (გრძელვადიანი შენახვა, ხარისხობრივი და გემოვნური თვისებების შენარჩუნებით) განსაკუთრებულ პირობებს, რაც გულისხმობს  იმას, რომ  ბიო პროდუქტი შენახვისას ქიმიური პრეპარატებით არ უნდა დამუშავდეს. ზემოთთქმული მიღწევადია, მხოლოდ ე.წ. ატმოსფერული კონტროლის მეთოდით. საქართველოში კი პრობლემას წარმოადგენს მაღალი ხარისხის სამაცივრე მეურნეობის კრიტიკულად მცირე რაოდენობა და მათი მართვის დაბალი კვალიფიკაცია. სწორედ ამიტომ გადავწყვიტეთ, 1700 ტონის მოცულობის ბიო პროდუქტის შენახვისთვის განკუთვნილი სამაცივრე მეურნეობა შეგვექმნა, რომელიც გვაძლევს საშუალებას  პროდუქტი დიდი ხნის განმავლობაში შევინახოთ და ნედლეულს, როგორ ხარისხობრივი, ასევე გემოვნური თვისებები შევუნარჩუნოთ", - აცხადებს კომპანიის ხელმძღვანელი.მეწარმე ბიო სერტიფიცირების შესახებაც უშუალოდ საუბრობს და ხაზს უსვამს, რომ სერტიფიცირების პროცესს განსაზღვრული ვადა აქვს."ვადა მინიმუმი 3 წელი გახლავთ. მასერთიფიცირებელი ორგანოს მიერ ჩატარებული ინსპექტირებები,  წარმატებით გავიარეთ. ამასთან, 2024 წელს გარდამავალი ბიოს სტატუსი მოგვენიჭა. იმედია 2026, ან 2027 წელს ბიო სტატუსს მივიღებთ", - აცხადებს დავით ჯაფარიძე.მისივე თქმით, წინა წილის ანალოგიურ პერიოდთან შედარებით გაყიდვების რაოდენობა დაახლოებით, 80%-ით გაიზრდება.ცნობისთვის, "ბიო ბაღები" გორის მუნიციპალიტეტში, სოფელ ზერტში მდებარეობს. კომპანიის მიერ მოყვანილი პროდუქცია ადგილობრივ ბაზარზე "აგროჰაბში", "ნიკორაში", "ფრესკოში", "გუდვილში" ასევე ე.წ. უბნის მაღაზიებში 2023 წლიდან იყიდება.  ამჟამად, ვაშლის ბაღი 8 ჰექტარზეა გაშენებული. კომპანია წელიწადში 200 ტონა ნედლეულს აწარმოებს. კომპანიას 2024 წელს გარდამავალი ბიოს სტატუსი მიენიჭა.bp.ge 

"ქართული ჩაი ნაზი არომატით გამოირჩევა, რაც უცხოელ მომხმარებლებში განსაკუთრებულ ინტერესს იწვევს" - "ჩაი მამათი"

კომპანია "ჩაი მამათის" დამფუძნებლის, დირექტორის, კახა ურუშაძის ინფორმაციით, ოზურგეთის ჩაის ევროპულ ბაზარზე სერიოზული პერსპექტივა აქვს.როგორც მეწარმე "ბიზნესპარტნიორთან" აღნიშნავს, ქართული პროდუქტი თავისი ნაზი არომატითა და განსხვავებული გემოვნური თვისებებით გამოირჩევა, რაც მას მაგალითად, თურქული, აზერბაიჯანული ჩაისგან განასხვავებს და უცხოელ მომხმარებლებში განსაკუთრებულ ინტერესს იწვევს."ყოფილი საბჭოთა კავშირის ქვეყნებში: რუსეთში, უკრაინაში, ყაზახეთში ქართული ჩაი ყველას ახსოვს. შესაბამისად, ძალიან დიდი პრობლემების გარეშე გარკვეული ნიშის დაკავება შეგვიძლია. კონკრეტულად ოზურგეთის ჩაი გერმანიაში, საფრანგეთში ძალიან აქტიურად იყიდება, სერიოზული პერსპექტივა გვაქვს. ჩვენს ნედლეულს განსხვავებული გემოვნური თვისებები აქვს, თურქული, აზერბაიჯანული პროდუქტისგან გამორჩეული - ქართულ ჩაის უფრო ნაზი არომატი აქვს და თავისი მომხმარებელი ჰყავს", - აცხადებს კახა ურუშაძე.კომპანიის დამფუძნებელი კონკურენციის საკითხსაც მიმოიხილავს და ხაზს უსვამს, რომ ქართულ ჩაის უცხოურ ბაზარზე საკუთარი ნიშის დაკავება მაღალი ხარისხითა და გამორჩეული გემოვნური თვისებებით შეუძლია."მოგეხსენებათ უცხოეთში ძალიან დიდი კონკურენციაა და აღნიშნულ გამოწვევას მაღალი ხარისხით, გამორჩეული დიზაინით უნდა შევხვდეთ. ამასთან, აუცილებელი მკვეთრი მარკეტინგული ჩართულობა. სხვათა შორის, ევროპაშიც მაღალი ხარისხის ჩაი ხშირი არ გახლავთ, შესაბამისად, ჩვენი ნიშის დაკავება შეგვიძლია", - აღნიშნავს კახა ურუშაძე.წარმოების ხელმძღვანელი ექსპორტის მნიშვნელობასაც განიხილავს. მისი თქმით, კომპანიის მთავარი მიზანი - პროდუქციის უცხოეთში გატანაა."ამჟამად, პროდუქციის ნიმუშები საბერძნეთში, იტალიაში, აშშ-ში გადავაგზავნეთ, ლაბორატორიამ შეამოწმა და უმაღლესი შეფასება მივიღეთ. პროდუქციის გატანა ევროკავშირის და ყოფილი საბჭოთა კავშირის ქვეყნებში გვინდა. საექსპორტო ხაზის მიმართულებით აქტიურად ვმუშაობთ, მოლაპარაკებებიც მიმდინარეობს, თუმცა დამატებით დეტალებს ამ ეტაპზე, ვერ დაგიკონკრეტებთ", - აცხადებს "ჩაი მამათის" დირექტორი.ასევე, "ჩაი მამათის" დირექტორი უშუალოდ გაყიდვების შესახებაც საუბრობს და ხაზს უსვამს, რომ გასული წლის ანალოგიურ პერიოდთან შედარებით პროდუქციის რეალიზაცია გაორმაგდა."გაყიდვების რაოდენობა დადებითი დინამიკით მიდის - შარშან "გუდვილში", როდესაც შევედით, დეგუსტაციაც ჩავატარეთ, მომხმარებელს, როგორც ჩანს, პროდუქცია მოეწონა, თუმცა გარკვეული სახის პრობლემაც გვაქვს - მარკეტინგი. ძალიან მნიშვნელოვანია სწორი მარკეტინგული ჩართულობა, რომ ჩვენს შესახებ საზოგადოების დიდმა ნაწილმა გაიგოს.სუფთა პროდუქტს ვაწარმოებთ, რომელსაც არაჯანსაღი დანამატი არ აქვს.  რაც შეეხება ნედლეულს, გარდა ჩვენი ჩაის პლანტაციისა (14 ჰექტარი) ნედლეულს ადგილობრივი ფერმერებისგანაც ვიძენთ. ბაზარზე "გუდვილში" ვართ წარმოდგენილი, თუმცა გვინდა, რომ გავფართოვდეთ და ქსელური მარკეტები მოვიცვათ. ამ ეტაპზე, მოლაპარაკება "ნიკორასთან", "ფრესკოსთან" მიმდინარეობს. ამასთან, პროდუქციას სოციალური ქსელის მეშვეობითაც ვყიდით", - აცხადებს კახა ურუშაძე.ცნობისთვის, კომპანია "ჩაი მამათი" ლანჩხუთის რაიონში, სოფელ მამათში  მდებარეობს, პლანტაცია გაშენებული 14 ჰექტარზე აქვს. კომპანია ადგილობრივ ბაზარზე 2 წელია ოპერირებს.bp.ge 

ამერიკელმა იმპორტიორმა ღვინო აგვისტოში გამამზადებინა, თუმცა ამ დრომდე ველოდები - "ღვარძელაშვილების მარანი"

ამერიკის ტვირთი გამზადებული მაქვს, მაგრამ არ მიაქვთ. ამერიკელმა იმპორტიორმა აგვისტოში გამამზადებინა ღვინო, უნდა წაეღო, თუმცა ამ დრომდე ველოდები. ვწერ და მისგან პასუხია "დამაცადე", - ამის შესახებ ბიოღვინოს მწარმოებელი კომპანიის “ღვარძელაშვილის მარნის“ დამფუძნებელი გიორგი ღვარძელაშვილი "ბიზნესპარტნიორთან" აცხადებს.მისივე შეფასებით, აღნიშნულის მიზეზი აშშ-ის ახალი სატარიფო პოლიტიკაა."იმპორტიორთან ბოლო კომუნიკაციის დროს მან მითხრა, რომ აშშ-ში ღვინის რეალიზაცია ზოგადად შემცირდა. როგორც მან განმიმარტა ახალი თაობა ტრადიციულ ღვინოს აღარ მოიხმარს და უფრო პოპულარული უალკოჰოლო ღვინო გახდა. სწორედ ამიტომ ღვინის მოხმარება აშშ-ში შემცირდა. გარდა ამისა, მათივე განმარტებით, ტრამპის მიერ შემოღებული ახალი ტარიფების გამო იმპორტიორს აღარ უღირს, რომ აშშ-ში ღვინო შეიტანოს. ცუდი სიტუაციაა მსოფლიოში. ქართული ღვინის მოხმარების სტატისტიკა ყოველ წელს მზარდი იყო, თუმცა 2024 წლის ბოლო კვარტალმა და 2025 წელმა აჩვენა, რომ ქართული ღვინის ექსპორტმა არამარტო აშშ-ში, არამედ ევროპაშიც იკლო. ჩემი წარმადობის 70% ექსპორტზე იყიდებოდა. ახლა კი ეს მაჩვენებელი 50%-მდე შემცირდა. მიუხედავად ამისა, აღსანიშნავია, რომ გაყიდვები არ შეცვლილა, რადგან ადგილზე მყავს ძალიან ბევრი ვიზიტორი. მარნის დაარსების დღიდან დღემდე - წელს რეკორდული რაოდენობის ტურისტს ვუმასპინძლე. ისინი ძირითადად, ინგლისიდან იყვნენ. ადრე ექსპორტის მიმართულების განვითარებას ვგეგმავდი, თუმცა, რადგან გლობალურად ასეთი მდგომარეობაა, გადავწყვიტე მარანს და ტურისტულ ნაწილს უფრო დიდი ყურადღება დავუთმო", - აცხადებს გიორგი ღვარძელაშვილი.მანვე აღნიშნა, რომ "ღვარძელაშვილების მარანი" იაპონიაში ექსპორტისთვისაც ემზადება, მოლაპარაკებები დასრულებულია და პირველი ექსპორტიც სავარაუდოდ, მალე განხორციელდება.ცნობისთვის, "ღვარძელაშვილის მარნის" ვენახი თელავის რაიონის სოფელ  კონდოლში, 5 ჰექტარ მიწის ფართობზეა გაშენებული. კომპანია ღვინოს 2014 წლიდან აწარმოებს, ხოლო ექსპორტზე 2018 წლიდან გადის.რაც შეეხება ამერიკის სატარიფო პოლიტიკას, აშშ-ის პრეზიდენტმა დონალდ ტრამპმა ამერიკაში იმპორტირებულ თითქმის ყველა საქონელზე მინიმუმ 10%-იანი ტარიფების დაწესების შესახებ  მიმდინარე წლის აპრილში განაცხადა. აღსანიშნავია ისიც, რომ ტრამპის მიერ გამოცხადებული ტარიფების ფარგლებში საქართველოს, სომხეთისა და აზერბაიჯანის მიმართ საბაზისო 10%-იანი ტარიფი იმოქმედებს. რაც შეეხება ვადებს, საბაზისო 10%-იანი ტარიფები 5 აპრილს ამოქმედდა.CNBC-ის ინფორმაციით, ტარიფები არ ეხება შემდეგ პროდუქციას:  ფარმაცევტული პროდუქტები ნახევარგამტარები ხის მასალა სპილენძი და ოქრო ენერგეტიკული რესურსები და მინერალები, რომლებიც აშშ-ში მიუწვდომელია. bp.ge